Вань южтолэзе сыӵе нунал…

Та праздник юнме шорысь гинэ тулыс куазьлы тупамтэ, дыр. Угось тулыс но кышномурт ог-огзылы туж кельшо! Нылкышно но тулыс кадь ик выль улонлы кутскон сётэ, улонэз улӟытэ, югытгес каре, яркыт буёлъёсын чебертэ.

Нылкышноос пӧртэмесь луо. Туала кышномурт — со анай но, кузпал но, мерлыко ужась но, ужбергатӥсь но, кивалтӥсь но... Огъя вераса, улонлэн котькуд ӧраз ассэ шедьтӥсь адями. Но вань соосты огазеясез но. Соос кузьмало улон, семья шунытэз но чебер сям-йылолъёсты утё. Нылкышно-анай семьяын бадӟым инты басьтэ. Яратӥсь но мукетъёс понна сюлмаськись луэмез юрттэ солы улонын кылдэм трос ужпумъёсты быдэсъяны. Корка но, юртъер но, семья но кышномурт вылын возиське, шуыны луоз. Со сяна, нылкышноослэн ужаны быгатэмзы но шааплы луэмзы бордысь потэ шаермылэн вуоноез но. Соослэн дышетон, наука, тазалыкез утён, лулчеберет, калыкез утён, вузкарон, спорт но мукет удысъёсты азинтонэ пыриськемзы мертаса быдтонтэм!

Туннэ веранмы нылкышно-дышетӥсь сярысь.

Котькинлы тодмо: дышетон удысын ужаны быгато сюлмо адямиос гинэ. Соос ӟеч валало: быдэ вуытозяз нылпилэсь пӧрмыны кулэ умой адями, тодӥсь-валась ӧнерчи. Туннэ нуналысь дышетӥсьёс дышетон сӧзнэтлэсь аръёс ӵоже кылдэм йылолъёссэ, куронъёссэ утё, со вакытэ ик выль амалъёсты, программаосты но куто.  Туала дышетӥсьлэн ужез, шуг-секытъёсыз, шумпотонъёсыз но трос мукетыз сярысь вераськимы Нелли Ивановна Понуркинаен.

Понуркина Нелли Ивановна — дышетӥсьёслэсь дано выжызэс азинтӥсь гажано дышетӥсь. Дышетон удысын ужаны кутскемез дырысен туэ 35 ар тырме вылэм ини. 35 ар ини Нелли Ивановна Ципья шоръёзо школаын ӟуч кылъя но литературая урокъёсты нуэ, со пӧлысь 14 арзэ директорлэн дышетон ужпумъёсъя воштӥсез но луэ.

— Нелли Ивановна, лыдӟисьёсмес асэныды тодматыса, вералэ вал, ку, кытын Тӥ вордскиды, дышетскиды?

— Мон вордски 55 ар талэсь азьло туж чебер Пор-Кутеш гуртын дышетӥсьёслэн семьяязы. Нырысь дышетски Ӟаны шоръёзо школаын, нош 9-10 классъёсын — Тюнтер школаын, кудзэ 1984 арын йылпумъяй.

— Кӧня ар ини Тӥ школаын ужаськоды? Ӟуч кылъя но литературая урокъёсты нуиськоды?

— 1988 арын Казаньысь педагогической институтэз йылпумъям бере лэзизы ужаны Ципья шоръёзо школае. Бадӟым, дано школаын ужаны мон понна огдыре ик данъяськымон но, секыт но вал. Нырысетӥ арысен ик уно часъёсын, бадӟым классъёсын, классэн кивалтӥсь но луыса ужан капчиен ӧз сётӥськы. Кужмо но эшлыко коллективын монэ поддержать каризы, юрттӥзы. Котьку тау карисько мон гажано наставникъёсылы Трофимов Василий Фёдоровичлы, Семовская Галина Николаевналы, Хакимова Гульшат Рашатовналы, Фазлиева Гульнура Абдулловналы.

