Яратоно гуртмы мед улоз!

Тросэзлэн оскись муртъёслэн Йӧвылэсултон нырысь ик герӟаськемын нимысьтыз дасям купельёсын яке люкмесъёсын пыласьконэн. Та нуналэ вань ву дун-чылкыт луэ но висёнъёсты но эмъяны быгатэ шуыса лыдъяське.

Йӧвылэсултон пыласьконъёсы дышем сямъя пырисько алыдоос но,  нылпиос но. Ваньмыз, ма куке но вал вунэмын, туннэ нуналэ каллен улонамы берытске.

Отец Георгийлэн тыршеменыз сыӵе умой сям берытскиз милям Вуж Кушкет гуртамы но. Бадӟым тау карем потэ Павлов Сергейлы, йӧэз лымылэсь сузямзы, йӧлэсь лэсьтыса кирос пуктэмзы, дӥсь воштыны будка лэсьтэмзы но купель дасямзы понна. Кӧня адямиос отын пыласькыны но Инмарлэсь ӟечсэ шӧдыны быгатӥзы.

Вашкала дыръёсы Йӧвылэсултон нуналэ луэм валэн ветлон сям но. Валъёслы поно вылэм самой чебересь сӥесъёс, ошыло жингрес гырлыос.

Ми но быгатӥмы вашкала дыръёсы берытскыны – тодэ вайыны шулдыр нискыланъёсты, мызган улсын кырӟанъёсты, эктонъёсты. Шулдыръяськонъёс бере гурт клубен кивалтӥсь Щербакова Светлана Петровна радъяз самоварысь ческыт чай юон, табань но луиз. Бадӟым тау верам потэ ваньзылы, кин пыриськиз та синмаськымон праздникез дасянэ но ортчытонэ.

Ма понна мон яратӥсько ас гуртме? Огшоры яратӥсько, со сюлмылы дуно но мусо луись музъеме, отын мон вордски, отын уло мынам ӵыжы-выжыосы но эшъёсы.

Мынам гуртам адямиос ас удмурт калыкезлэсь сям-йылолъёссэ утьыса уло. Соин ик мон данъяськисько но яратӥсько ас гуртме но отын улӥсьёсты.

Та чылкыт но сайкыт праздник. Солэсь сямъёссэ выжытыны кулэ поколениысь поколение, яратоно гуртмы мед улоз шуыса!

Ольга Николаева

Вылын Ушма покчиёзо школаысь дышетӥсь