Балтась ёрос Казаньын ма возьматӥз?
Туэ йӧскалык лулчеберетлэн но сям-йылолъёслэн арезлы сӥзьыса, Элькунысь ёросъёс пӧлын «Культурная столица Татарстана» конкурс ялэмын вал.
31 южтолэзьысен 24 шуркынмонозь Казаньлэн пӧртэм интыосаз Элькунысьтымы ёросъёс адӟытонъёссы, йӧскалык сиён-юонъёссы, чеберлыко калык ӧнеръёссы, чеберлыко коллективъёслэн выступлениоссы пыр асьсэлэсь аспӧртэмлыко луэмзэс возьмато.
6 куарусёнэ В. И. Ленин нимо культурно-досуговой центрын черод вуиз Балтась ёрослы но. Ӵукнаысен ӝытозь татын пӧртэм пумо ужрадъёс мынӥзы. Азьло ик центр азьын интыяськем площадкаын ярмарка ортчиз — пӧртэм ужбергатӥсьёс куноосты вузъёсынызы тодматӥзы, соос пӧлын чечы, сӥлё вузъёс, вӧй но пӧртэм мукетъёсыз. Нимысьтыз гур но пуктэмын вал — татын куноосты пӧсь табанен но чаен куноязы. Ужрад ёросысь мызганчиослэн шудэм шулдыр гуръёссы улсын ортчиз.
Азьланьтӥськиз ваньмыз лыктэм куноосты ёрослэн историеныз, калык сиён-юонъёсыныз, дӥсьёсыныз, крезьгур инструментъёсыныз тодматонэн. Мастер-класс выллем адӟытон куноосты шумпоттӥз, мылкыдзэс бурдъяз.
Нош самой валтӥсез кутскиз ӝытлань: аспӧртэмлыко концерт, трос йӧскалыкъем чебер ужрад ортчиз. Сцена вылын Балтась каргуртысь («Балкыш», «Орчык»), Арбор («Ядкэрь»), Субаш («Туганай»), Вуж Кушкет («Чибори») гуртъёсысь лулчеберетъя юртъёсысь коллективъёс быгатонлыкъёссэс возьматӥзы. Озьы ик Эрик Васинкинлэн «Виво» но «Восторг» коллективъёсыз пӧртэм эктонъёсын паймытӥзы. Нимаз кырӟасьёс — Залия Аубакирова, Ирек Фатихов, Райнур Фаязов, Альфия Файзрахманова, Ольга Плотникова, ТР-ысь калык артист Римма Ибрагимова, ТР-ысь сӥё-дано артистъёс Радик Шакиров но Раяз Фасихов синмаськымон куараосынызы учкисьёслэсь сюлэмъёссэс бугыртӥзы. Сосна гуртысь Закировъёслэн семьязы асьсэ быгатонлыкъёссэ возьматӥз.
Огъя вераса, Балтась ёрос ужрадэз туж вылӥ уровенен ортчытӥз. Ёросмы аспӧртэмлыко, трос йӧскалыко луэменыз висъяське но адямиослэсь тунсыкъяськонзэс улӟытэ. Малпаськом, та конкурсын но емышъёсыз шумпотымонэсь луозы!
Следите за самым важным и интересным в Telegram-каналеТатмедиа
Без социаль челтәрләрдә: ВКонтакте, ВКонтакте, ТикТок, Ютуб, Одноклассники, Телеграм, Яндекс.Дзен
Район тормышына кагылышлы иң мөһим яңалыкларыбызны Балтаси_Хезмэт телеграм каналыбызда да укыгыз.
Нет комментариев