Трос нылпиё анайлэн но песянайлэн шумпотонъёсыз

Кускем гуртысь ужысь ветеран Зоя Семёновна Колесникова 25-тӥ пӧсьтолэзе пусйиз аслэсьтыз 95 аресъем юбилейзэ. Сӥлы карыса, лякыт сюлэмо песянаез ӟечкыланы лыктӥзы Балтась ёросысь главалэн воштӥсез Наиль Сабирзянов, ёросысь социальной дурбасьтонъя ёзэтлэн кивалтӥсез Алсу Гатиятуллина, Кугунур гурт поселенилэн главаез Руслан Егоров но Балтасьысь почта ёзэтысь ведущей ӧнерчи Кадрия Мингазова. Лыктэм куноос юбилярез Россилэн Президентэзлэн ӟечкылан открыткаеныз но Балтась ёрослэн главаезлэн Таукарон гожтэтэныз шумпоттӥзы. Кивалтӥсьёслэн таӵе сӥё-дано каремзы Зоя Семёновналэн сюлмаз шуныт пыртӥз.

Туннэ нуналлы 95 аресъем юбилей зэмзэ ик бадӟым ужъюгдур. Уд но малпа: сыӵе кема улыса, дунне вылысь пӧртэмзэ адӟем нылкышно каньыл мылкыдын улэ шуыса. Зоя Семёновна пыд йылаз юн сылыса, шумпотыса, матысь адямиосыз вӧзын пумитаз аслэсьтыз дано лыдпуссэ. Лякыт сямо нылкышнолэн йыраз пӧртэм пумо тодэ ваёнъёсыз лыкто, ваньзэ сое гожтыса но, кылзыса но уд вутты. Мазэ веранэз, тросэз веранъёсыз шудо улонэныз герӟаськемын. Пальышаса пукись песянай шоры учкыса, мылкыд ӝутске: каньыл вераськись, бордаз кыскись, ваньзэ валась, кенеш сётӥсь.

Кускем гурт пичи ке но, солэн инкуазез, улӥсьёсыз синмаськыто. Выль коркаос ӝутӥсько, сюресъёс лэсьтӥсько, озьыен, гуртын улон мынэ на. Вӧл-вӧл интыяськем Колесниковъёслэн корказы ӝикыт, чылкыт сылэ. Капчи мылкыдын куноосты пумитазы коркалэн кузёосыз.

Лыктэм куноослэсь ӟечкыланъёссэс юбиляр сак кылзӥз. Кылъёссэс ӧз жалялэ, котькуд ӟечкыланзы интыя тупась, сюлмысь верамын луиз. «Нылпиостэс шумпоттыны кема аръёс ӵоже мед кылдоз али. Инмарен сётэм аръёсады пумозяз нылпиосыныды, внукъёсыныды, правнукъёсыныды огазе шудо улэ. 100 аресады но лыктыны луонлык мед кылдоз. Шудбур, юн тазалык сӥзисько», – ӟечкыланъёссэ вераз Наиль Нургаязович.

Бадӟым семьяязы, Зоя Семёновна сяна, вордӥськиллям на Герман, Григорий, Константин пиоссы но Мария нылзы. Улонлэсь секытсэ пиналъёс кыл вылын гинэ шӧдӥллямтэ: анайзы котьку ужаса дырзэ ортчытылэм, атайзы но котьку ужен герӟаськемын вылэм. Анайзылы секыт йӧтэмзэ Зоя Семёновна мӧзмыт мылкыдын вераз: «Котьку нюлэскын вал ини со, 5 кузя нылпиосты пыд йылаз султытоно ук, вордоно, секыт вал солы».

Арлыдоосты котьку секыт малпанъёссы ож аръёсы вутто. Та шимес вакыт нылпиослы пырак дышетскыны дыр сётымтэ, вань кужымзэс соос вормонэз матэктон, ожгарчиослы юрттон понна сётӥллям, колхозэ ужаны ветлӥллям. Озьы ке но, улонын асьсэды шедьтыны но быгатӥллям: трос опыт люкаса, калык понна но, кивалтӥсьёссы понна но зэмос ужасьёс луиллям. Агайёсыз но асьсэды туж зӥбыт но юн сямо возьматӥллям: Быдӟым Отечественной оже пыриськиллям, жаляса верано, Герман пизылы ожлудысь бертыны ӧз кылды. Константин пизы 6 ар моряк луыса службазэ ортчытэм. Атайзылэсь адӟем карем, дыр: ас дыраз быдэс дунне ожын ветлэмын, пленэ сюремын, нылпиосызлэн верамъёссыя, ожлэсь вань секытъёссэ адӟыны кылдэм пиосмуртлы.

