Атайёс сьӧры пиос кыстӥсько

Пӧртэм спортивной площадкаос усьтӥсько, турниръёс радъясько, спортлэн котькуд амалэзлэн аслаз кивалтӥсез вань, спонсоръёс юртто — та ваньмыз возьматэ калыклэсь спортэз яратэмзэ. 

Ӟаны гурт поселениысь Михайловъёслэсь семьязэс тодӥсьтэмэз ӧвӧл, дыр. Соос лулчеберетын но, спортын но, мерлыко ужъёсын но асьсэды ушъямон паласен гинэ возьмато.

Тани 14 куарусёнэ но атаен пиос, Руслан но Максим Михайловъёс, эшшо одӥг вормонэ вутскизы — «Атаен валче» шуэм элькун ӵошатсконлэн зональной этапаз 1 инты басьтӥзы. 

Огъя та ӵошатсконэ 17 семья пыриськиз. Котькуд семья понна 6 пӧртэм дисциплина ӵектэмын вал: турникын ӝутъяськон, баскетбол тупез нуон, валче скакалкаен тэтчан, обручен эстафета, бодыен бызьылон, туп люкан. Атаен пиос асьсэлэсь кужымзэс, шаплы но эшлыко луэмзэс, куспазы вераськыны быгатэмзэс эскеризы.

2-тӥ интыын Шубан валтӥсь школаысь Фасхетдиновъёслэн семьязы интыяськиз, нош 3-тӥ интыын — Карадуван шоръёзо школаысь Яруллинъёслэн семьязы. 

Ӟечкыласьком вормисьёсты но азьланяз выль вырйылъёсты басьтыны сӥзиськом.

P.S. Ӵуказе, 22 куарусёнэ, Михайловъёс но Фасхетдиновъёс Балтась ёросмылэсь данзэ утьыны мынозы. Оскиськом, элькунын но семьяосмы вань быгатонлыксэс возьматозы но призо интыен бертозы.