Троссэ адӟимы-чидамы

5-6 аресэн ини ми толалтэ салазки, гужем пичи уробо кыскаса, анайёслы юрттыны тыршимы.

Толалтэ вал. Ми анаен, салазки кутыса, нюлэскы кошкимы. Кезьыт коркан атайлэн атаез - сукыр бабай гинэ кылиз. Нош нюлэс ми дорысен 6 иськем. Куасьмем улвай люкаса нюлэскысь потыку, нюлэсчиен пумиськимы. Эх, тышкаськемезлы гинэ чидасалмы, нош со дӧдьыысьтыз бутылкаен керосин басьтӥз но, улвайёсын ӵош салазкимес но сутӥз. Кыкнамы ик бӧрдыса, буш киын бертыса кошкимы.

Огпол эшшо, салазки кутыса, мукет нюлэскы кошкимы (коркаез кызьы ке но шунтоно ук, сиёнэз но пуртыын пӧзьтоно). Со нюлэс гурезё интыын вал. Туж курадӟыса тубим, анай кыске, мон донгисько. Ӵапак со вакытэ, юри ӧчкарыса кадь, караулчи вуиз. Сое адӟем бере, бӧрдыны кутски. «Курисько, эн йӧты милемыз, тазьы но курадӟыса улӥськом», - шуи. Тау солы, интыез узьмагын мед луоз, со милемлы гурезе тубыны юрттӥз. Та али тодам усем кык учыр гинэ. Со аръёсы милям котькуд нунал курадӟыса, тэльмырыса ортчиз уга.

1. Пӧртэм мугъёсын сэрен оже мынымтэ воргоронъёслэн нылпиоссы. Соос со дырысь тужгес шудо нылпиос луиллям, дыр.

2. Жугиськонысь сӧл-таза бертэм пиосмуртъёслэн нылпиоссы. Таӵеос но, огъя вераса, шудо пиналъёс. Дасо аръёс ӵоже атайёсынызы улӥзы, али ке но улӥсьёс вань. Соос ик атайзылэсь яратэмзэ но шӧдӥзы, правительстволэсь юрттэтсэ но адӟизы, квартираё, машинаё луизы, пӧртэм льготаосын пайдаяськизы.

3. Таиз группа - гумырзы ӵоже зӥбыса возем, сирота кылем, сютэм улэм, ни атаен улон шуд усьымтэ, ни правительстволэсь юрттэтсэ адӟымтэ нылпиос - зэмос ож вакытысь нылпиос. Ӵапак та группае пырись адямиос понна туннэ нуналозь но дурбасьтӥсьёс ӧз шеде на.

Одӥгез атаез ожысь сӧл-таза бертэм мурт шуиз вал: «Шудтэм луыса вордсконэз ӧй вал!». Огпол шудтэм луыса, весяклы но шудтэм медаз луы вал ни. Правительство ми сярысь но мед сюлмаськысал, зэмос ож вакытысь сиротаослы, кулэ статус сётыса, мед юрттысал.