«Брестын ожмаськиз удмурт пи»

Быдӟым Вормонлы 20 ар тырмон азьын, 1965-тӥ арын 21-тӥ оштолэзе (№ 47), «Азьлане» газетын таӵе ним улсын статья печатлаллям, со «Советской Удмуртия» газетын потэм статья луэ. 50 ар ортчыса, ӵектӥськом туала лыдӟисьёслы но та тунсыко гожтосэн тодматскыны.  

«Ортчем войналэн историяз нимысьтыз бадӟым инты басьтэ советской воинъёслэн дано Брестской крепостез утён понна нюръяськемзы. Крепостьын асьсэлэсь улонзэс жалятэк ожмаськем адямиос сярысь тросэз писательёс устоесь романъёс, повестьёс гожъяло. Брестской заставаысь пограничникъёслэн вунонтэм подвигзылы, сьӧсь тушмонлы пумит нюръяськемзылы сӥзем аслэсьтыз повестьсэ Казахстанысь писатель Сергей Мартьянов но. «Нырысь залпъёс» шуыса нимам со книгазэ.

Выль произведениезлы материалъёс люкан бордын ужамез сярысь со тазьы вера: «Пограничной войскоослэн центральной архивазы ветлыса, отысь мон шедьтӥ кыкетӥ погранзаставаын ожмаськем солдатъёслэсь но офицеръёслэсь списоксэс. Ваньмыз отын куатьтон боецъёс но командиръёс служить кариллям. Соос пӧлын вылӥллям ӟучъёс, украинецъёс, казахъёс но одӥгез удмурт пи. Куатьтон мурт пӧлысь куатез коммунистъёс но куамын тямысэз комсомолецъёс...».

... Одӥгез удмурт пи. Та кылъёсты лыдӟыса, кинлэн, кыӵе журналистлэн яке писа-тельлэн тодэмез уз поты Брестской крепостез утёнын ожмаськем адями сярысь. Одно ик асьме республикаын вордскемын луоз со удмурт пи. Озьы малпалоз котькудӥз лыдӟись. Чылкак сыӵе малпанэн ик мон но ӝегатскытэк кутски удмурт героез утчаны. Трос юрттӥзы мыным Удмурт научно-исследовательской институтын ужасьёс.

— Утчалэ, одно ик утчалэ, — дэмлазы соос мыным, Брестской крепость сярысь куд-ог материалъёсынызы тодматыса. — Шимес война аръёсы удмурт нылъёс но пиос котькытчы вуылӥзы но калыклэсь шудзэ утён понна нюръяськонын юн мылкыдзэс, сазь луэмзэс возьматӥзы. Ӝутоно асьме батыръёслэсь данзэс. Вань калык мед тодоз соосты. 

Нырысь ик со удмурт пилэсь нимтулзэ но кытысь луэмзэ юаса, гожтэт лэзим погранич-ной войскоослэн архивазы. Кема ӧз ӝегатэ, соку ик ивортӥзы. Гожтэтазы тазьы верамын вал: «Брестын ожмаськем удмурт пилэн нимтулыз Александр Егорович Алёшкин, ворд-скемын со 1919 арын, армие басьтэмын 1939 аре, дышетскемез сизьым класс, комсомо-лец, служить кариз 17 погранотрядысь кыкетӥ заставаын, стрелок луыса. Тӥни ваньмыз, мар тодӥськом ми тӥляд землякты сярысь...»

Ваньмыз вань, нош кытын вордскемез но кытысен армие кошкемез тодмо ӧвӧл. Мар кароно на бен табере, кыӵе амал шедьтоно кутскем ужез йылаз-пумаз вуттон понна, кинлэсь юалляськоно? Сокем ик капчи вылымтэ со. Нырысь ик республикаысьтымы ад-ресной бюрое мыныны кариськи. Шуныт пумитазы монэ отын. Мар пумысен лыктэмме верай но адресной бюролэн начальникез Галина Константиновна Капустина соку ик та кулэ адямиез утчаны кутскиз. Вить минут но ортчыса вуиз-а, ӧз-а, выльысь мон доры лыктӥз. Ымнырызъя ик шӧдӥ: ӧвӧл сыӵе мурт.

— Номырин но юрттыны уг быгатӥськы, — ӝожмыт тусын вераз Галина Константиновна. — Ӧй шедьты утчано адямидэс.

Лыктэм бере буш киын кошкеме ӧз поты, выльысь юан сётӥ солы:

— Нош мукет нимоосыз вань-а Алёшкинъёс?

— Сыӵеосыз бен вань, трос соос. Дасо мында люкаськизы Алёшкин фамилиен удмурт адямиос. Ваньзы ик асьме республикаын улэмын, кудӥз али ке но татын на. Кош-кемъёсыз вань Дальний Востокын, Марийской республикаын но Кировской областьын. 

Озьы, кытын ке Алёшкинъёс вань, огзэ но кельтытэк, ваньзылы гожтэт ыстӥ. Вералэ, шуисько, ӧй вал-а тӥляд Александр Егорович Алёшкин нимтулын ӵыжы-выжыды, эшты яке тодмо адямиды. Вань ке, ивортэ ӝоггес милям редакциямы. 

