Асьме калыклэн валтӥсь тодметэз — ас калыктэ но шаердэ яратон

Быдӟым тыложлэсь вань курытсэ ас вылазы чидам адямиослэсь ӵемысь кылыны луэ таӵе кылъёсты: милесьтым адӟеммес тӥледлы, туала поколенилы, адӟыны медаз кылды ни... Песяе но озьы вералляз. Пичи дыръям мон та кылъёслэсь пуштроссэс рос-прос уг валаськы вал, со валан будэмъя гинэ вуиз: песяе но, мукет арлыдоос но дунне вылын ожмаськонъёс медаз луэ, калыкъёс куспазы тупаса мед улозы но нунокъёссы шудо мед луозы шуыса сюлмаськизы. Но каньыл, тупаса улонлэсь кадырзэ ум валаське, адями дуннеын ялан бугыръяськонъёс луыло...

Нимысьтыз ожгар операция кутскем дырысен но ини одӥг арлэсь трос вакыт ортчиз. Со дыр ӵоже шаермылэн но нимаз котькуд адямилэн улонэз выжыысен воштӥськиз. Кӧня сюлмаськон пыр потоно, синкыли кисьтоно луизы ожгар операцие пыриськисьёслэн семьяоссы, анай-атайёссы, кузпалъёссы, нылпиоссы... 

Пичи гинэ Сизнер гуртысь но нимысьтыз ожгар операцие куинь муртэ келязы.

Одӥгез соос пӧлысь — Антонов Валерий Михайлович. 

Валерий вордске 1979-тӥ арын Сизнер гуртын Надежда но Михаил Антоновъёслэн семьяязы. Гуртысь покчиёзо школаын тодон-валан люкамез бере, дышетсконзэ Ципья шоръёзо школаын азинтэ. 9 классэ йылпумъяса, Нурмаысь СПТУ-е дышетскыны пыре, тракторист-машинистлэсь ӧнерзэ басьтэ. 1997-тӥ арын 18 арес тырмем егит пиез армилэн радъёсаз басьто, кык ар ӵоже со, пограничник луыса, шаермылэсь кунгожъёссэ уте. Бертыса колхозэ ужаны интыяське. «Колхозын пӧртэм ужъёсын тырши, ужамтэ уже ӧз кыльы», — шуэ ачиз Валерий. 

2001-тӥ арын егит воргорон семья кылдытэ. Яратонзэ но семья шудбурзэ палэнысь уг утча, ас вордскем гуртаз ик шедьтэ: одӥг классын дышетскем нылмуртэн, Светлана Матвееваен, улонзэ герӟа. Егит семьяын, анай-атайлэсь, песянай-песятайлэсь шумпотонзэ йылэтыса, нырысь 2002-тӥ арын Артём пизы вордске (нялтас вераса, Артёмез пӧлысьтымы тросэз усто мызганчиен тодо), собере 2004-ын — Полина нылзы, нош 2014-тӥ арын Максим пизы ини семья шудзэс пачылмытэ. Ваньмыз умой, нылпиос будо, семья шудо... Та шудэз нокыӵе пилем возъяны кулэ ӧй вал кадь. Но улон аслэсьтыззэ каре угось...

— 43 аресэн вуиз мыным повестка. 24 сентябре повестка басьтӥмы, 26-яз — районысен кошкимы. Толэзь ӵоже Казаньын луимы. Собере 25 октябре милемыз Казаньысен келязы, нош дас нуналскын, 5 ноябре, ми ини нимысьтыз ожгар операцие пыриськон понна тодмостэм интые вуимы, — мобилизация улсы шедемез сярысь вера Валерий.

— Повестка вуоз шуыса, малпад вал-а? Со ивор тон понна паймымон ӧз луы-а? — юасько гуртоелэсь.

— Зэмзэ ке верано, ваньмыз сыӵе ӝог луиз, со сярысь малпаса но ӧй вутты — повесткае киям вал ини. Мазэ веранэз, нырысь паймон но, сюлмаськон но вал, но воргорон ассэ кутыны быгатыны кулэ, вордскем шаерез утён — милям ужпуммы ук, сое возьытэ усьытэк быдэстоно, — валэктэ Валерий. 

Воргоронлэсь мӧляысьтыз медальзэ адӟем бере, со сярысь но тодэме потӥз.

— Та «За укрепление боевого содружества» шуыса нимаськись медаль. Россия Федерациысь Обороная министерстволэн ведомственной медалез, — вакчияк вераз гуртое. 

Сюлмысь ӟечкыласько! Данъяськисько но шумпотӥсько гуртое понна!

***

Статьяелэн кыкетӥ героез — Васильев Владислав Юрьевич.

— Мобилизация сярысь ивор тодмо луэм бере ик ас поннам малпай, монэ нырысетӥосын ӵош басьтозы шуыса, малы ке шуоно мон боевой сюресэз ортчем адями, Чечня пыр потэм адями. Соин мон понна витёно маке вал со: вазьгес-а, бергес-а — одно басьтысалзы, — повестка сярысь юамелы валэктон сётӥз Владислав.

