«Ура, Авылга!» — Ӟаныын

22-26 инвожое «Ура, Авылга!» элькун проект улсын Балтась ёросын йӧскалык лагерьёс ужазы. Одӥгез сыӵе лагерь кылдытэмын вал Ӟаны шоръёзо школаын.

«Ура, Авылга!» — со «Движение Первых» огазеяськонэн куинетӥ арзэ ини улонэ пыӵатӥськись нуназе ужась лагерь (нылпиос ӵукна вуо но ӝыт кошко). Солэн валтӥсь аспӧртэмлыкез — этнокультурной компонент. Валтӥсь ужпумез — нылпиосты шудон но творчество пыр шаерысьтымы калыкъёслэн йылолъёсынызы тодматон. 

Туэ гужем «Ура, Авылга!» (бигер кылысь «Ура, гуртэ!») ортче Татарстанысь 15 ёросъёсын. 2026-тӥ арын лагерьёс 45 гуртъёсты огазеяло, отчы 7-ысен 17 аресозь ог 3 сюрс пиналъёс но быдэ вуымтэос ветло. Отчы пыриськисьёс бигер, удмурт, чуваш но пор калыкъёслэн лулчеберетъёссы сярысь тодо, мастер-классъёсы, экскурсиосы, сям-йылолъёсъя вожвылъяськонъёсы пырисько но трос выльзэ басьто.

— Та проект вить нунал ӵоже радъяське, чакламын со мукет ёросъёсысен но городъёсысен милям гурт поселение интыысь калыклэн лулчеберетэныз, сямъёсыныз но йылолъёсыныз тодматскыны лыктӥсь нылпиос понна. Школамы удмурт кылъя специализироваться каре бере, ми нылпиосты удмурт лулчеберетэн тодматӥмы, — ивортэ Ӟаны шоръёзо школаысь дышетонъя но мерлыко нылпи огазеяськонъёсын кусып возёнъя директорлэн кенешчиез Анна Витальевна Смердова.

Огъя 60 нылпи люкаськем лагере. Соос пӧлысь ӝыныез — удмурт пиналъёс, кылемез — бигеръёс но ӟучъёс. 

— Нылпиос тросэз Казаньысь, вал Пестрецы, Кукмор ёросъёсысь вуэм пиналъёс но, Удмуртиысь но. Соос бертэмын кин Янгулэ, кин Бурнаке, кин Ципьяе. Озьы ик Кушкетбашысь, Балтасьысь ветлӥсьёс но луизы, — азинтэ веранзэ Анна Витальевна. 

Лагерьын вить нунал ӵоже та пиналъёс понна нимысьтыз ӧръёсъя ужрадъёс ортчытэмын вал. Кылсярысь, понедельнике пумиськон но тодматскон нунал луэм. Школаын соосты кырӟаса пумиталлям, ву нуллон карнанлэсь капка лэсьтыса, отчы гырлы думыса дасяллям. Котькудӥз нылпи, чебер малпанэн, гырлые жингыртыса, со капкатӥ пырем. Собере нунал куспын соосын тодматскон понна шудонъёс ортчытӥллям, отрядъёслы люкиллям. 

Вань нылпиосты 4 отрядлы люкиллям. Котькуд отрядлы ним но «кричалка» малпаллям.

— Удмурт кылын дышетсконо бере, отрядъёслы ним но, девиз но удмурт сётӥмы: «Чилектэм» (чилектэм кадь ми кужмо, котькинлэсь азьын луом), «Шундыпиос» (ми пичи шундыпиос — быдэс дуннеез шунтӥсьёс), «Вуюись» (вуюись сизьым тусо, ми но со кадь чибориё), «Шапыкъёс» (шапыкъёс кадь пичиесь, соос кадь ик шаплыесь). Котькудӥзлы отрядлы нимызлы тупась суредъёсын бейджик лэсьтӥмы. Нылпиослы асьсэлы отряд бырйыны луонлык но сётӥмы: кинлы кыӵе суред кельшиз, со отрядэ ик пыриськиз. Соин кытын ке но пиналъёс уногес луизы, нош кудаз ке — ӧжытгес, — ватса Анна Смердова.

Нуналлы быдэ школаын ортчиллям мастер-классъёс. 

— Нырысетӥ нуналаз милям вал «Италмас» брошкаез лэсьтонъя мастер-класс. Пиналъёс «Италмас» легендаен тодматскизы но Надежда Александровна Спиридоновалэн кивалтэмез улсын фоамиранлэсь брошь лэсьтӥзы.

Кыкетӥ нуналаз милям луоно вал Ӟаны гуртъя экскурсия, но куазь зоремен ми отчы потыны ӧм быгатэ, соин калык шудонъёс гинэ ортчытӥмы: «Ми таримес кизимы..», «Ӟазег уя, ӵӧж уя...» но мукет. Со нуналэ лагере ветлӥсь одӥг пияшмылэн вордскем нуналыз но тупаз, сое ӟечкыламы, «Каравай» кырӟанэз удмурт кылын быдэстыса. Озьы ик со нуналэ Олеся Васильевна Яковлева ортчытӥз брелок лэсьтонъя мастер-класс. Кыкетӥ нуналаз ми эшшо шудӥмы крезьгуро лотоен, нылпиос «Ой, тӥ чебер нылъёс!» но «Лымы тӧдьы» кырӟанъёсты караоке кырӟазы. Маиз шумпоттӥз: нылпиос ваньзы сямен тодо вылэм «Ой, тӥ чебер нылъёс!» кырӟанэз. Бигер пиналъёс но припевзэ ке но тодо.

