Хезмәт

Тылогуртлэн вашкалаысьтыз

Гуртъёслэн кылдэмзы сярысь легендаос одӥгез мукетэзлэсь чебер. Нош озьы меда со? Асьме пересьёсмы али улон интыязы вуиллям мукет финн калыкъёсын ӵош Сибирьысь, арысен аре улон интызэс вошъяса.

Удмуртъёслэн гурт нимъёссы тросэз герӟаськемын выжы нимен. Шошма удмуртъёслэн туннэ нуналэ лыдъямын ог дасо удмурт выжы ним: Турья, Сырья, Лӧзя, Ӟуння, Чипья, Пошья, Уча, Дурга... Выжызэс утён сям 1740-1750 аръёсысен лябӟыны кутскемен, выль кылдэм гуртъёс выжы нимын герӟаськымтэзы ни. Со дырысен выль кылдэм гуртъёсты нималлям гуртлэн инты нимыныз, нырысь яна потэм муртлэн нимыныз яке переписчикъёс ас сяменызы но гожтыны быгатӥллям.

Ӟуння выжыысь удмуртъёслэн одӥгез гуртсы

Нимаське со Тылогурт. Историзэ эскерыны мылкыды ӝутӥськиз «Азьлане» газетын (31 март 2017 ар, #12) потэм вазиськонэз лыдӟем бере.

Тодосчиос верамъя, Ӟуння ним со крашине пырымтэ удмурт нылкышнолэн нимыз. Удмуртъёслэн улон интыосазы 86 пала гуртъёс герӟасько та выжы нимын. Тодосчиослэн верамзыя, ӟунняослэн дорвыжы  интызы Кукмор ёросысь Старая Кня Юмья (Ӟуння гурт) но Верхняя Юмья (Тылогурт) гуртъёсын. Озьыен, малпаны луэ, та гуртъёсысь яна потӥллям шуыса. Вашкала удмуртъёс корам но сузям нюлэс интыез нимало вылэм «тыло». Нырысьсэ гуртлэн нимыз пумиськылэ архив документъёсын 1710-тӥ арын. Территорально пыре удмурт Досмекей Байгозинлэн сотняяз (Арча сюрес, Казань губерния). Переписчик гожтэ, 1710 арын Тылогуртын 7 корка лыдъяське шуыса. 1716 арын гожтэмъя, Тылогуртын 28 улӥсьёсыныз 4 корка луэм (Досмекей Ямайлэн сотняез, Арча сюрес, Казань губерния). Нырысетӥ юртын улӥллям Алдергушъёс: Агиш  (25 арес), Байгуш (15 арес), соослэн анайзы Мурзагулова Арычка (55 арес), сузэръёссы: Узы (13 арес), Усул (11 арес), Агишлэн кышноез Тоскей Ярка, соослэн нылпиоссы: 6 аресъем пизы Келдыш но 7 аресъем нылзы Барчай. Одӥг апайзы Зазян картлы быземын Сырья гуртэ Байтеряк Семёнлы, нош Аднакейзы — Уча гуртэ (Сизьныр гуртэ) Досай Стенькалы. Кыкетӥ юртын улӥллям Батикъёс: Баймурска (45 арес) но солэн кышноез Арычка Ивакина (45 арес), нылпиоссы: Баймамет (25 арес), Мурза (22 арес), Елмамат (15 арес), нылзы Атул (17 арес), Мурзалэн пиез Макей (6 толэзь). Одӥгез нылзы Бабачка картлы быземын Юмья гуртэ Токмамат Тюганлы. Дарьказы картлы кошкемын Лӧзя гуртэ Досай Айдялы. Ямаш агайзы яна потыса улэм. Куинетӥ юртын яна потыса улӥллям Баймурскалэн агаез Батик Ямаш (55 арес), солэн кышноез Корак Конка (45 арес), пиез Гарань (35 арес), Токмамет (17 арес), Максим (16 арес), Гараньлэн кышноез Бекей Сулу (20 арес), соослэн нылъёссы: Тойсулу (4 арес) но Утябей (3 арес). Ньылетӥ юртын улӥллям Июнин Уразмамет (35 арес), солэн кышноез Менглыбай Саркей (35 арес), нылъёссы: Адна (15 арес), Тотма (8 арес), Зайня (7 арес). Со гуртын ик ньыль юрт буш сылэм: Кадряк Килдыбечлэн, Кичкин Багишлэн, Кичкин Кугушлэн, Келдыш Бектемирлэн. 1712-тӥ арын соос кошкиллям шуыса гожто.

