Визян дыр — лулэз но йырез чылкытатон вакыт

Котькуд калыклэн осконэз аслаз. Огзэ но со осконъёсты курласа, ултӥяса верано ӧвӧл. Оскон адямилы лул кужым сётэ, улонзэ пуштросо каре но шуг-секытъёс дыръя пыкет луэ. Осконэзлы луыса адями кышкыт малпанъёслэсь но куштӥське, калык понна трос пайдаёзэ но лэсьтыны кутске. Ваньмыз лулпушкысь но йырысь потэ. 

Котькуд аре кӧсутёнлэн кутсконэз но пумыз пӧртэм дырлы тупа. Со Акашка праздникез пусъёнэн герӟаськемын. Быдӟым кӧсутён 48 нунал кыстӥське, 7 арня. 2024 арын со 18 южтолэзьысен 4 куартолэзёзь кыстӥськоз.

Кӧсутён кык люкетлэсь кылдэ: нырысетӥ 40 нуналэз — Святой Четыредесятница, Акашка азьын берпуметӥ арняез — Страстной Седмица. Тужгес но чурыт куронъёс кӧсутёнлэн нырысетӥ, куинетӥ но берпуметӥ, Страстной, арняосаз. 

Кӧсутёнлэн котькуд арняезлэн аслаз нимыз но аспӧртэмлыко пуштросэз.

1-тӥ арня — Православиез сӥлы карон. Та арняе православной обросъёслы пумит нюръяськисьёсты вормонэз тодэ ваё. VIII дауре обросъёсты сӥлы каронэз алӥзы, черкъёсын но обросъёсты быдтыны кутскизы. Та нюръяськон кыстӥськиз 100 ар пала но солы пум понӥз императрица Феодора Константинопольская, кудӥз выльысь ӝутӥз черкъёсын обросъёслэсь интызэс но кулэлыксэс.

2-тӥ арня — Григорий Палама Святительлы сӥземын. Солэн бадӟым ужез но православие понна туж дуно. Со Инмар но адями кусыпъёсты валэктӥз. Черк сое богословской споръяськонъёсын аслаз дышетонэныз вормемез понна сӥлы каре.

3-тӥ арня — Крестопоклонной. Кӧсутёнлэн шорез шуыса лыдъяське. Христианъёс понна Кирос — осконлэн одӥгез валтӥсь тодметэз луэ. Кӧсутёнлэн та вакытэз но Кирослы йыбырттонлы сӥземын.

4-тӥ арня — Преподобной Иоанн Лествичникез сӥлы каро. Та вӧсьмуртлэн улонэз вылын христианъёслы возьматэмын, кызьы улыны кулэ кӧсутись но духовной адями. 

5-тӥ арня — Преподобной Мария Египетскаяез буре ваё. Та вӧсьлыко кышномуртлэн примерез возьматэ, кызьы кужмо осконъёсын пачылмем кӧсутён быгатэ адямиез калгись улонлэсь палэнтыны.

6-тӥ арня — Христослэн Иерусалиме пыронэз, ваий арня (Пучыарня). Ваий — со мукет сямен вераса, пальмалэн вайёсыз, кудъёсыныз Христослэсь Иерусалиме пырон сюрессэ шобыртӥзы. Мукет кунъёсын пальмалэн вайёсыз интые пучы вайёс тодмет луизы. Пучы — оскисьёслэн улоназы кӧсутён дыре кыкетӥ бадӟым тодметэз.

7-тӥ арня — Страстной седмица. Та арняе христианъёс Иисус Христослэсь берпуметӥ нуналъёссэ, курадӟонъёссэ, кулэмзэ но ватонзэ тодазы ваё. Берпуметӥ арняез кӧсутён понна эшшо но кылкутӥсь луэ: адямилэн 7 арня ӵоже воштӥськем малпанъёсыз но мылкыдъёсыз адямиез лябӟытыны но умоятыны кулэ.

Православиын тужгес валтӥсь праздникъёс азьын котьку кӧсутён мынэ. Котькыӵе осконэз басьтӥм ке но, отын вань малэсь ке куштӥськон, палэнскон. Быдӟым кӧсутёнлэн пуштросэз — мугорез но лулэз урод мылкыдъёслэсь но малпанъёслэсь чылкытатон. Чурыт диета кутон, вӧсяськон, кӧтӝожъёслэсь палэнскон, тушмонъёсты жалян, вожъяськонлэсь но вожпотонлэсь куштӥськон — ваньмыз та адямиез вуттэ умой лулчеберо (духовной) мылкыдэ. Сыӵе югдуре вуттыны тырше вал Инмар котькуд адямиез но, валэктыны, со понна аслэсьтыз пизэ но курадӟонъёс пыр поттӥз. Ваньмыз огшоры калык понна. Макем бадӟым Инмарлэн кужымез, солэн медонъёсыз, ваньзы тодо, но тросэз уг валало солэсь зэмос ужпумзэ.

Быдӟым кӧсутён — христианъёс понна туж кылкутоно вакыт, ку адями ассэ эскере но дышетэ. Та дыре сиёнлэсь гинэ уг куштӥсько, озьы ик улонысь каньыллыкъёслэсь (удобства) но палэнтӥсько. Соос интые лулчеберо дунлыкъёслы тросгес саклык висъяны кутско. 

Малы тужгес саклык висъяно та вакытэ? Кызьы секытъёслэсь куштӥськоно но астэ Инмарлы матынгес кароно? 