Дышетӥсьлэсь ужзэ семьяын ӧз валалэ ке, ужаны луысал меда? Николай кузпалэ юрттӥсе но пыкетэ луиз. Соин но ужаны кутскем дырысен, 35 ар луэ ини туэ, та гуртын улӥсько, та школаын ик ужасько. Мынам апайёсы но агае котьку юртто, кенеш сёто кулэ дыръя. Соостэк нылпиосты будэтыку но туж секыт луысал. Нылпиослы студент дыръязы но туж юрттэ апае.

— Дышетӥсьлэсь ӧнерзэ быръемдылы паймоно но ӧвӧл кадь ини. Атайды Иван Дмитриевич Гришкин дано дышетӥсь вал, анайды но, Мария Семёновна, тодмо удмурт гожъяськисьлэн Г.С. Медведевлэн (со но, дышетӥсьлэсь ӧнерзэ басьтыса, ужан сюрессэ та удысын мытэм) выжыысьтыз луэ, библиотекаын ужамын шуыса тодӥсько. Озьыен, кыллы но литературалы яратон вирады пыӵамын? Яке та ӧнерез, та школьной дисциплинаосты быръёнлэн мугез чылкак мукет? Кытысен кылдӥз дышетӥсь луон мылкыд?

— Озьы, кыллы но литературалы яратон вире пыӵамын шуыны луэ. Пичи дырысен книга лыдӟыса будӥмы. Кытчы гинэ ӧз мыны, атае книга басьтыса вайыны тырше вал. 18 арес тырмемлы со мыным быдэс стопка книга кузьмаз, нимысьтыз сӥзьыса. Али но соос мынам адсконо интыын но, тодам но. Анаелэсь бертэмзэ витьыса, дораз библиотекаын книга лыдӟыса пукисько вал. Соку ик тодӥськом вал ини, тодмо удмурт гожъяськись Г.С. Медведев ӵужанаелэн выныз луэ шуыса. Солэн книгаосыныз анае тодматыны тыршиз. «Лӧзя бесмен» романэз удмурт кылын но, ӟуч кылын печатламез но вань ми дорын.

Дышетӥсь сяна мукет ӧнер басьтон сярысь ӧй но малпаськы. Ӟуч кылъя но литературая дышетӥсьмы туж усто, синмаськымон дышетӥсь вал. Казаньысь институтэз йылпумъяса ми дорын ужаны кутскем Фарида Абдулловналэн урокъёсыз али но син азям. Со милемлы пример луиз котьма ласянь. Классысьтымы ми Светлана Николаевна Кунаеваен ӵош пединститутлэн ӟуч отделенияз пыримы.

— Тӥ понна дышетӥсь луон ма со? Кыӵе луыны кулэ дышетӥсь, пиналъёслы но, ӵош ужась эшъёсызлы но адӟем карымон луон понна?

— Дышетӥсь — профессия гинэ ӧвӧл, улон амал со, малы ке шуоно тон котьку адями азьын, тон шоры нылпиос, анай-атайёс учко. Соин но лулчеберет но ӟеч сямъёс ласянь адӟем карымон луыны тыршоно.

Дышетӥсь визьмо, аслэсьтыз предметсэ, дышетон методикаез усто тодӥсь, ӟеч сюлэмо, юрттыны дась луись, азяз пуктэм ужпумъёссэ быдэстыны тыршись, зэмлыко но курон пуктыны быгатӥсь луыны кулэ. Мон малпасько, аслэсьтыд уждэ яратыса, кылкутыса быдэсъяны кулэ, котькыӵе ӧнеред луиз ке но.

— Малпасько: школаын Тӥ туж умой дышетскиды. Нош кыӵе вал Тӥляд тужгес яратоно предметъёсты?