1955-тӥ арын Зоя Семёновна Кускем гуртысь Иосиф Алексеевич Колесниковен семья кылдытэ но та гуртын пыраклы шудо улонзэ азьланьтэ. Асьсэ семья кусыпъёссэс юн зӥбыт возьыны тыршиллям кузпалъёс, юртъер котыразы радъяськиллям, пудо вордыны но вутскиллям на. Шумпотоназы вордскиллям 2 нылъёс но 2 пиос: Тамара (1956), Роза (1958), Владимир (1960), Вячеслав (1968). Но, нылпиослы атай пельпум кемалы пыкет луымтэ. Иосиф Алексеевич, жаляса верано, 1968 арын югыт дуннеысь кошкем. Озьы ке но, нылпи сюлэмъёсын атайзы сярысь шунытэсь тодэ ваёнъёс утиськиллям.  

«Бызи, сюан карим. Картэ но колхозын ужаз. Шоро-куспо улӥм, секытъёс но вал, шумпотонъёс тросгес ини. Улонын маиз гинэ уг луы, ваньзэ ортчыны быгатӥм», – валэктэ Зоя Семёновна. Кузпалъёслы трос аръёс ӵоже валче улыны йӧтымтэ ке но, картэз сярысь шуныт малпанъёсын гинэ улэ кышномурт. Яратонлэн емышъёсыз, нылпиосыз, шуг улоназ югыт тылын пиштыса, шудо улонэ вуттӥзы. Со ик вань, дыр, зэмос шудо семья кусыпъёс: матысь адямиос секыт мылкыдын улыны уг сёто.

Гуртын вордӥськем но улэм адямилы котькуд ӧнерын ужаны тупа. Зоя Семёновна но пӧртэм интыосы вутске: колхозэ, бератаз почтае. Валтӥсез сяна дораз но ужез трос луэм на.

Ужан вакытсэ шуныт мылкыдэн тодаз вае Зоя Семёновна, секыт дыръёсыз йырзэ уг висьыто. Азьло ик юанэ кылдӥз: «Огъя ужан стажды кӧня луиз?» Ужысь ветеран серектыса вера: «Кин тодэ ини. Ужан аръёсме ӧй но лыдъя. Тодӥськод-а, ужед луиз ке, ӵотамед но уг поты ни. Азьло ик Сардык гуртын ужаны кутски, собере Дурга гуртэ выжи, Кугунур гуртэ но вуыны кылдӥз. Балтасьысен но почта нуллӥсько вал. Транспорт ӧвӧл, велосипед но ӧй вал, озьы ке но ужано. Почтаысен костюм, юбка сётӥзы. Таиз понна но туж бадӟым тау шуисько».

Аслаз праздниказ но Зоя Семёновна матысь адямиосыз сярысь уг вунэты. «Тазалык сӥзисько пиналъёслы, умой мед будозы, висёнъёс ноку но медаз нюртэ. Тау шуэме потэ монэ утялтэмзы понна, бадӟым тау. Ӝожтӥськон интые ӧвӧл: сюдо, вордо, изён интыме вошъяло, ваньзэ лэсьто, ул но ул. Обижаться карыны инты ӧвӧл!» – капчи мылкыдын шуэ песянай. Таӵе кылъёсыз юнме верамын ӧвӧл: ӵыжы-выжыосыз юбилей нуналаз трос дасяськиллям, пӧраськиллям, оло, уйзэ но изьытэк потӥллям, лэся. Паймымон кадь, кыӵе юн кусыпъёссы семьяын, ог-огзылы юрттыны котьку дась, ужзэс но уг люко, ваньзэ ӵошен, огазе лэсьто.

Арлыдо адямилы али трос кулэ ӧвӧл ни: ӵыжы-выжыосызлэн тазалыксы, шумпотонзы но гань-гань улонзы. Соин ик Зоя Семёновна ассэ шудоен лыдъя: ӝӧк тыр сиён, коркан нылпи куара чузъяське, инкуазь чебересь туспуктэмъёс гинэ кузьма, лачмыт улонлэн буёлъёсыз ӟечен нуналъёссэ чебермало.

Зоя Семёновналэн туннэ нуналлы узыр семьяез: нылпиосыз, внукъёсыз, правнукъёсыз. Лыдзы арысен аре йылэ, семьялэн азьланез вань. Шутэтскон нунал ӧвӧл ке но, бадӟым семья шумпотыса люкаськиз яратоно адямизэс ӟечкыланы. Адӟиське: песянаез мур гажало, ярато. Солэн небыт киосыз котькудзэ буйгато, шуныт сюлмыз котькудӥзлы тырме.

Дано ужысь ветеранлы, яратӥсь анайлы, лякыт сюлэмо песянайлы сӥзисько азьланяз но улонтӥ шумпотыса вамышъяны. Котькуд нуналзэ пальпотыса пумитаны, матысь адямиосыныз огазе тупаса, валаса, яратыса улыны. Вань секыт иворъёс палэнтӥды мед ортчозы, нош шумпотон иворъёс нуналысь нуналэ тросгес мед луозы. Пушкысь яркыт сиосын пиштӥсь югыттэс котыр дуннелы кузьманы медло. Улон ӵоже лэсьтэм ӟеч ужъёсты асьтэлы ик ӟечен мед берытскозы!