Анай луон устолык

Туэ Балтась ёросысь исполнительной комитетлэн кичӧлтэмез улсын, Анайлэн нуналэзлы сӥзьыса, ёросысь анайёс понна «Искусство быть мамой» вожвылъяськон радъяськиз. Конкурсэз ортчытон ньыль зоналы люкемын вал. Вожвылъяськонэ ваньзэ 24 анай пыриськиз.

Конкурслы мытон сётӥськиз 18-тӥ шуркынмонэ Ципья лулчеберетъя юртын. Татчы пыриськизы Ципьяысь, Вукогуртысь, Сардыкысь, Кугунурысь, Арборысь но Пижмара гуртысь огъя куать анайёс. Соос, пӧртэм эскеронъёсты ортчыса, асьсэлэсь котькуд ласянь усто луэмзэс возьматӥзы. 19-тӥ шуркынмонэ таӵе ик конкурс ортчиз Чутай лулчеберетъя юртын. Отчы приськизы Нуринер, Янгул, Смаиль, Шишинер, Чутай гуртъёсысь анайёс. 20-тӥ шуркынмонэ Сосна лулчеберетъя юртлэн сцена вылаз финалэ потон понна вожвылъяськизы Сосна, Биктеш, Субаш, Бурбаш Сардыган но Салаусь Сардыган гуртъёсысь кышномуртъёс. Нош йылпумъяз вожвылъяськонлэсь зональной этапсэ Шубан лулчеберетъя юрт. Отын анай устолыксэс возьматӥзы Бурбаш, Княбаш, Покчи Лӧзя, Шубан, Нурма, Кили, Чапшар но Ура гуртысь нылкышноос.

Вожвылъяськонэ пыриськисьёс котькуд зонаын нырысь ик учкисьёсты но жюрилэсь ёзчиоссэ асэнызы тодматӥзы, котькудӥз анай кылыныз ачиз сярысь вераз. Собере анайёс асьсэлэсь шаплы луэмзэс возьматӥзы, вакчи дыр куспын ыльнянез бугыртыса, шыдлы тукмач вандылыса. Со сяна, нылкышноослы семьяенызы ӵош творческой выступление но дасяно вал. Со быгатэ вал луыны кырӟан, эктон, кылбур лыдӟон, крезьгуро инструментъёсын шудон, скетч, миниатюра выллем сценкаосты пуктон. Ваньзы но пыриськисьёс та эскеронэз данэн быдэстӥзы. Ёросысь анайёсмы кырӟаны но, эктыны но усто луэмзэс, ас калык сямъёссэс тодэмзэс но возьматӥзы. Мукетыз конкурс нылкышноослэсь ческыт пӧраськыны быгатэмзэс шараяз. Котькудӥз анай нимысьтыз та конкурслы йӧскалык сиён дасям — кин табань, нош кин кӧжы кисаль; кин чак-чак, нош кин чай тукмач (хворост); кин губадия, нош кин эчпочмак но мукет ческыт калык сиёнъёс.

Огъя йылпумъянъёсъя финалэ ортчизы 10 анайёс: Ципьяысь Филиппова Алиса, Вукогуртысь Григорьева Анна, Смаильысь Ахмадиева Ландыш, Янгулысь Садикова Алсу, Соснаысь Хабибуллина Лейсан, Субашысь Гатиятуллина Эльвира, Кушкетбашысь Исхакова Айгуль, Нурмаысь Газизова Альмира, Шубанысь Габделхакова Лейсан, Бурбашысь Газизуллина Лейля.

28-тӥ шуркынмонэ соос Балтась лулчеберетъя юртлэн сцена вылаз пумиськизы но пӧлысьтызы тужгес устооссэ анайёсты шараязы. Озьы 1-тӥ интые потӥз Нурма гуртысь Альмира Газизова, 2-тӥ интыез басьтӥз Ципья поселениысь Алиса Филиппова, 3-тӥ интыен пусйиськиз Бурбашысь Лейля Газизуллина. Нош вожвылъяськонлэсь Гран-призэ басьтӥз Субаш гуртысь анай – Эльвира Гатиятуллина. Ӟечкыласьком вормисьёсты!

Туспуктэм Алсу Надршиналэн