Хезмәт

Виталий Борисов — «Алга» обществоысь адӟем карымон механизатор

Кин умой ужа, со интыяз уг сылы, сыӵе адямиосты уж ачиз шедьтэ шуо. Та кылъёс туж тупало «Алга» обществоын ужась, Гондыргуртын улӥсь Виталий Владимировичлы.

Борисовъёслэн семьязы гуртын туж гажамон семья. Трос аръёс ӵоже гурт удысын тыршемзы но таукарымон, али дыре ужась егитъёс понна зэмос пример но луо соос.

Виталий Владимировичез ӝыт гинэ «кутыны», соин вераськыны быгатӥ — соку но со бусыысь ужаса бертэм гинэ вал. Механизаторъёслэн ужзы сыӵе шол — куддыръя уйин гинэ ужзэс йылпумъяса быдто но доразы берто, гужемзэ веранэз но ӧвӧл.

Пичи дырысеныз Виталий Владимирович техника борды кыстӥськем, музъем ужъёсты матын карем. Атаез сьӧрысь кыльытэк, гужемъёссэ бусыын ортчытэм: кык гужемзэ комбайнёрлэн юрттӥсез луыса ужам, нош 11-тӥ классэ йылпумъямез бере, праволы дышетскыса, ачиз но комбайнэн ужаны кутскем ини.

— Атае мон понна зэмос пример луиз шуыны кулэ. Со гумырзэ колхозын ужаз. Бригадир но луиз, фермаын но ужаз, отысен со дано шутэтсконэ но потӥз. Ачим но атай кадь бусы ужъёсы кыстӥськи. Комбайнэн ужан сезон йылпумъяськем бере, ДТ гусеничной тракторе пукси. Ас дыраз котькыӵе ужъёсты но ужай: куро кыски, бусы усыяй, бусыысь картофка но нуллӥ, гырыса но ветлӥськиз... Армие кошкытозям али «Белорус» тракторен но ужаны вутски. Ярак-Чурма, Гондыргурт, Бадӟым Лӧзя II люкет гуртъёсы нянь нуллӥ, — маде Виталий Владимирович.

1995-тӥ арын воргорон армие служить карыны кошке. Хабаровск улосын кык ар ӵоже аслэсьтыз дано ужпумзэ быдэстэ но 1997-тӥ арын вордскем палъёсаз бертэ. Ӧжыт улыса, 1998-тӥ арын, Балтасьысь РОВД-ын контролёр (охранник) луыса ужаны кутске. Татын кема уг ужа, шабашничать карыны кутске. Нош 2006-тӥ арын со выльысь «Алгае» ужаны берытске.

— «Алгаын» ужаны кутскыкум мон кузпалъяськиськем вал ни (нялтас вераса, кышноез но, Лариса Борисова, «Алга» обществоын учётчик луыса ужа — Н. Ж.). 2002-тӥ арын Таня нылмы вордскиз. Соин яна потоно каримы. Вераны кулэ, колхоз шӧдскымон юрттэт возьматӥз корка пуктыкумы но. Тӥни со дырысен, дас ньыль ар ӵоже, татын ужасько ни, — вера механизатор.

ДТ тракторен ужаны кутскем воргорон «Алга» обществолы тодмо адями луэ ини, соин солы котькыӵе ужез кышкатэк оско. Туннэ нуналэ ДТ тракторен сяна, «Белорусэн» но ужа. Тулыссэ кизён ужъёсын тырше, кизён йылпумъяськем бере механизаторез яд кисьтаны лэзё. Толалтэзэ кыед куя. Ремонт ужъёсты но Вылын Шубан гуртэ ветлыса механизаторъёс асьсэос быдэсъяло. «Шутэтскыны дырмы ӧвӧл, — серекъя Виталий Владимирович. — Вылаз ик егитъёс но ӧвӧл, соин тани кык техникаен ужаны тупа. Ђожтӥськыса уг вераськы, ужме яратӥсько. Бригадирен но, инженерен но, агрономен но кусыпъёсмы умой. Дыраз пӧсь сиён вайыса сюдо. Уж шоры учкон сыӵе чыры-пырыослэсь кылдэ ведь со».

Ини ньыль ар радысь Виталий Владимирович Азьмынӥсьёслэн слётазы но ӧтиське. Азинлыко ужамзэ адӟо, кулэезъя дунъяло но.

— Шумпотӥсько, конечно, азьмынӥсьёслэн радазы луыны быгатӥсько шуыса. Вутскем вормонъёсты ыштытэк, озьы ик азьланяз но ужаны мед кылдысал. Гуртын ужан ноку но капчи ӧй вал. Толэн-гужемен шутэтсконэз адӟымтэ дыръёс но луыло. Нош кытын ке но ужаны кулэ. Ми ведь пичиысен ужаса будэмын, ужлэсь ум кышкаське. Школаын дышетскыку ик картофка, чукиндэр люканы ветлӥськом вал. Атае сяна, колхозын выны но ужаз, Николай агае туннэ нуналэ но тракторен ужа, — шуэ Виталий Владимирович.

Зэмзэ но, Борисовъёслэн семьязы «Алга» общество понна кемалась тодмо семья ни. Виталий агайлэн атаез, Владимир, татын ужаса дано шутэтсконэ потӥз ке, агаез Николай али но тырше — тракторен ужа. Нялтас вераса, Николай агайлэн но азьвыл аръёсы Азьмынӥсьёслэн слётазы ветлэмез вань. Соин старшой Борисовъёс но музъем ужанын бадӟым опытэн, соос сярысь нимаз статья гожтыны малпанэ но вань. «Кутыны» быгатӥ ке...

 

Реклама

Район тормышына кагылышлы иң мөһим яңалыкларыбызны Балтаси_Хезмэт телеграм каналыбызда да укыгыз.

Иң мөһим һәм кызыклы язмаларны Татмедиа Telegram-каналында укыгыз


Нравится
Поделиться:
Реклама
Комментарии (0)
Осталось символов: