«Адямиез, кудӥз коть мар ке но сылэ, туж секыт басьтыны»

Калыкез кылдыто адямиос. Соос пӧлын нош пӧртэмез вань: ужасез но азьтэмъяськисез, узырез но куанерез, туж визьмоосыз, пӧяськисьёсыз но мукет… Калык пӧлын ик вань кивалтӥсез, кудӥз ас сьӧраз валтэ соосыз.

Вашкала дырысен адямиос асьсэлы азьветлӥсь бырйизы. Солэсь котькин кылзӥськиз, пумит вазьыны ӧз дӥсьты, кышказ. Соин ӵош пӧртэм азинсконъёсы вутскиз, вормисе потӥз.

Малы адямиос быръё асьсэлы кивалтӥсь? Мон сямен, кивалтӥсь ӧз ке луы, ваньзы ас сяменызы лэсьтысалзы, ваньзылэн кузё кариськемзы потысал.

Туэ асьмелэн Элькунамы быръёнъёс ортчизы. Кивалтӥсе (тӧрое) бырйизы Р.Н.Миннихановез. Тросэз, солэсь ужаны быгатэмзэ синйылтӥз, луоз. Мон сямен, соос шонер лэсьтӥзы. Берло дыре асьме Элькунамы трос воштӥськонъёс ортчо: арлы быдэ выль школаос, садикъёс, стадионъёс, паркъёс, улон юртъёс, больницаос лэсьтӥсько но выльдӥсько. Та ваньмыз калыклэсь улонзэ умоятыны чакламын. Адями тыр улӥз ке, солэн улонын, ужын бервылыз умой луоз. Кивалтӥсь нырысь ик малпаны кулэ ас калыкез, ас ужасез сярысь.

Но асьмеос адӟиськом: кивалтӥсьёс пӧлын но пӧртэм адямиос ужало… Кудӥз ачиз но аслаз ӵыжы-выжыосыз сярысь гинэ сюлмаське. Соослы гинэ ваньмыз умоез мед луоз. Озьы соос коркаос, квартираос басьто, дуно машинаосын ветло.

Кытысь меда соос коньдон шедьто? Аслад ужам уксёеныд гинэ сомында узырмыны уг луы. Озьыен, солы палэнысен коньдон пыре. Татын ини «коррупция» кыл потэ, кудӥз берло дыре туж паськыт вӧлмемын. Кӧня нюръясько ке но ини та «висёнэн», солэсь «бурмыны» уг луы.

Кинлэн вань коньдонэз, со ик ворме та улонын.

Нош вань меда сыӵе адямиос, кудъёссэ коньдонэн басьтыны уг луы?

Мынам малпамея, узырлык котькуд адямиез вормыны уг быгаты. Узыр адямиос малпало, соос ваньзэ коньдонэн басьтыны быгато шуыса. Зэмзэ но, сиёнэз, дӥськутэз, пыдкутчанэз, машинаез — котьмае басьто коньдонэн. Нош адямиез, кудӥз мар ке но сылэ, коньдонэн басьтыны туж секыт. Сыӵе адямилы зэмлык, коньдон сярысь, дуногес потэ.

Судъёсын тужгес но ӵем пумиськыны луэ коррупциен.  Кинлэн коньдонэз трос, соос «басьтыны» быгато эрикез. Шумпотоно, сыӵе судьяос трос ӧвӧл.

Вылӥ дышетсконниосын но пумиське коррупция. Кин ке дышетске, тырше, уйёсы уг изьы, дасяське. Аслаз тыршеменыз со экзамензэ сётэ. Нош кудӥз капчиен гинэ, коньдон «донге» но, ужзэ быдтэ.

Коррупциез быдтон понна трос пӧртэм акциос ортчыто. Мон сямен, йыружъёс, коррупция лэсьтӥсь адямиосты секытгес кыл кутытоно. Мукет адямиос мед малпаськозы мар ке умойтэм лэсьтэмзылэсь азьло. Котькуд адямилэн аслаз малпаназ мед луоз, кызьы со улоз азьпалан, кинъёс луозы солэн эшъёсыз, кыӵе со профессия быръёз. Котькытын ужаз ке но, со медаз ышты аслэсьтыз адямилыксэ.

Адями гажа ке аслэсьтыз быръем удыссэ, со сюлмысь тыршоз отын ужаны, мукет адямиосын юн кусып возёз, соослы ӟеч каремез потоз. Соин ик астэ возьыны дышетсконо школаын, семьяын. Капчиен поттэм коньдон шуд уз вайы, соин уд но узырмы. Мон сямен, ваньмыз умой мед луоз, зэмлык мед вормоз, та югыт дуннеын котькин одӥг кадь мед улоз.

Евдокимов Виталий,

Шор Кушкет школаысь

10 классысь дышетскись