Вань сыӵе адями

- Люкаськонлэсь кылем мылкыдъёсты вераса быдтымон ӧвӧл, - шуиз со. - Трос адямиосын тодматскимы, вераськимы. Россилэн 39 улосысьтыз 480 делегат лыктэм вал. Озьы ик Китайысь но одӥг пи вань вал. Солэн нокыӵе акценттэк бигер кылын вераськемез паймытӥз ке, Оренбург улосын чак-чак лэсьтыса, Китае поттыса вузамез сярысь кылэм бере чылкак абдрай. Делегатъёс пӧлын кыӵе но ужен вырисьёс ӧй вал!

Азат Давлетшин ачиз но синмаськымон, аспӧртэмлыко адями. Ялан утчаське, кусып герӟа, ма ке но ужа, воштэ... Республикаысь фермеръёслэн ассоциациязы пыремез но (районысь одӥг гинэ мурт!) «бадӟым пуртыын пӧзён» понна.

«Трос пайда адӟисько, мар ке но выльзэ соослэсь кылӥсько, конкретной юрттэтсэс но шӧдӥсько», - шуэ со. Пӧртэм адӟытонъёсы пыриськемез, грантъёс басьтэмез но со юрттэтлэн бервылыз шуыса лыдъясько. Ортчем арын Давлетшинъёслэн семья фермазы, республиканской конкурсын вормыса, нырысетӥ степенё дипломен но 50 сюрс коньдонкузьымен пусйиськем.

Ужзэ валъёс, ыжъёс будэтыса вузан бордысен кутскем Азат. Туннэ нуналэ со трослы «мурегес» пырем ини. Шуг-секытъёс но кышкатӥллямтэ сое. «Гурт хозяйствоын, гуртын одӥг гинэ удысэн, одӥг гинэ ӧрен олома карыны уг луы, - шуэ фермер. - Пудо вордыны басьтӥськид ке, нырысь ик музъем кулэ. Асьмелэн кадь тросэн пудо вордӥсь районын та - самой бадӟым проблема. Милям гуртлэн мукет палаз Киров музъем кутске. Нош отын буш музъемъёс трос. Тӥни отысь 100 гектар музъемез арендае басьтӥ. Одӥг люкетаз йыды, сезьы кизисько, мукетсэ кутьы возьманы, гужем лагерь карыса возисько. Гужем кык кутьы возьмась, одӥг охранник ужа. Озьы ик турын вакытэ но вить-куать адямиез ужаны ӧтьыны тупа. Арлы быдэ Киров улосысь хозяйствоосысь 500 гектар турын будэтон музъем басьтӥсько. Турын дасяны кулэ луэм техникамы вань. Асьмелы но дасяськомы, мултэссэ вузаськомы но. Кылем арын, кылсярысь, 1700 рулон турын вузамы. Прицепен «КамАЗ» машинамы вань, гужембыт асьме вылэ тырше ке, толалтэ хозяйствоосын ужа. Кылем арын нош одӥг трактор басьтӥмы. Техникатэк уг луы. Пудолэсь лыдзэ но будэтыса мынӥськом».

Гурт пумысь буш интыез оформить карыса, Давлетшинъёс гидъёс лэсьтӥллям. Ыжъёслы, валъёслы шуэм карда но отчы тэрем. Куинез огпӧртэм, бадӟым ангаръёс «тырмемын» ини. …жытак палэнэгес ньылетӥзэ лэсьтӥллям. Соиз турын склад луоз, калаен шобыртонзы гинэ кылем.

Туннэ соослэн 50 йыр валзы (тросэз сӥльлы вордэм, кыкез - ворттылон), 200-лэсь уно ыжъёссы вань. Марат пизы сюро таза пудо вордонэн выре. Лыдъян-чотан ужъёсты Зульфия быдэсъя. Казаньысь «Агропромпарк»-ын точказы вань, Резида нылзы отын вузаське.

«Агропромпарк»-ын одӥг точка кылем арын мае ик сётӥллям вал, - шуэ Азат. - Сӥзьылозь изъянэн ужаз. Озьы но тазьы гинэ чидамы ини. Табере тани уж умой мынэ. Арнялы вить ошак, одӥг толэс сӥль вузаське. Шонер, куд-ог нуналъёсы вузаськыса уг быдмы, собере соослэсь казылык лэсьтытӥськомы. Со но ӝог вузаське. Асьмелэн клиентъёсмы но вань табере. Суббота-воскресеньее Резида гинэ вузаськыны уг вутскы, одӥг вузкарись юрттэ. Азьлогес дорысь пудоосты но асьмеос гинэ сюдӥмы ке, табере вутскыны уг луы, кык ужасьмы вань... Туэ казылык лэсьтон понна мини-цех усьтыны малпаськомы».

- Ужаны кутскон понна умой луиз ке но, ыж вордон пайда сётӥсь удыс ӧвӧл ук, малы со борды басьтӥськиды? - юасько Азатлэсь.

- Ми пудоез сӥльлы шуыса вордӥськомы, Курбан праздниклы трос куро, 80-120-зэ вузаськомы. Вордон понна юаса лыктӥсьёс но трос, али асьмеос лыдзэ будэтӥськомы. Шонер, ужаны кутски но - узырми шуыса малпад ке, туж янгышаськод. Кредитъёстэк улыны уг луы, государство но юрттэ, сюресэз тупатъязы, субсидия сётӥзы, грант басьтӥмы... Ужаку шуг-секытъёс, могӟетъёс кылдо ини со, киостэ лэзьяны гинэ кулэ ӧвӧл.