Җитезрәк, биегрәк, көчлерәк!
Быел да арборлылар гөж килеп көч сынашты: мини футбол, хоккей, волейбол ярышларыннан, кышкы кросс, «Тау бәйрәме»ннән берәү дә читтә калмады.
Укучылар һәм яшьләр генә түгел, әти-әниләр, олы абый-апалар да сынатмады, көндәлек мәшәкатьләрне бер читкә куеп, чараларда актив катнашты. Моның шулай икәнен күрсәтү өчен кышкы кросска гына да 194 авылдашыбыз чыгуын әйтеп үтү җитәдер.
Ватанны саклаучылар көнендә Әфган сугышында һәлак булган авылдашыбыз Тәлгать Гыйльванов истәлегенә ир-атлар арасында һәм 9нчы март көнне хатын-кызлар арасында үткәрелгән волейбол ярышлары аеруча шаккатыргыч булды. Үзебезнең авылдашларыбыз гына катнашуга да карамастан, ир-атлар - алты, хатын-кызлар биш команда булып берләште, һәр буын үз командасын тәкъдим итте. Ярышлардан һәркем уңай энергия, яхшы кәеф, киләсе елга кабат җыелу теләге белән таралды, волейбол уенында катнашучыларга бүләкләр тапшырылды. Биш кыз үстерүче Айгөл Зиннәтуллина киләсе елга үзе бер команда төзермен, дип куандырды.
Әлеге уеннарның күңелле һәм истәлекле узуында иганәчеләребез Хәмит Баязитовның, Әнәс Галләмовның, Айдар Хәйретдиновның да роле зур булды.
Берничә ел элек арборлыларның «дан»ын күтәргән «Тау бәйрәме» дә традициягә әйләнеп китте һәм тагын да популярлашып, оешкан төстә уздырылды. Таудан рәхәтләнеп чана шуудан тыш, бәйрәм көнне кайнар коймак, чәй, шашлык белән сыйланырга, төрле ярышларда катнашырга, авылдашларыбыз Рафилә Һадиева, Дилә Гарипова, Халидә Хәйруллина, Әкълимә Хәбибуллина һәм татар эстрадасының яшь артистлары Айдар Рәкыйпов, Гөлназ Шакированың матур җырларын тыңлап хозурланырга мөмкин иде. Мөхтәрәм кунакларыбыз Галимҗан Гыйльманов һәм Илгиз Зәйниев та бәйрәмне сокланып күзәттеләр.
Арбор халкы быел да кышны «Җитезрәк, биегрәк, көчлерәк!» дигән девизга тугры булып, озатып калды.
Без социаль челтәрләрдә: Инстаграм, Инстаграм ВКонтакте, ВКонтакте, ТикТок, Ютуб, Одноклассники, Телеграм, Фейсбук, Твиттер, Яндекс.Дзен
Район тормышына кагылышлы иң мөһим яңалыкларыбызны Балтаси_Хезмэт телеграм каналыбызда да укыгыз.
Иң мөһим һәм кызыклы язмаларны Татмедиа Telegram-каналында укыгыз