1744-1747 аръёсы ортчем кыкетӥ переписья книгаосын гожтэмын, 47 крашинэ пырымтэ удмуртъёс уло шуыса. Территориально пыре удмурт Урка Тохтамышлэн сотняяз (Арча сюрес, Казань губерния).

1761-1767 аръёсы ортчем куинетӥ переписья гожто, крашинэ пырем 47 пиосмурт но 45 нылкышно улэ шуыса.

1780-тӥ аръёсы ортче территориальной реформа. Со дырысен Тылогурт но матысь гуртъёс пыро Малмыж уездысь Ватка наместничествое.

1780-1782 аръёсы лэсьтӥське нырысетӥ черк. Со дырозь черк луэм Кукмор ёросысь Чура гуртын. 1782 арын ортчем переписья 66 мурт улэ шуыса гожтӥське, 1795 арын ортчем переписья — 64 пиосмурт но 70 нылкышно.

1811 арын ортчем переписья улэм 55 мурт. Соку со пырем ини Ватка губерниысь Уржум ездэ, Средний Кушкет волосте. Тыло (Комсомольской) урамысь кык семья яна потэм Тӥллячи (Советской) ураме. Метрической книгаосын Тӥллячи урамез черк ужасьёс кык сямен гожто: Курмыж гурт я Тылогурт. Маин со герӟаськемын, тодмо ӧвӧл. Карабай нюк доры (Маслозавод дорысь нюк) интыяське вить мурт. 1816 арын улӥллям 56 пиосмурт 67 нылкышно, 1834 арын — 77 пиосмурт но 82 нылкышно (Ватка губерния, Малмыж уезд, Средний Кушкет волость). 1850 арын пыре Ватка губерниысь Малмыж уездэ, Сизнер волосте, Юбекимелинка обществое. Соку гуртын улӥллям 113 пиосмурт но 110 нылкышно. 1858 арын ортчем переписья — 129 пиосмурт но 110 нылкышно.

Озьыен, тодэм архивной источникъёсыз, интынимъёсыз, археологической даннойёсыз лыдэ басьтыса, гуртлы ог 310-320 ар шуыса вераны луэ. Кукмор ёросысь Ӟуння выжыысь удмуртъёс кылдыто Выль Починка гурт. Ӟуння нюк вӧзысь нюлэсэз кораса, сузяса пуктыло коркаос. Со интызэс шуо Тылогурт. Нырысьсэ крашинэ пырыны кутскиллям ог 1760-1770-тӥ аръёсысен. Туннэ нуналэ Тылогурт Ципья черкогуртлэн одӥг урамез луэ.

Та статья возьматэ интыним люкан удыслэсь кулэзэ но. Тодӥсь муртъёс арысен аре ӧжыт кылё. Озьы ке но, вить толэзьскын тодмо луизы ог 250 интыослэн нимъёссы. Тодӥськоды вылэм сыӵе интыосты, эн аналске, гожтэ. Аръёс ортчыса кулэ луоз ай. Луд вӧсь интыос, керемет интыос, куала интыос, нюк нимъёс, ошмес интыос, гоп интыос, тэль нимъёс, кыр куян интыос, вуж шай интыос, бельгы интыос, вашкала гуртъёслэн интыоссы возьмато асьме калыклэсь историзэ.

Вунэтыны кулэ ӧвӧл асьмелэсь сюрс аръёс ӵоже кылдэм культурамес но кылмес. Выжытэм писпу уг буды, куасьме. Соин вашкалаос выжызэ куала лэсьтыса утӥллям, дыр.

Материал дасямын шошма удмуртъёслэн историзылы сӥзем гожъямъёсъя. Озьы ик рос-прос юрттӥзы Василий Петрович Никитин но Леонид Дмитриевич Сапожников.

Алексей Шмелёв

Санкт-Петербург

 

Нравится
Поделиться:
Реклама
Комментарии (0)
Осталось символов: