Мынам анае, аныкае!

Анае, мусое, та беромем чуръёсме тыныд гожтӥсько. Та югыт дуннеысь тон кемалась кошкид ке но, мынам но мукет пиналъёсыдлэн сюлмысьтыз ноку уд ышы, уд вуны! Макем тон ми понна дуно луэмед ачим анай луэме бере гинэ валай. Тон луэмен ми  вань! Пумтэм пунэмо ми ваньмы тон азьын, мусо но дуно анае! Мӧзмытэ тынад либыт куараед, небыт киосыд но куараед.                                                                                             

                                                                               Ми ик васькиськом  кузь урам кузя

                                                                               Жильтыртӥсь емыш но сиыса.

                                                                               Жильтыртӥсь емыш дуно ик  ӧвӧл

                                                                               Анаен- атай туж дуно.

Та чуръёс ӝӧксьӧр калык кырӟанысь басьтэмын. Нош котькуд адями   аслаз анай- атаез  сярысь   тазьы вералоз шуыса оскисько. Мынам анае Щербакова Евдокия Александровна вал. Туж секыт висён  югыт дуннеысь сое вазь нуыса кошкиз. Солы 63 арес гинэ вал али.     

Мусо, дуно но яратоно анайме ноку но сюлэм уз вунэты. Котьку солэн  куараез, небыт киосыныз вешамез, ужаны дышетэмез мынам сюлмам улоз. Анае  куинь аресэн сирота кылем. Солэн анаез кулэ соку.  Сюранай  будэтэ сое. Атаез   нылзэ куштыса  Огырӟи каре кошке. Анаелэн верамез вань таӵе учырез: бадӟымъёсын ӵош бусые ужаны мынӥ но нуназеяны бертӥ, адями бертэмысь гинэ. Дорамы ог шорем няньмы но ӧй вал, пе. Ву юыса, нош ик сютэм вылэ ужаны кошки шуэ. Кыӵе гинэ шуг-секытъёсты адӟымтэ ини со! Анай шуэмез потэм дыр - нокинлы вазиськыны! Озьы ортчем пичи дырыз но, пинал дырыз но, вань гумырыз. Ми, вань сизьым нылпиосыз, ӵужанай шуыны тэльмырим. Ӵужатай ми вань шуыса ӧз ик тоды лэся. Мон куатетӥ классын дышетскыку, ӵужатай бертыса кошкиз ми доры…Арган шудэмъяз ми эктӥм капка выжыын. Со гинэ кылиз мынам йырам.

Мынам анае ноку улонлы ӝожтӥськыса ӧз улы. Котьку ми понна сюлмаськиз, ваньместы ӟеч адями  кариз, улонысь интымес утчаса шедьтыны юрттӥз. Пичи дырме тодам ваисько ке, котьку солэн дышетыса верамез тодэ лыктэ: корка пушмес чылкыт возе, ог-огдэс эн вунэтэ, муртлэсь номырзэ но юатэк басьтоно ӧвӧл но мукет…Соин ик вань нылпиосыз     туж  визьмоесь луизы  шуи ке   уг алдаськы мон.

Анае  быдэс юртысь лэсьтӥськон ужъёсты  но пиосмурт интые ачиз умой валаса нуиз. Пул кулэ-а, кортӵог-а кулэ со ваньзэ ик ачиз тодэ вал  кудзэ но малы басьтыны. Катие, шуоз вал анай мон лыктэм дырысь весь лэсьтӥськон уж нуисько. Огзэ ӝутӥсько но мукетыз куашка. Озьы милям анай муртлы адӟем карымон улӥз ас гумырзэ. Милемыз,  сизьым кузя    нылпиоссэ, туж чылкыт, чебер  дӥсятыса ветлытӥз. Гурт калык но сое котьку макта но гажа вал. Со доры кенешен но пунэмен курыны     ветлӥзы. Огзэ но буш уг лэзьы вал со. Кулэм  бераз но гурт калык   жаляса    но шуныт кылъёсын гинэ тодаз вае мусо но дуно анаймес. Нош милям сюлмын со котьку улэп!        

Анае, аныкае! Тон ми понна -

Инмын пиштӥсь кизили.   

Нылпиосыдлэн улоназ

Со кизили – сюресчи.

Шундыен ӵошатысал мон

Визьбуро аныкайме.

Музъеме вуэ ӟардон     

 Адӟисько кадь анайме.  

Улон    сюресэд, анай, 

Шагырес вал но секыт.

Нош сюлмыд тынад, анай,

Зарни вал но туж небыт.

Сизьым  нылпи будэтӥд

Шудо луид оло ӧд!

Нылпиосыд  уждэ азланьто

Со луэ дыр ни  - шуд!

Пумтэм тау тыныд, анай,

Улон сётэмед понна.

Та улонэз ортчыны

Визь – кенеш сётэм понна.

                              Иванова Екатерина Денисовна

15.11. 2017 ар