Казанда 13 пар «Мәхәббәт һәм тугрылык өчен» медале белән бүләкләнәчәк

Казанда 6 июльдән 12 июльгә кадәр гаилә, мәхәббәт һәм тугрылык көненә багышланган «Гаилә атнасы» уза. Программа кысаларында шәһәр халкы һәм кунаклары өчен 100дән артык чара планлаштырылган. Озак еллар ныклы никахлары өчен 13 парны «Мәхәббәт һәм тугрылык өчен» медале белән бүләкләү төп вакыйгаларның берсе булачак.

Казан мэриясендә хәбәр итүләренчә, бәйрәм циклы шәһәр һәм республика үсешенә өлеш керткән гаиләләрне хөрмәтләүдән башланып киткән. Исемлектә – энергетиклар, артистлар, төзүчеләр һәм укытучылар династияләре бар. Казан мэры Илсур Метшин билгеләп үткәнчә, гаилә җәмгыятьнең төп кыйммәтләренең берсе һәм киләчәк буыннарны тәрбияләүнең нигезе булып тора.

Төп чаралар 8 июльдә Чистай урамындагы Кирилл чиркәве янында узачак: анда тәре йөреше, мастер-класслар, хәйрия ярминкәсе һәм концерт программасы планлаштырылган. Шулай ук бүләкләү Татарстан Республикасы Милли музеенда булачак, анда гаилә парларын гына түгел, хезмәт династияләрен, педагогларны һәм махсус хәрби операциядә катнашучыларның гаиләләрен дә билгеләп үтәчәкләр.

Вести Татарстан