— Школае котьку мынэме, тодон-валан басьтэме потыса ветлӥ. Тужгес но яратӥсько вал литературая урокъёсты, произведениосты споръяськыса ик эскериськом вал. История туж кельшиз, атае но историен дышетӥсь вал. Математика туж капчи потэ вал, ёрос олимпиадаосын вормисе потылӥ. Маргарита Фатыховна, математикаен дышетӥсе, али но вера: «Эх, математикаен дышетӥсь луоно вал, Фарида Абдулловна вормиз литератураеныз…»

— Уд ӧкынӥське-а, дышетон удысэз бырйиды шуыса?

— Мон шумпотӥсько, яратоно ужез быдэсъясько шуыса. Нунал потэм гурлась школае пырыса вунэтӥськод аслэсьтыд висёнъёстэ, шуг-секытъёстэ. Уроке, нылпиос доры уг яра урод мылкыдэн пырыны. Нылпиослы тодон-валан сётон понна, умойлы дышетон понна мон ноку аслэсьтым дырме уг жаляськы. Вань сюлэмме поныса ужаны тыршисько. Соин но, дыр, дышетскисьёсы шумпотто монэ олимпиадаосын призо интыос басьтыса, огъя кун экзамензэс вылӥ баллъёслы сётыса.

— Кыӵе шуг-секытъёсын пумиськоно луиськоды дышетон ужын?

— Берло 10-15 ар куспын гинэ туж уно воштӥськонъёс луизы дышетон системаын. Дышетон стандартъёс, соин валче куронъёс но воштӥськизы. Дырен ӵош вамышъяны тыршоно, котьку дышетскыны тупа. Электрон журнал сяна пӧртэм дышетон платформаос кылдыто, кытын аслыд но ужаны дышетсконо, нылпиосты но дышетоно. Нош кӧня дышетон программаос 400-500 бамъёсын, ужан программаос, локальной актъёс, планъёс, отчётъёс гожъяны тупаз ини та берло аръёсы. Та пумтэм-йылтэм уж.

— Кинъёслы Тӥ ӵектысалды та ужез? Тӥляд малпамдыя, кыӵе сямъёс кулэ дышетон удысын ужан понна?

— Вылӥынгес мон вераськем вал ини, аслэсьтыд уждэ яратыса, кылкутыса быдэсъяны кулэ шуыса. Шуг-секытъёслы но дась луоно. Кагаз уж уно, дышетскыны мылыз потымтэ нылпиез но дышетоно, ассэ умойтэм возисьсэ но ӟеч сямо адями карыса визьнодано, пӧртэм мукет ужпумъёсты но быдэсъяны тупа. Ваньмыз уг чидало, кошко. Кылё нылпиосыз, асьсэ ужзэс, коллегаоссэс, школаез яратӥсь но гажась адямиос.

— Гаджетъёсазы выем туала нылпиосты литератураен, лыдӟиськонэн тунсыкъяськытыны секыт шуиськом. Нош Тӥ кызьы малпаськоды, сокем-а со гаджетъёс урод влияние лэсьто? Яке умой палъёссы но вань-а?

— Гаджетъёслэн пайдаез но, изъянэз но вань. Нылпиос асьсэос интернет ресурсъёсын пайдаяськыса, кулэ луись информациез шедьтыны быгато, экзаменъёслы дасяськыны но луэ, котькыӵе чеберлыко произведениез шедьтыны луэ. Азьло дыре библиотекаын ӧз ке луы книга, лыдӟыны но уг луы вал. Тунсыкъяськись, дышетскыны яратӥсь нылпиослы гаджетъёс пайдаё луо. Урокъёсын но видеоматериалъёс возьматӥськом, пайдаяськиськом нимысьтыз электронной дышетон ресурсъёсын. Но котьмалэн луыны кулэ эсэпез. Куке нылпи компьютер шудонъёсын уно дырзэ ортчытэ, дорысь ужзэ кӧчыре интернетысь, соку малпаськыны но уг дышы, урокын но сак уг луы, азьтэм но луыса будэ.

