Атыкай музъемез утисьёслы сӥ но дан!

22 инвожое 1941 арын фашист Германилэн войскоосыз Совето Союзлэсь тынӥсь улонзэ сӧризы, сьӧдмазы. Вань калык кышкатэк султӥз тушмонлы пумит. Соку быдэс дунне адӟиз, кыӵе кысӥсьтэм кужымез калыклэн, ма мында солэн чиданэз. 

СССР-ысь вань калык сюлэмзэ сётыса нюръяськиз тушмонэн. Ожлудын сяна, калык сюлмысь тыршиз гуртъёсын, фронтлы лулысь-сюлмысь юрттыса. Быдӟым Атыкай ожлэн вылӥ, ӟечлыко ужпумъёсыз адямиослэсь бадӟым подвигъёсы мылкыдзэс ӝутӥзы, калыклэсь батырлыксэ возьматӥзы. Вормонэ бадӟым люкетсэ пыртӥз Ленинской комсомол. Миллион пала комсомолецъёс кышкатэк нюръяськизы фашист кужымъёсын. 

Соос пӧлын асьме аспалъёсмы но. Туннэ тодматӥськом Вуж Кушкетысь Быдӟым тыложе пыриськем куд-ог аспалъёсынымы.

Павлов Кузьма Павлович

Вордӥськемын 1910 арын. Мобилизовать каремын 1934 арын. Ожын комендантской взводлэн ыбылӥськисез луэм. Эстониез, Латвиез, Белоруссиез мозмытон понна ожмаськонъёсы пыриськем. «За отвагу», «За трудовую доблесть», «За боевые заслуги», «За трудовое отличие», «За освобождение Варшавы», «За взятие Берлина», «За победу над Германией», «Двадцать лет победы 1941-1945 гг.» медальёсын данъямын.

Байманов Егор Архипович

Вордӥськемын 1905 арын. 1941 арын арми радъёсы басьтэмын. Шундыпуксёнпал фронтын нюръяськем. 1942 арын мынӥсь ожмаськонъёс дыръя сӧсырмем. Госпитальын кыллемез бере аслаз частяз ик берытскем — 11-тӥ армилэн 11-тӥ гвардейской дивизиысьтыз 33-тӥ полклэн 2-тӥ батальоназ. 1943 арын Калугаез мозмытонъя ожмаськонъёсы пыриськем. Со бӧрсьы Орловске сюрес кутӥллям. Брянскез мозмытӥллям. Бератаз Литваез мозмытонэ но аслэсьтыз люкетсэ пыртэм. 1944 арын 30 толсуре, контузия басьтыса, вордскем палъёсаз бертоно луэм. Пӧртэм медальёсын пусъемын. 

Яковлев Трофим Кузьмич

Вордӥськемын 1914 арын. Фронтэ басьтэмын 1941 арын. Керчь городэз мозмытонэ но Днепр понна ожмаськонъёсы пыриськем. Быдӟым Атыкай ожысь бертыса, гуртысь колхозын дуриськись луыса тыршем. 1985 арын 2 степенё Отечественной война орденэн пусъемын.

Никитин Григорий Иванович

Вордӥськемын 1909 арын. 1941 арын фронтэ мобилизовать каремын. Смоленск улосвылын мынӥсь ожмаськонъёсы пыриськем. Пӧртэм пумо сӧсырмонъёсты басьтыса, 2-тӥ группаысь инвалид луэм.

Ибаев Андрей Иванович

Вордӥськемын 1915 арын. 1941 арын фронтэ мобилизовать каремын. Калининской фронтын мынӥсь ожмаськонъёсы пыриськем. Пӧртэм пумо сӧсырмонъёсты басьтыса, 2 группаысь инвалид луэм. «За отвагу» медален пусйиськемын. 

Воробьёв Василий Спиридонович

Вордӥськемын 1916 арын. 1941 арлэн 31 пӧсьтолэзяз фронтэ басьтэмын. 16-тӥ гвардейской стрелковой дивизилэн 917 стрелковой полказ службазэ ортчем. Смоленск городын мынӥсь ожмаськонъёсы пыриськем, секыт сӧсырмеменыз сэрен демобилизовать каремын. 3 группаысь инвалид. Ож бере Свердловскын улэм.

Попов Георгий Алексеевич

Вордӥськемын 1909 арын. Армилэн радъёсаз 1930 арын басьтэмын. 1941 арын 22 инвожое снайпер луыса фронтэ кошкемын. Кык пол сӧсырмыны шедем. Гуртэ бертыса, колхозын тыршем но отысен ик пенсие потэм.

Морозов Николай Филиппович

Вордӥськемын 1925 арын. Ож кутсконысен ик вордскем музъемез утьыны кошкемын, кышкыт ожмаськонъёсы пыриськемын. Секыт сӧсырмонъёс басьтыса, гуртаз 3 группаысь инвалид луыса бертэм. Колхозын муш утись луыса тыршем.

Лябин Василий Павлович

Вордӥськемын 1910 арын. 1941 арын ас мылкыд каремезъя вордскем шаерез утьыны кошкем. Капитан луэм. 1943 арын ивортэк ышем. 

(Азьланьтонэз вань)