«Кытысь, кыӵе ивор вуоз меда?» — ялан со сярысь малпаськыса улӥ. 

Гожтэтъёс келяме дырысен кык-куинь нунал ортчыса вуиз нырысетӥез ивор. Сое ыстэм Ижевскысь 9 номеро технической училищеын дышетскись пияш Миша Алёшкин. Гожтэтаз со вакчияк гинэ верам: «Александр Егорович Алёшкин мынам родной дядяе, мукет сямен вераса, анайлэн выныз. Вордскемын со Татариын, Балтасинской районысь Ст. Кушкет гуртын. Ми ум тодӥське вал дядямылэн Брестской заставаын ожмаськон дыръя быремез сярысь. Бадӟым тау карисько сыӵе шумпотымон ивор вуттэмды понна. Озьыен, саптамтэ со удмурт калыклэсь но милям семьямылэсь данзэ, лек ожмаськонын герой сямен бырем...»

Дас сизьыметӥ погранотрядысь кыкетӥ застава сылӥз Брест город дорысь Новоселки гуртын. Отын начальник луэ вал азьвыл младшой лейтенант Василий Горбунов. <...> Алёшкин пумысен гожтэтаз со тазьы гожтэ: «Брестской погранотрядысь кыкетӥ заставаен кивалтыкум Александр Алёшкин мон дорын служить кариз. Война кутскемлэсь азьло, мукет пограничникъёс сямен ик, граница дурын солдат вань ужъёсты умой быдэсъяз. Востэм пияш вал со, лякыт сямо, капчи мылкыдо. Ӟеч сямыз понна ик гажазы сое эшъёсыз но, командиръёс но. Боевой но политической дышетсконын котьку отличник луоз вал. 

Сьӧсь тушмонъёс но соослэн гыжкалъёссы граница вамен туж ӵем поталляны выризы. Но кунгож вылын соослы вань сюресъёс пытсамын вал. Пограничникъёс котьку сак улӥзы. Мынам тодам лыктӥз таӵе учыр. 1941 арын январь толэзе вал со. Ӵукна ньыль час ёрсын. Буг шур вамен асьме музъем вылэ выжиллям кыӵе ке тодмотэм муртъёс... Соку нарядын сыло вал Алёшкин но Орлов пограничникъёс. Асьсэ участоксэс эскерон сяме-нызы соос тыпы арама дорысь куинь адямиослэсь пытьыоссэс адӟизы. 

— Юнме шорысь ӧвӧл та, — шуиз соку эшезлы Алёшкин.

— Витьымтэ куноос вуиллям, — вераз Орлов.

Умой-умой эскеризы, чаклазы-мертазы но шуизы: ӝегатскытэк тревога ялоно. Кулэ сигнал сётӥзы но асьсэос ӝогак гинэ со пытьыос кузя мыныны ӧдъязы. Ӝегатскыса улы-ны дыр ӧй вал угось, кырмоно лушкем ветлӥсь «сьӧсьёсты».

Границаысен вить иськем ёрос кошкыны вуиллям вылэм ини сьӧрлось лыктэм куинь адямиос. Алёшкин эшеныз ӵош соосты кырмизы. Со куспын ик вуизы тревогая ӝутэм по-граничникъёс но. Отысен шараяськиз ини границаез тӥясьёслэн зэмос ымнырзы: юн вооружить карем контрабандистъёс вылӥллям. 

Асьсэлэсь ужзэс ӟеч быдэстэмзы понна Алёшкинэн Орловлы соку премия сётӥзы, благодарность ялӥзы. 

...Каргам войналэн нырысь ӵукнаез — 1941 ар 22 июнь. Сьӧсь тушмонлэн снарядъёсыз но бомбаосыз нырысь ик пуштылӥзы ми вадьсын, соос нырысь ик усьылӥзы ми вылэ. Стрелок Александр Алёшкин кышкатэк нюръяськиз синазькыль фашистъёслы пумит. Сӧсырмыны ке но шедиз, ожмаськонысь со ӧз кошкылы, ялан стройын вал.

Граница дурын тушмонэн нырысь пумиськон бере куатьтон мурт пӧлысь ми сизьым кузя гинэ кылимы на. Шуд понна нюръяськонын бырыны шедиз сазь мылкыдо, кыш-касьтэм удмурт пи Александр Алёшкин но. Шимес войналэн нырысь нуналаз ик эшъёсынымы пырак азелы люкиськоно луим. Мар карод, война — со война«.

Туж уно батыръёс быризы яратоно Родинамылэсь данзэ, калыклэсь бадӟым шудзэ утён понна нюръяськонын. Соослэн нимъёссы ноку но уз вунэ, ялан улозы калык пӧлын.

Вас. Иванов».
(«Азьлане» № 47, 21 апрель 1965 ар)

Редакцилэсь: статьялэн героез Александр Алёшкин пумысен туннэ нуналэ споръяськоно малпанъёс вань. Пӧртэм источникъёсын ог-огзылы пумит луись тодэтъёс, валамтэос пумисько угось. Соин но та статья кинлы ке но ас выжыдэ эскерон борды басьтӥськыны яке эскеронэз азьланьтыны мылкыд сётоз шуыса малпаськом.