300 пала адями одӥг вожвылъяськонын

Ӟучарнябер нуналэ концертъёс сокем трос калыкез уг люкало ке но, та ӝытэ концертэз учкыны мылкыд карисьёс трос вал. Кин ке лыктӥз гуртооссэ адӟыны, кин ке пыриськисьёслы кужым сётыны, кин ке аслэсьтыз быгатонлыкъёссэ ӵошатыны. Котькуд учкись понна та ӝыт аспӧртэмлыко луиз. 

Вожвылъяськонлэн гала-концертэз ёрослэн самой бадӟым сценаяз — Балтась лулчеберетъя юртын ортчиз. Огъя татчы 39 номер люкамын вал. Шумпотымон, сяме пыремъя, вожвылъяськон йӧскалыко луиз.

Кырӟан, эктон, кылбур лыдӟон номинациосын ваньзы лауреат ним басьтӥзы. Зэмзэ но, та шонер малпан. Кызьы дунъялод арлыдоосты? Соослэн сцена вылэ потэмзы ачиз ини бадӟым вормон. Котькудӥз нимысьтыз дипломен но синпель кузьымен пусйиськиз. 

— Сцена вылэ потон азьын сомында малпанъёс вал. Выступить карыны быгатомы-а, кырӟан кылъёсты уг вунэты меда? Сцена вылэ потыны ӵем уг йӧты бере, шугъяськиськод ини. Сцена вылысь васькем бере мылкыд ӝутӥське, кырӟан мылкыд эшшо но лӧптэ. Куара но жингресгес потыны кутскиз кадь, — серекъяса веразы артистъёс. 

Сцена вылын калыклы тодмо артистъёсты сяна, выль усточиосты но шараяны луиз. Янгулысь ёрос но республика конкурсъёслэн лауреатэз Наиль Захретдинов сцена вылын одӥг тальянэн гинэ ӧвӧл, куиненыз шудыса калыкез синмаськытӥз. Огшоры тальянъёс гинэ ӧй вал, быдӟалазыя огезлэсь огез пичи. 

Тужгес но сюлме йӧтымон луиз Ципья гуртысь Ираида Жуковалэн выступлениез. Со Светлана Алексиевичлэсь «Цинковые мальчики» шуыса нимаськем повестьысьтыз люкетсэ, анайлэсь рассказзэ, лыдӟиз. Туннэ нуналлы туж тупась пуштросэн кылъёс залысь калыклэсь мылкыдзэ бугыртӥзы, мур малпаськонэ уськытӥзы, ведь сыӵе ик егит пиос туннэ нуналэ но шаерез утьыны султӥзы. Кӧняез соос пӧлысь егитэн кезьыт музъеме пыризы! 

Покчи Лӧзя гуртысь Рафис Хакимов но Ринат Калимуллин пуштросэзъя тупась дӥськутэн но гитараен «Последний бой» кырӟанэз быдэстӥзы. Арысь аре Ӟаны лулчеберетъя юртысь нылкышноослэн «Лулгур» ансамбльзы удмурт йылолъёсты утьыса возе. Таяз соос «Куке мынӥсько мон вордскем шаертӥ» кырӟан кырӟазы. Соослы шудӥз Виктор Камаев — «Балкыш» конкурслэн воштонтэм пыриськисез. 

Сыӵе ик ӝутскем мылкыдын калык пумитаз Вуж Турья гуртысь «Марӟан» коллективез. «Аналтӥд» кырӟанэн соос калыкез чик но ӧз пӧялэ, шумпоттӥзы гинэ. Соослы юрттӥз Виталий Фёдоров. 

Покчи Лӧзя лулчеберетъя юртысь эктӥсьёсты но адӟыны луиз. «Вуюись» хореографической коллектив та ӝытэз удмурт эктонэн шулдыртӥз.
Кузьымъёсты сётон ужрадэз азьланьтӥз Балтась ёрослэн исполнительной комитетэзлэн кивалтӥсезлэн воштӥсез Ильгам Гайнутдинов. Со арлыдо артистъёслэсь кулэлыксэс, лулпуш мылкыдзэс пусйиз, та конкурслэсь бервыло луэмзэ тодмостӥз. 

Гуртсылэсь данзэ утьыса, арлыдо артистъёсмы выль конкурсъёслы дасяськыны кутскозы. Куд-огъёссэс табере возьма республикалэн бадӟым сценаез. Ас гуртсылэсь данзэ утён сяна, соос быдэс ёрослэсь нимзэ шараялозы. Соослы азинсконъёс сӥзёме!