Азвесь вакытлэн кизилиосыз

Мӧйыос — шаермылэн нимысьтыз сӥез. Дано шутэтсконэ потэмъёс асьсэды котькуд удысын шедьто, интыязы пукыны уг дырто. Асьсэлэсь мылкыдзэс соос нуналысь нуналэ лэсьтэм ужъёсынызы юнмато.

1-тӥ коньывуонэ «Балтач» спортивной залын арлыдоослэн декадазы улсын нимысьтыз спартакиада ортчиз.

Ужрадэз Балтась ёросысь исполнительной комитетэзлэн кивалтӥсезлэн воштӥсез Ильгам Гайнутдинов усьтӥз. Аслаз выступленияз со арлыдо поколенилы таукарон кылъёссэ вуттӥз, котькуд пыриськисьлы вормыны но дырзэс шулдыр ортчытыны сӥзиз. Огъя ужрадэ Балтась город поселениысь, Субаш, Кугунур, Бурнак, Нурма, Нуринер, Пижмара, Салаусь, Сосна, Смаиль, Шубан, Янгул, Шишинер гурт поселениосысь арлыдоос пыриськизы.

Официальной люкетэз бере арлыдоослы зарядка ӵектэмын вал. Лыктэмъёс татчы мылкыд карыса пыриськизы. Собере самой тунсыко вакыт вуиз. Арлыдо спортсменъёс асьсэлэсь быгатонлыкъёссэс шахматын, ӝӧквыл теннисын, дартсын, пневматической ыбылӥськонын эскеризы. Шумпотымон, соослэн энергизы но ӵошатскон мылкыдзы котыр вӧлмиз. Нимысьтыз дисциплинаосын кужымзэс эскерыса, котькуд вормисез но призо инты басьтэмъёсты грамотаосын но медальёсын данъязы.

Эшшо одӥг аспӧртэмлыкез командаослэн «Весёлые старты» ӵошатсконзы луиз. Ог-огдэ валан но огазе луон татын азьпал радэ потӥзы. Йылпумъянъёсыз но тунсыко луизы: 1-тӥ интые Балтась город поселениысь команда потӥз, 2-тӥ интыын — Салаусь гурт поселение, 3-тӥ интыын — Вылын Субаш гурт поселение. 

Малпасько, котькуд лыктэм мурт та нуналэ ӝутскем мылкыдын дораз бертӥз. Малы ке шуоно та нуналэ соос быгатэмзэс гинэ ӧз возьматэ, ог-огенызы вераськыса, сюлэмзэс капчиятӥзы.

Огъя вань ӵошатсконъёсты лыдэ басьтыса, 1-тӥ интые Балтась город поселенилэн командаез вутскиз, 2-тӥ интыын — Вылын Субаш гурт поселение, 3-тӥ интыын Пижмара гурт поселение. 

Данъяськиськом тӥледын, гажано арлыдоосмы! Гумырды кузь медло, котькуд ужды азинлыко но пайдаё мед луоз. Азьланяз но тӥледлы юн тазалык, шумпотон, яркыт нуналъёс гинэ сӥзиськом!

 Туспуктэм: https://vk.com/odmsbaltasi