Война дыр нылпиос

Война дыр нылпиос —

Пинал дыр тодымтэ экеос,

Синмады на ялан пуштылэм.

Кышкытын улӥды,

Ваньды ик ӧд но чидалэ тӥ,

Поттурын курытты весь улэ ымады.

Война дыр нылпиос, тӥ сютэм улӥды...

Светлана Сирена

Дыр асьмеды кыдёке но кыдёке нуэ гудырес война аръёслэсь. Туэ 9 куартолэзе странамы гитлеровской Германиез вормемлы 75 ар тырмонэз пусъёз. Макем мургес учкиськом со аръёсты, сокем яркытгес адӟиськом советской калыклэсь асьме Родинамы понна фашизмлы пумит лек ожъёсын геройлыко нюръяськемзэ. Быдэс дунне тау карылӥз но тау карылоз калыкмылэн батырлыкез, чидамез понна.

Война — адямилэн улоназ тужгес кышкытэз кыл. Кӧня курадӟонъёс, люкиськонъёс вайиз со. Кӧня синкыли кисьтэмын вал похоронка гожтэтъёсын — тодмотэм почеркен гожтэм куинь сэрего гожтэтъёсын. Война — со анайёслэн курадӟонъёссы, миллионъёсын кулэм солдатъёс, лагерьёсын сюрсъёсын курадӟытэм, вийылэм адямиос, со миллионъёсын сӧриськем улон сюресъёс. Со быдэсмымтэ малпанъёс, шудо улонлы кысэм осконъёс. Со матысь муртэдлэсь берпуметӥзэ киоссэ кутон, чупан, ваче син учкон. Со лек кезьыт, кӧшкемыт сютэм улон, вир но кулон. Со шимес. Мӧйы калыклэн сюлэмаз та кыл — бурмонтэм яра.

Ма асьмеос тодӥськом война сярысь, кызь одӥгетӥ даурын улӥсьёс? Кытын вал лек ожмаськонъёс, табере писпуос будо, тулкымъясько бусыос, лэсьтылэмын городъёс. Укыр ик секыт вал та дыре пичиослы. Соослэн пинал дырзы берытсконтэм кошкиз-лобӟиз, лыктӥзы висёнъёс, сюлмаськонъёс-тэльмыронъёс, матысь ӵыжы-выжыостэ ыштылонъёс. Война сӧсыръя ненег пинал лулъёсты, улонысь трос ӟечсэ нуэ. «Ми выжымыя войнаысь» — шуо соос, кинъёслэн пинал дырзы секыт война аръёслы тупамын, куке кулон капчигес вал, улон сярысь.

Пичи дыръям мон ноку ӧй малпалля мынам ӵужанае Сергеева Ольга Николаевна сыӵе кужмо, кышкасьтэм, жугиськон вакытэз адӟем адями шуыса. Жаляса верано, со милемын кемалась ӧвӧл ни. Ини быдэ вуыса, мон семья архивысь Сизнер гуртлэн историез сярысь альбом шедьтӥ. Отысь вашкалаос, война дырысь пиналъёс сярысь трос тунсыкозэ, пайдаёзэ тодӥ. Озьы мон война шоры мукет синмын учкыны кутски, ачим но со дырысь пинал кадь потыса.

Тани ма гожтэм анай со альбоме ӵужанаелэн верамысьтыз:

«... Кожаськом вал, шудлэн пумыз но уз луы кадь — кутскиз со ас веранзэ. — Ми тыр семьяын улӥмы, кытын яратон, ог-огедлы юрттон, гажан кузёяськылӥзы. Ваньмызлы война люкетӥз. 24 толшоре 1942 арын атаймес войнае басьтӥзы. Картэзлэн кулэмез сярысь гожтэт басьтэм бере, анай йырсазьзэ ыштэ. Со кужмо висьыны кутске, валесысь уг ни вырӟылы. Секыт висемез бере, 1945 арын инвожо толэзе анай кулэ. Ми, пиналъёс, анай-атайтэк кылимы. Куать ӵошен, ваньмы нылъёс. Бадӟым апаймы (Зинаида) быземын ни вал. Со нимаз улӥз. Таза мугоро, кужмо нылкышно луэмысьтыз, сое жалятэк, воргоронъёсын ужато. Фронтэ окопъёс гудӟыны нуо, отысь кынмыса черломыса бертэ. Дорын астмаен висьыса кулэ, гумырыз вакчи луэ. Матрёна апайлы 17 арес, Анастасиялы 18 арес. Анай-атаймы интые Катерина апаймы кылиз — солы 19 арес. Секыт ныпъет усиз егит мугор вылэ. Покчиезлы, Надялы, 7 арес вал...» Одӥгез ныл — мынам ӵужанае — Ольга. Солы 12 арес.

Анайзы секыт висемысь, нылъёслы пичиысен ик ужано луэм. «Катерина апай дас кык аресэн ини мӧйыосын ӵош бусые араны потэ. Нырысетӥ классын тодон-валан люкакуз, сизьым аресэн, черсыны дышетскиз, кукыз черсӥськон колёсае мырдэм сузьыса. Со колёсаез атай ачиз лэсьтӥз но нылызлы кузьмаз. Атаймылэн киыз зарни вал. Колёса кема ужаз на. Дас кык аресэн куиськыны кутске, дышетскыны мынытозяз етӥнэз радъя вал. Дэремлы, айшетлы шуыса, дэра куылӥм. Кутъёс но куталлямы, каб шуккылӥм. Екатерина ньыль классэз гинэ быдтӥз. Со ӝог валаз дышетскон материалэз, лыдӟоз но учкытэк вералоз вал. Быгатонлыкез, йырвизьмыз кужмо вал, но дышетскыны, улон начарен, луонлык ӧз луы.