Куинетӥ нуналаз милемыз гуртысь лулчеберетъя юртын пумитазы. Туж умой пумитазы — вӧйын нянен. Отын нырысь библиотекарь Анисимова Римма Александровна Балтась ёросэн герӟаськем удмурт гожъяськисьёс — Иван Яковлев, Ашальчи Оки, Николай Никифоров, Григорий Медведев — сярысь вераз. Туж тунсыко викторина ортчытӥз нылпиосын. Собере интыысь лулчеберетъя юртын ужасьёс — Алефтина Васильевна Иванова но Татьяна Ивановна Михайлова — нылпиослы традиционной удмурт костюм сярысь веразы, дӥсятыса ик возьматъязы. Тунсыкъяськыса кылзӥзы соосты пиналъёс. Собере апай сямен но агай сямен эктыны дышетӥзы, ваньзы ӵош кырӟазы, эктӥзы. Берло Мария Викторовна Прокопьева чыртывесь-монисто лэсьтонъя мастер-класс ортчытӥз. Вераны кулэ, таиз но ужрад пиналъёслы туж кельшиз. Пиос но туж шумпотыса, «анаймылы лэсьтӥськом» шуыса, лэсьтӥзы сое, дӥсяса но ветлӥзы, — шумпотэмзэ ватытэк вера дышетӥсь.

Пиналъёслэн берло кык нуналзы удмурт калыклэсь лулчеберетсэ но улэм-вылэмзэ возьматӥсь школа музеен тодматсконлы, вандылӥськон дускоез (доскаез) суредаса буянъя но йӧскалык кухняен тодматсконъя (сылало ыльняньлэсь перепеч лэсьтыны, солэсь дурзэ кутыны дышетскон) мастер-класслы, гурт кузя экскурсилы сӥземын вал. 

— Котькуд нунал пумын ми одно ик нылпиосын кыллюкамъёсамы куинь, ньыль, вить удмурт кыл гожъяллямы, кудъёссэ соос нунал ӵоже тодазы кельтӥзы. Пиналъёс гожъязы, мар выльзэ соос асьсэ понна тодӥзы но мар выльзэ карыны соос дышетскизы, — пусъе Анна Витальевна.

Огъя вераса, «Ура, Авылга!» ӵектос улсын радъяськем йӧскалык лагерь туж узыр но тунсыко программаен паймытэм. Ужрадъёслэсь пайдаё луэмзэс нылпиос но, вожатойёс асьсэос но, пиналъёслэн анай-атайёссы но шӧдӥллям. 

— Улонэ пыӵатоно таӵе проектъёсты, малы ке шуоно нылпиос но выль тодмоос шедьто, асьсэлы но мае ке но выльзэ басьто, дышетӥсь шоры но мукет сямен учкыны кутско, соосты марлы ке но вылезлы дышетыны быгатӥськомы шуыса, асьмелэн дышетскисьёсмы ик ми шоры мукет синмын учкыны кутско. Мастер-классъёс пиналъёслы туж кельшизы, нуналлы быдэ соос кузьым басьтӥзы, кылсярысь, «Ура, Авылга!» тематикаен ву понон бутылка, стикерпак, футболка, изьы но мукет. Оскисько, лагерьын ваньзылы кельшиз шуыса. Котькуд нунал мар ке но выльзэ, аспӧртэмлыкозэ вайиз соос понна, со чылкак выль формат вал. Вылаз ик люкаськизы городысь бертэм нылпиос но. Анайёс но милемлы сообщениос гожъязы, мазэ веранэз, туж шумпотымон вал соослэсь умой отзывъёссэс лыдӟыны.

Зэмзэ ке верано, мыным та проект аслым но туж кельшиз. Мар ке но выльзэ тодон, выль нылпиос, выль луонлыкъёс, выль опыт со ми понна, выль малпанъёс, нылпи лагерь шоры выль сямен учкон, выль финансирование но, шуыны кулэ. Егит вожатойёсмы но вал милям, соослэн но малпанъёссы тунсыкоесь, соослэсь но ужан амалъёссэс учкиськод. Огъя вераса, сюлэммес поныса ик ужамы, — йылпумъя веранзэ Анна Смердова.

Нялтас вераса, вожатойёс сярысь вераськон потэмысь, Ӟаны шоръёзо школаын огъя ньыль вожатойёс ужазы. Пусйыны кулэ, кыкез соос пӧлысь егит студентъёс — Михайлова Дина но Ишмурзина Анастасия. Усто вожатойёсын артэ та кык нылъёс но асьсэды туж умой возьматыны быгатӥллям. Ас мылкыдзыя Дина но Настя удмурт флешмоб но малпаллям. Озьы Ӟаны школаын нылпиос котькуд ӵукна эктӥллям кык пӧртэм эктонъёсты: одӥгез «Движение Первых»-лэн флешмобез, мукетыз — удмурт эктон.

Эшшо одӥг шумпотонэз сярысь вераз на Анна Витальевна: школазылы кузьым лэсьтӥллям — ӟечыран но флагъёс сётӥллям. 

— Лагерьысь нылпиослы туж кельшиз. Малпасько, сентябре дышетскыны лыктэм покчи классъёсын дышетскись пиналъёс но талы туж шумпотозы — шуэ дышетӥсь. 

26-тӥ инвожое «Ура, Авылга!» ӵектос улсын радъяськем лагерьлэн туэ понна сменаез йылпумъяськиз. Соин валче «Сабантуй» паркын таӵе лагере ветлэм нылпиос понна нимысьтыз «Сабантуй» праздник радъямын вал. Тунсыко шудонъёс но шулдыр дискотека «Ура, Авылга!» ним улсын уонэ пыӵам ужрадъёслэн яркыт йылпумъянэз луиз. 

Огъя вераса, «Ура, Авылга!» проект туэ выльысь возьматӥз гуртъёсын таӵе шутэтскон форматлэсь кулэлыксэ но пайдазэ.