— Тӥляд ужан опытты бадӟым ини. Соин быгатӥськоды, дыр, ӵошатыны, кылсярысь, 20, 10 ар талэсь азьло дышетскисез но туала дышетскисез. Вань-а пӧртэмлык? Кинлы капчигес дышетскон ласянь, Тӥляд малпамдыя, 20 ар талэсь азьло дышетскемезлы-а яке туннэ дышетскисьлы-а?

— Азьло но, али но вань тыршись, визьмо дышетскисьёс, вань огшоры школае ветлӥсьёс.  Но туала нылпиос чаль жадё, телефонэн уно дырзэс ортчыто. Лыдӟыны уг ярато, произведениослэсь вакчияк пуштроссэс гинэ лыдӟо, интернетын вань бере. Дышетскон ласянь туала нылпилы капчигес кадь потэ, малы ке шуоно пиналъёслы дышетскон понна вань луонлыкъёс кылдытэмын. Автобусэн нулло, ческыт сюдо, анай-атайёссы уно уг ужато. Ваньзы тыршыса дышетскысалзы ке, ми туж шудо луысалмы ини.

— Ӟуч кылъя но литературая дышетӥсь луэм сяна, Тӥ эшшо директорлэн дышетон ужъёсъя воштӥсез но луиськоды. Та уждылэн аспӧртэмлыкъёсыз сярысь но вералэ вал.

— 14 ар ини ужасько завуч луыса, дышетскон процессэз радъян понна, программаез быдэстон понна кыл кутӥсько. Мынам малпамея, валтӥсь ужпум школаын — нылпиослы ӟечлыко тодон-валан сётон, соин улонын пайдаяськыны но котьку аслэсьтыд тодэмдэ умоятыны дась луыны дышетон. Озьы ик умой, ӟеч сюлэмо, ужась, тыршись луыны но дышетоно. Огкылысь ужаку гинэ луэ та ужпумъёсты быдэстыны. Озьы ик дышетонлэсь ӟечлыксэ будэтон бордын ужано, егит кадръёсын ужан но татчы пыре, ӧнер устолыкъя конкурсъёсы но пыриськон. Коллективамы туж тыршись, таланто дышетӥсьёс ужало. Арысь аре «Учитель года» конкурсэ пыриськыса вормисе пото. Дасяськон понна азьвыл аръёсы вормем дышетӥсьёслэсь творческой группаос кылдытӥськом. Соос шумпотыса ӵош ужасьёсынызы асьсэлэн опытэнызы вошъясько. Берло дыре директоръёслэсь но завучъёслэсь семинаръёссэс ортчытӥмы школаямы. Ёрос олимпиадаосын но азинлыкъёсмы вань: туэ 49 призо инты луиз ини. Республикаын 8 нылпи призёр луиз. 2022 арын 11 классэз йылпумъясьёслэн ЕГЭ-я результатъёссы туж умой вал. Асхадуллина Наиля англи кылъя 100 балл люказ, историен но литератураен шор баллъя школамы ёросын нырысетӥ интыын, профильной математикаен, информатикаен, обществознаниен, физикаен — кыкетӥ интыын вал. Дышетӥсьёсмы туж тыршизы, таӵе бервылэ вутскон понна.

— Дышетӥсьёслэсь выжызэс азинтӥсьёсты сярысь но вералэ вал.

— Мынам кыкез нылпие медицина удысэз бырйизы. Шоретӥ пие кыкетӥ арзэ ужа ини дышетӥсь луыса. Ужзэ яратэ, нуназе но, ӝыт но школаын, азинсконъёсыз но вань ини. Умой дышетӥсь луоз шуыса оскисько.

— Ми но оскиськом, Г.С. Медведев бордысен кутскем дышетӥсьёслэн выжызы вуоноын но азинскоз но пушъёз, дышетӥсьлэн данэз уз ышы шуыса. Тау Тӥледлы, Нелли Ивановна, вераськемды понна, семьяяды шудбур но каньыллык, ужады выль но выль азинсконъёс но вормонъёс сӥзиськомы.

Ольга Плотникова