Монэ но покчи Надя сузэрме Смаильысь нылпи юртэ интыязы. Ми отысь пегӟыны быгатӥмы, собере ӧм ни берытске. Надимес Чочоковъёслы утялтыны сётӥзы. Мон дорын Катя апаен кыли. Вазь ужаны тупаз. Бадӟым апайёсын ӵош бусые уриськыны ветлылӥ. Кык класс гинэ быдтӥ мон. Асме сюдон понна, дышетӥсьлэсь нунызэ возьмай. Ӧжытак будэм бере, ыжъёсты сюдыны, толэсъёсты возьманы юрттылӥ. Пумен ачим фермаын ужаны но кутски. Валъёсты сюдӥ, соосын ветлыны дыши. Ачим ик толэсъёсты дышетылӥ. Бусые валэн ву нуллӥ, плугарист но вал. Жугиськон дыръя но, собере но туж секыт вал: уйин лушкем пулы ветлылӥм. Кот пуэз эстэмлэсь азьло куасьтоно, путылоно вал. Куроен но эстылӥм. Толалтэ пӧзьтэк ки кынмылӥз. Соку трос вал сютэм кионъёс. Соос гурт кузя но сиён утчаса ветлылӥзы. Пуны каръёсы, ыж гидъёсы пыраллязы. Кышкыт аръёс вал, ишан-тушмонэд но медаз адӟы сое.

Толалтэ Шемордан нюлэскы нюлэс кораны лэзьяллязы. Шемордан дорозь пыдын ветлӥм. Корам пумес нюлэскысен сизьым иськем станцие поттылӥм. Валъёс уг тырмо, асьмеос ик дӧдьы кыскамы. Сиён дорысь мар вань сое нуллӥмы, кезьыт, кын сиён сиыны тупалляз. Жадем, ӝыныя сютэм, тыр изьымтэос мукет нуналаз нош ужаны потылӥм. Уйин дас кык часын выдылӥм, куинь часын сайкаллямы. Пыдамы кесяськем кутъёс гинэ кыльылӥзы. Воргоронъёсты ваньзэс фронтэ басьтӥзы, гырыны-кизьыны нылкышноослы, мӧйыослы но пичиослы кылиз. Валъёс луымтэен, ошъёсын гырылӥм. Малмыжысь сюкась но ошъёсын нуллӥм. Валэз но, ошез но ӧз ке луы, соос интые геры борды нылкышноос султӥзы: куинез азьын, куинез сьӧрын. Ӵукнаысен ӝытозь пужалляськыса ужамы. Гужем — бусыын, толалтэ — нюлэскын. Дорын но ужано вал, фронтэ куасьтэм картофка дасяно. Йӧл, вӧй но дасяно вал. Мар быгатӥм, ваньзэ фронтэ келяллямы. Асьмелы мар гинэ кыльылӥз меда! Тросэз пиналъёс вазь ужаны кутскизы. Пиос дас аресэн валэн ужаллязы. Кизён дыръя уробоен бусые тысь нуллӥзы, толалтэ кыедэз но салазкиен поттылӥзы.

Сиён ласянь туж начар вал. Нянь пыжыны пызь ӧй вал. Поттурын бичаллямы, куасьтылӥм, изӥмы. Сое чуньыбыжен сураса, нянь пыжылӥзы, со скал табаньлы кельше вал. Сютэм но кулӥсьёс луизы. Куддыр поттурынэз бичаны ӧз лэзьылэ. Колхоз тӧро бичам поттурынэз басьтылэ вал, сюло но йӧттылэ вал. Воргоронъёс немецъёсын жугиськыку, со нылкышноосын «ожмаськылӥз». 90 оже кошкем воргоронъёс пӧлысь, ӝыныез мында ож лудэ кылизы. Соослэн нимъёссы пырак сюлмамы кылёзы».

Ӵужанаелэсь тани таӵе верамзэ лыдӟи мон. Мыным сыӵе жаль потӥзы война вакытысь нылпиос. Мон данъяськисько соослэн лул кужыменызы, чиданлыкенызы. Вань секытлы, курадӟонлы, кулонлы пумит султыса, соос чидазы, соос уло асьме сюлмамы. Асьмеос быгатӥськом соосын данъяськыны.

Соос пусъемын орденъёсын но медальёсын. Соос, война вакытысь пиналъёс, будыса, выльдӥзы, ӝутӥзы куашкатэм городъёсты но гуртъёсты, заводъёсты но фабрикаосты, вӧлдӥзы чугун сюресъёс...

Асьмелы соос война сярысь вераллязы. Валамон, секыт выльысь бурмем сюлэм яраез йӧтылыны.

Асьме странаын вань сыӵе нунал, куке быдэс дунне улӟе шундылы но пальпотэмлы шумпотыса, адямиос ог-огенызы агай-вынъёс кадь пумиськыло, пурысьтам йырсиё ветеранъёс синкылизэс ватытэк бӧрдо. Матынъяське калыклэн дун-чылкыт нуналэз, куке асьмеос тодэ вайиськом бадӟым дун тырыса Вормонэз басьтӥсьёсты. Тодамы вайиськом ваньзэ, ма герӟаськемын со ньыль секыт война аръёсын.

Мария Васильева

Ципья шоръёзо школаысь библиотекаен