Тыронъёс но пунэмъёс

Татын трос квартираё юртъёсын улӥсьёслэсь ОДН (юртлэн огъя кулэяськонэз) тыронъёсты конкретизировать карем РФ-лэн Правительствоезлэн 344-тӥ постановлениезъя кутэм нормативъёсты, ресурсъёсты шыръяса кутон, законэз тӥяса ву, электро пыртон учыръёсты алон ужпумъёс сярысь рос-прос вераськон луиз. Озьы ик Татарстанысь Министръёслэн Кабинетсылэн кылем арлэн пумаз кутэм «Трос квартираё юрт пушкын электрокужымен, кезьыт но пӧсь вуэн пайдаяськем понна расходъёсты тодмостон сярысь» 1079-тӥ постановлениезъя нормативъёсысь воштонъёс сярысь но калык пӧлын валэктон уж нуонлэн кулэлыкез пусъемын вал. Нош воштонъёс таӵеесь: табере трос квартираё юрт нимаз счётчик пуктэм вылэм, ОДН понна но норматив кассаысьтыз тыре, нош счётчиксы луымтэослы нормативлэсь ортчем люкетсэ но тырыны тупалоз.

- Районмы та ужпумъя республикаын тужгес юнмам 9 районъёслэн одӥгез. Берло дыре калыкен пумиськонъёслэн, валэктонъёслэн бервылзы шӧдӥське, со ужез азинтыны кулэ, - шуиз И.Мухамметзянов. - Управляющей организациосын но ужрадъёс кутӥськизы. Унояз трос квартираё юртъёсын ОДН счётчикъёс пуктэмын, дас одӥгаз гинэ, технической мугъёсын сэрен, та уж быдэстэмын ӧвӧл на. Туэ тулыс-гужем интыяса быдтомы. Огшоры гинэ потӥз ке но, валамон ини, ОДН тыронъёсын герӟаськем ужпум туж бичатӥсь но лэчыт. Со вань квартираосын улӥсьёслэсь но управляющей организацилэсь шонер, зэмлыкез утись луэмзэс кулэ каре. Эшшо соиз но вань: та расходъёс трос факторъёсын герӟасько. Кылсярысь, одӥг интыын труба вия, кин ке но огназ улоно квартираяз квартирантъёсты возе (нош счётчик луымтэ дыръя, одӥг гинэ адямилы чаклам нормативъя тыре) но мукет сыӵе учыръёс. Асьмеос сое ваньзэ эскерыны, тодын возьыны кулэ. Та юртын улӥсьёс но таӵе учыръёс, югдуръёс сярысь ивортыса, саклык висъяса мед улозы вал. Таӵе вераськонъёслэн азинсконзы луоз али.

Кенешонын эшшо одӥг ужпумъя - организациос азьын пунэмо луэм адямиос сярысь но рос-прос вераськон луиз. Утёд ке, тыл, газ, коммунальной расходъёс понна дыраз тырымтэос районын шӧдскымон трос вылэм. 1-тӥ апрельлы калыклэсь люкаса быдтымтэ коньдонлэн быдӟалаез 1 миллион 799 сюрс манет луэ. Трос этажъем юртъёсын улӥсь дас адямилы 200 сюрс манетлэсь уно пунэм тупа. Одӥг ар но солэсь кемагес тырисьтэмъёс вань. Сыӵеослэн пунэмъёссы 36 сюрс манетысен 53 сюрс манетозь вуэм ини.

Нимаз юртын улӥсьёс пӧлын лыдпус бадӟым ӧз ке но луы (дас муртлы 100 сюрс манетлэсь уногес), та категориысь адямиос пӧлын кык арозь пунэмъёссэс тырымтэос но вань. Пунэмъёслэн быдӟалазы 4800 манетысен 12 сюрс манетозь. Сыӵеослы чурыт ужрад кутыны - судэ сётыны ӵектэмын вал.