Владислав вордске 1981-тӥ арын Тагашур гуртын Антонида но Юрий Васильевъёслэн семьяязы нырысетӥ нылпи луыса. Тагашурын вордскемын ке но, пияшлэн улон сюресэз анаезлэн вордскем гуртэныз, Сизнерен, герӟаське. Малы ке шуоно, кӧня ке дыр ӵоже Пермь улосвылын улэмзы бере, Васильевъёс вордскем палъёсазы бертоно карисько, Сизнер гуртэ выжызэс лэзё. Владиклы соку 11 арес луэ. 

— Ципья школаын 9 классэз быдтӥ но, «сокращение» сюри. (серекъямы). Колхозын ужаны кутски. Собере 1999-тӥ арын армие кошки, ӝыны ар служить карем бере, Чечняе келязы. 2001-тӥ арын бертӥ, 2002-ын — кышно басьтӥ, 2003-ын — пие вордскиз, — вакчияк вераз гуртое.

Владиславлэн но кузпалэз Сизнер ныл — Мария, ныл фамилиезъя Ермохина. Туннэ нуналэ Кирилл пизы быдэ вуэмын ини, дышетсконзэ йылпумъяса, Казаньын ужа. Васильевъёслэн семьяязы эшшо кык муспотон нылъёссы будо — Виктория но Дарья. Вика 3-тӥ классын дышетске, Даша нылпи садэ ветлэ. Нылъёс атайзэс отпуске туж витиллям, гожтэтъёс, суредъёс дасяллям, соос борды итӥськем Владиславлэн кутэм нылыз но, Милана.

— Нылпиослэсь гожтэт басьтон — самой бадӟым шумпотон, соосты лыдӟыса пуш тыре, — шуо ожгарчи гуртоосы.

Валерий но Владислав — гуртоос луэм сяна, ӵыжы-выжыос, эшъёс но бускельёс. Нимысьтыз ожгар операцие но соос ӵош кошкизы, ожгар ужпумзэс но ӵош одӥг интыын быдэсто.

— Ӵош кошким, одӥг интые сюрим, тани отпуске но таяз ӵош бертыны тупамы, — шуо воргоронъёс.

— Нош пӧлады удмуртъёс, мукет тодмоосты вань-а? — юасько. 

— Милемын ӵош Турья пи, Гондыргуртысь, Ярак-Чурмаысь удмурт пиос, асьме районысь ик бигеръёс но вань. Милемын артэ гинэ Тагашурысь, Ципьяысь тодмоосмы, — ожгар эшъёссы сярысь веразы воргоронъёс.

— Нош кыӵе арлыдъем адямиос тросгес пӧлады?

— Самой егитэзлы 22 арес, тросэз — 40, 45-50 аресъемъёс. 

— Котьма ке но, ожмаськон — со кышкыт. Луэ-а кызьы ке кышканэз вормыны?

— Котьку кышкыт... Самой важноез: ожмаськон дыръя астэ кутыны быгатоно, сак луоно, кышкытлык кылдыку, ӝегатсконо ӧвӧл, мылкыдъёслы сётскыны уг яра.

— Афганын, Чечняын служить каремъёслэсь кылыны луэ, али ваньмыз трослы секытгес шуыса. Соглаш-а тӥ таӵе малпанэн?

— Али технология туж зол: дронъёс но ракетаос. Со бордын гинэ пӧртэмлыкез.., — шуэ Чечня пыр потэмзэ тодаз вайыса Владислав.

— Кызьы малпаськоды, асьмеос вормомы-а?

— Ми оскиськом, асьмеос вормомы шуыса, асьмелэн мукет сюресмы ӧвӧл. Одно ик вормомы! — огымысь верало ожгарчиос.

Озьыен, асьмеос но, юн кариськыса, вӧсяськыса но ӟечсэ гинэ малпаса вормонлы оскомы.

***

Сизнер гуртысь нимысьтыз ожгар операцие пыриськись куиньметӥез воргорон — Матвеев Павел Михайлович. 

Павел вордске 1988-тӥ арын Татьяна но Михаил Матвеевъёслэн семьяязы. 1999-тӥ арын Ципья шоръёзо школаын 9 классэз йылпумъя. Собере колхозэ ужаны пыре. 22 сентябре 2022 арын мобилизация улсы шеде. Нош 27 декабре Украинае кошке, отысен — штурмовой отрядэ. 25 феврале Павел сӧсырме: чыртыяз осколок шеде. Куинь толэзь госпитальын эмъяськемез бере сӧсырмемезъя одӥг толэзь ӵоже дораз отпускын луэ. Комиссия эскерем бере, сое выльысь Украинае келяло. Отын ялан азьпал радын луэ, аслэсьтыз ожгар ужпумзэ данэн быдэстэ.

Одӥг гуртысь куинь воргорон... Нош кӧня соос, сыӵе гуртъёс но сыӵе воргоронъёс? Котькуд гуртысь (каргуртъёсты но каръёсты лыдъятэк) ӧжытсэ 2-3 мурт, яке 4-5... Котькудӥзлэн вань анай-атаез, матысьёсыз... Котькудзэ кин ке но вите... Гожтэмме йылпумъяса, вань ожгарчиосмылы ӝоген но сӧл-тазаен вордскем палъёсазы, матысьёссы доры бертыны сӥзисько.