Кая барсак...шунда шатлык...

Ильнур, 18 февраль 2014 - 05:25

2444

13-14 февраль көннәрендә Әлмәт шәһәренең "Теннис-сити" үзәгендә "Ватаным Татарстан" газетасының герой шагыйрь Муса Җәлил истәлегенә традицион татарча көрәш ярышлары булып узды.

Һәм әйтергә кирәк , районыбыз җыелма командасы соңгы елларда моңарчы күрелмәгән зур җиңү белән кайтты. Соңгы елларда "алтын унлыкка"да керә алмаган командабыз 51 команда арасында көчлеләрдән саналган ут күршеләребез Саба, Кукмара, Арча районнарын артта калдырып 5-нче урынны яулады. Ике танылган спорт осталарарыбыз төрле дәрәҗәдәге травмалар алуга карамастан, үзләрендә җиңү көче табып, Яңгул авылыннан Ранил Сафиуллин өченче, Нормабаштан Илдар Зарипов дүртенче призлы урынны яуладылар Аларга Премьер-министр урынбасары Марат Әхмәтов акчалата бүләкләр, дипломнар тапшырды.

Шул ук көннәрне Аксубайда 2001-02 елгы балалар арасында "Алтын алка" клубы призына хоккей ярышлары булып узды. Тренерлары Илшат Гыйбадуллин, Рөстәм Хөсәенов кул астында шөгыльләнүче хоккейчылар республикада икенче призлы урынны яуладылар.

Екатеринбург шәһәрендә 1996-97, 1998-99 елгы яшьләр арасында кул көрәше буенча Россия беренчелегендә Татарстан җыелма командасы икенче булды. Аның составында бездән тренерлары Фагыйль Гайнетдинов җитәкчелегендә 6 спортчы көч сынашып , 4-5-6 урыннарны яуладылар.

Балтач гимназиясендә 11 сыйныфта белем алучы Алексей Григорьев һәм Алинә Хөснетдинова /тренерлары Ралиф Әскәров/Казан шәһәрендә "ОСТО" ның республика беренчелегенә армиягә сафларына әзерләнүче яшьләр арасында узган троеборье ярышларында өченче призлы урынны яуладылар. Физик культураның Идел буе академиясе беренчелегенә узган чаңгы ярышларында Алексей 10 км ны өченче булып буйсындырды.