Котькуд адями улоназ пумиське таӵе кылгерӟетъёсын «тон сое мон понна лэсьты», «анаед/атаед понна». Та кылгерӟетъёсын асьмеос нимысьтыз тодметъёслэсь но ужъёслэсь кылкутӥсь но кулэ луэмзэс тодмостӥськом. Инмарлы оскись адямиос туж вылӥ дунъяло Мозмытӥсьлэсь лыктэмзэ но солэсь аспӧртэмлыко подвигзэ. Соин «Инмар понна» кылгерӟетэн асьмеос Инмарез яратон мылкыдэз возьматӥськом. Инмарлы асьмелэн сӥльлэсь куштӥськеммы кулэ ӧвӧл, вань сиён-юон Инмарлэсь сётэмын но адями понна пайдаё луэ. Татын тодэ вайыны кулэ Христослэсь кылъёссэ «... Номыре, мар адями пушкы палэнысь пыре, сое саптаны уг быгаты; но, мар потэ адями пушкысь, со сапта ассэ адямиез» (Марк, 7:15).

Кӧсутён валтӥсь ужпумез — тырмымтэосмес но лябӟонъёсмес быдтон. Сьӧлыкам бере адямилэн лулэз но мугорез люкиське кадь. Соос нош ик огазе мед луозы шуыса, трос кужым пононо. Мугормес кӧттыро но ческыт сиёнлэсь висъяса, асьмелы сюлэмен кивалтыны дышетсконо: алдаськонлэсь, супыльтонлэсь, пыкылонлэсь, вожъяськонлэсь но керетонъёслэсь куштӥськыны. 

Ма сётэ асьмелы кӧсутён?

Нырысь ик кӧсутёнлэн бадӟым ужпумез — оскон сётон. Адями улонзэ чылкак воштыны, умоятыны быгатоз шуыса оске. Кылсярысь, кулэтэм маке понна сюлмаськонэз лыдэ басьтытэк улыны, дырез дунъяны кутскон, трос телевизор/интернет сьӧрын пуконлэсь палэнтӥськон, мугорез физиологической паласен чылкытатон. 

Кӧсутён кутскон азьын адями аслыз кыӵе ке но ужпум пуктыны кулэ. Та вакытэ адями урод сямъёсызлэсь куштӥськыса, умойзэ басьтэ. Зэмзэ вераса, адями огшоры дыре но тазьы улыны кулэ, дыр, но улонмылэн туж ӝог быземез но дыртэмез куддыр адямилэсь саклыксэ лябӟытэ. 

Кӧсутён — со аспӧртэмлыко инструмент, кудӥныз асьмеос чебертӥськом лулмес. Сыӵе инструментэн лул «бакчаез» утялтоно но чебертоно. Ужпум сиён-юон бордын ӧвӧл, валтӥсез — улонэныд кивалтыны дышетскон но улонэдлы кузё луон. 

Тазалык понна но кӧсутён трослы пайдаё луэ

Куд-ог адямиос анализъёссылэсь умой луэмзэс синйылто, нимысьтыз вирын сакыр кулэсмемзэс верало. Та физической тазалык сярысь верано ке. Нош лул тазалык сярысь ке верано, татын адямиос эмоциоссэс, мылкыдъёссэс но шӧдонъёссэс чакланы кутско, матысьёсынызы кусыпъёссэс тупато, семьяязы тынӥсь улон радъяськыны кутске. Эмчиос но верало, вань психологической шугъяськонъёс пуш дуннеен но малпанъёсын герӟаськемын шуыса. Соосын кивалтыны ӧд ке дышетскы, куддыр ачид аслыд но кӧшкемыт потӥськод кадь. Со уг быгаты адямиез воштыны, выльдыны, соин кӧсутён — со Инмарлэн юрттэт сётэмез кадь.

Кыӵе мылкыдэн ортчытыны кулэ та нуналъёсты: дорын пуконо, нокытчы ветлытэк, огинэ...

Кӧсутёнэ капчи мылкыдын но шумпотыса пыроно. Та вакытэ ӝожмыт мылкыдэн пачылмоно ӧвӧл. Но со дыре ик адями улонзэ калыклэсь кӧня ке ватыны кулэ, калык азе поттытэк, ушъяськытэк. Валтӥсез — кӧсутёнлэн бервылыз. Кӧсутён дыр — лулпушлэн тулысэз кадь: адями шумпотэ улоназ воштӥськон но выльдӥськон вакыт вуиз шуыса.

Шулдыръяськонъёс сярысь верано ке, татын черк кыӵе ке алонъёс уг пукты. Но сыӵе шулдыръяськонъёслэн пуштроссы лулчеберлыко луыны кулэ. Куддыр адямилы зэмзэ ик кыӵе ке капчиятон яке буйгатскон кулэ луэ. Учконо арберилэн пуштросэз луллы пайда вае ке, со умойлы гинэ. 

Огъя вераса, арлэн самой шуныт но чебер вакытаз христианъёслэн валтӥсь но кылкутӥсь дырез кутскиз. Вань православной калык понна сяськаяськись но тужгес матын луись вакыт. Котькуд адямилэн, кӧсутён кутэ-а со уг-а, лулэз мед чеберскоз но мед выльдӥськоз, нош сюлэмез но малпанъёсыз мед чылкытатскозы!