Азьланьын но озьы мед луоз

2 октябре нышыр бере, пуктэм аслам ужъёсы быдэсмыса ӧз вуэ... Бригадир жингыртӥз. Ужась кулэ, адями ӧвӧл, уд быгаты-а, пе, гожъяськыны. Ма номырзэ тодымтэ маке, гожъяськыны гинэ быгатӥсько шуыса, кӧня ке нуналлы весовщица кариськи...

Тӥни со куать нуналъёс, бусыын берпуметӥзэ кукурзаез октон нуналъёс, туж ӝог ортчизы. Адӟысалды ке, воргоронъёслэсь туж сюлмо, ӵошатскыса ужамзэс! Тыршиськом ини, гинэ шуо, пальпотыса. Озьы соос, гуртын ужась, бусыын тыршись агайёс, тулысысен кутскыса, одӥг но дугдытэк, шутэтскытэк (космонавтъёс выллем) 5 толэзь ӵоже асьме понна тыршо!

Тани берпуметӥзэ та ар понна октон-калтонын, вазь ӵукнаысен ик бусые вуыса, пеймытозь тыршизы! Нунал куспын сиськыны гинэ кӧня ке минутлы дугдӥзы но, нош ик руль сьӧры пуксьыса, котькудӥз ужась агай — комбайнёр-а, тракторист-а, шофёр-а со — сюлмысь, пӧсь поттыса ужзэ азинтӥз. Ог нуналэ 20-22 рейс сопала-тапала ветлы ай! Ваем кукурузаез донгаса, силос гуэз тырмыты ай! Мыным соос кузьылиос кадь но потӥзы ни. Монэ соос туж синмаськытӥзы! Синмаськи, сыӵе мыло-кыдо ужамзылы. Сюлэм бурдъяськиз, огшоры бусыын ужась агайёслэн секыт, пӧсь поттыса ужамзы сярысь маке гожтэм потӥз. Фотое ӧй уськыты ни, син гинэ медаз усьы шуыса. 

Куинь нуналзэ бусыын комбайнёръёс Овчинников Алёша, Улисьялысь Изергин Рудик, Назипов эш тыршизы, нош витетӥ-куатетӥ нуналаз Николаев Миша но ватсаськиз. Кукурузаез КамАЗ-эн нуллӥзы Троцианский Влад, атаен пиос — Вася агай но Эдик Овчинниковъёс, Нафиков Азат, нош тракторен нуллӥсьёс Абрамов Алёша но Раимов Пётр луизы. Гуэ вуттэм кукурузаез силосэ тыризы К-700-эн ужась Ураков Олег но Т-150-эн Кумаев Игорь (кузпалэ).

Доразы шумприч эскерись, кулэ дыръя валэктӥсьёс-юрттӥсьёс — бригадирмы Петров Витя но бусыысь бригадирмы Чернов Коля. Гуэз огшоры уг кельто. Сомында тырмытэм силос гуэз согыны ини быдэс фермаын ужась доярка апайёс но пудо сюдӥсь агайёс, ужасьёс луизы. Бригадир но соосын ӵошен уже пыриськиз.

Нош кыӵе ческыт сиён вуттӥзы. Нуналаз кык пол сюдӥзы. Ужам бере, ческыт кошке кыр бусыын сюлмысь пӧзьтэм сиён! Бадӟым тау!

Ваньзылы туж бадӟым шуныт мылкыдме вуттэме потэ. Инмар ваньдылы но — гуртын ужась агайёслы но апайёслы — нош но нош кужым, сюлэм шуныт, тазалык, семьяяды тупаса огкылысь улон мед сётоз, кема-кема аръёс ужаны мед юрттоз. Аръёс каньыл луыса, ваньдылы ӟечен улыны мед кылдоз!

Кумаева Н. П.
Тагашур гурт