"Удмурт Кенешлы" — 30 ар!

Та сӥё-дано ужрадэ Удмуртилэн ёросъёсысьтыз но каръёсысьтыз ёзчиосыз, палэнын улӥсь удмуртъёслэн делегатъёссы, кивалтӥсьёс но ӧтем куноос вуизы. Шумпотымон, та бадӟым ужрадэ асьме улосчиосмы но пыриськизы: Балтась ёросысь удмуртъёслэн йӧскалык огазеяськонзылэн тӧроез Ольга Пчельникова, солэн юрттӥсез, Покчи Лӧзя школаысь удмурт кылъя но литературая дышетӥсь Наталия Антонова, ёрос газетлэн редакторезлэн дубляжъя воштӥсез Ольга Плотникова но ёросысь исполнительной комитетлэн кивалтӥсезлэн воштӥсез Ильгам Гайнутдинов.

"Удмурт Кенеш" огазеяськонлэн юбилеезлы сӥзем ужрад шуныт кылъёсын, ӟеч сӥзёнъёсын но таукарон мылкыдэн пачылмемын вал.Удмуртлыкез, удмурт калыклэсь сям-йылолъёссэ, лулчеберетсэ, кылзэ утён но азинтон удысын бадӟым уж нуэмзы понна но "Удмурт Кенеш" огазеяськонлы 30 ар тырмонэн валче та нуналэ трос гажамон удмурт адямиос данъямын вал. Соос пӧлын асьме улосчиосмы но вань: Балтась ёросысь удмуртъёслэн "Кенеш" огазеяськонзылэн тӧроез Ольга Пчельникова Удмурт Элькунысь Йӧскалык политикая министерстволэн Таукаронэныз пусйиськиз, нош ёрос газетлэн редакторезлэн дубляжъя воштӥсез Ольга Плотникова Удмурт Элькунысь Печатья но ивортодэтъя агентстволэсь Таукаронзэ басьтӥз. Асьме ёросмы понна эшшо одӥг бадӟым шумпотон ивор — кема аръёс ӵоже "Кенеш" НКА-лэн ёзчиез луэм удмурт азьветлӥсьмы, Ӟаны шоръёзо школалэн азьвыл директорез Иван Васильевич Ермаков "Удмурт Кенешлэн" Данъян Книгаяз пыртэмын.  Сюлмысь ӟечкыласьком но данъяськиськом!