Быдӟым ожлэн «туала» пытьыосыз

Кышкыт но шимес Быдӟым Атыкай ож. 27 миллионлэсь трос улон чигемын, соос пӧлын али гинэ улыны кутскем егит нылъёс но пиос. Кӧня сюрс семьяос шудэз но яратонэз валатэк кылемын. Нош кӧня ожгарчиос пыраклы тодмотэм, мурт шаере быремын...

Быдӟым Атыкай ожын Вормонлэн 80-тӥ тулысэз но яркыт, шумпоттӥсь мылкыдъёсын пачылмиз. Кин ке арысен аре та праздникез гуртын пумита, кин ке парад учкыны мынэ, кин ке семьяез пӧлын ӵыжы-выжыоссэ буре вае, кин ке выжыысьтыз героез сярысь ивортэ. Котькин понна Вормон нунал аспӧртэмлыко нунал. Вань адями та бадӟым праздниклэсь пуштроссэ вала, со — Быдӟым тыложе пыриськем ожгарчиосты буре ваён, соослэсь подвигзэс, кужымзэс, сётскымтэзэс данъян.

Малпасько, Вуж Ципья гуртын улӥсьёс но выльдэм памятникез таӵе ик ӝутскем мылкыдын пумитазы. Туннэ нуналэ Вуж Ципья гуртын 20 пала улоно коркаос гинэ кылемын ини, улӥсез но трос ӧвӧл. Ожысь ветеранъёс ӧвӧл ни, тылысь ветеранъёс но ожлэн нылпиосыз гинэ кылемын. Но вань гуртъёсын кадь ик, татын но пуштросо ужрадъёс ортчытӥськытэк уг кылё.

7 куартолэзе гуртысь калык, ёросысь кивалтэт но куноос люкаськизы выльдэм памятникез усьтыны. Ужрадэз Ципья лулчеберетъя юртлэн директорез Елена Демеева но устолыкъя кивалтӥсь Евгения Михайлова нуизы. Выступлениосынызы ужрадэз чебертӥзы Ципья шоръёзо школаысь дышетскисьёс.

Ципья гурт поселенилэн аскивалтон ёзэтаз ужасьёслэн верамзыя, огъя 177 000 манет тыр уж быдэстӥськем. 

— Мукет гуртъёсын памятникъёс туж чебересь адӟисько. Милям нош вуж, киын лэсьтэм памятник сылӥз. Валамон ини, дыр ортчыса, тусэз но ышиз, куашканы но кутскиз. Котьку вожъяськыса учкиськом вал: татын митинг ортче, отын выль памятник усьто. Милям гуртын кызьы пуктӥзы, озьы ик сылӥз. Нош туэ милемлы но шумпотон вуиз: гуртамы памятникез выльдӥзы. Макем бен чебер со, синмез басьтыны но уг лу. Тау шуиськом ваньзылы, кин та уж борды кизэ йӧттӥз. Зэмзэ но бадӟым кулэ уж та. Ми пичи дыръя ожысь ветеранъёс трос вал ай, табере ми но пересьмим ини (серекъяло). Соос туж секытэн верало вал ож дыръёсты. Котьку синкылиен тодазы вайылӥзы, кызьы сютэм улӥзы, тушмонъёсын ожмаськизы. Весь пель сьӧрамы соослэн «нылпиослы адӟыны медаз кылды милесьтым адӟонъёсмес» шуыса верамзы. Нош тани та памятник вань бырем гуртоосмес «улӟытэ» кадь. Сомында аръёс ортчыса ке но, гуртэ берытскизы. Табере соос будӥсь нылпиослэн син азязы уло. Шумпотӥськом, синкыли пыр ке но, — ивортӥзы Вуж Ципья гуртысь арлыдоос. 

— 1995 арын Вуж Ципья гуртын покчиёзо школа усьтӥзы. Татын директор луыса Аксакова Елена Анатольевна ужаз. 1996 арын школа доры ик Быдӟым Атыкай ожын быремъёслы нимысьтыз памятник пуктӥзы. Школаын ужаку, ми сое утялтӥськом вал. Ваньмыз та гуртысь 182 мурт фронтэ кошкемын шуыса тодмо. Соос пӧлысь 134-ез быремын, вормонэн 48 адями бертӥз. Тӥни со 134 ним пусйиськыса кылиз вуж памятникын. Туэ та памятникез выльдӥзы. Но 48 бертыса улонысь кошкем ожгарчиослэн нимъёссы пырытэк кылемын. Тани али со нимъёсты выльысь гожтыса, пумаз-йылаз вуттоно, — вераз Ципья лулчеберетъя юртысь устолыкъя кивалтӥсь Евгения Михайлова.

Табере калыклы юн тыршыны кулэ памятникез чебер, чылкыт возён понна. Со одӥг адями понна гинэ лэсьтэмын ӧвӧл ук, быдэс гурт понна пуктэмын! Котькуд юртысь, котькуд семьяысь кин ке кошкемын, улонзэ сётэм яке вормонэн бертэм. Соосты данъяса, буре вайыса, памятникез утялтыны сьӧлык уз луы.

Вылын Ушма гуртын но туэ калык шумпотыса пумитаз Вормонэз. Татын Быдӟым Ожысь быремъёслы стела усьтӥзы. Татын но гуртысь быремъёсты табере нимзыя тодо.

Ӟаны гуртысь лулчеберетъя юртын 8 куартолэзе «Вормон тулыс» шуыса нимаськись концерт радъяськиз. Ципья лулчеберетъя юртысь артистъёсын валче соос Быдӟым Вормонлэн 80 ар тырмонэзлы сӥзьыса патриот мылкыд пыӵатӥзы. Татын чузъяськизы ож дырысь но ож сярысь кырӟанъёс, эктонъёс, пуштросо кылбуръёс лыдӟемын вал. Лулчеберетъя юртлэн холлаз аспӧртэмлыко адӟытон но радъямын вал. Татын учкисьёс адӟыны быгатӥзы Ӟаны гурт поселениысь Быдӟым Атыкай оже кошкемъёсты но ожын быремъёсты.

Жаляса вераны гинэ луэ, бушын концерт луыса но калык трос ӧз люкаськы. Чебер, туала заллэн ӝыныез гинэ тырмемын вал. Самодеятельной артистъёс калык понна тыршизы кӧня ке шутэтскон вакыт кузьманы, лулчеберет удысэн матынгес тодматыны, нош калыклы мар гинэ кулэ меда? Мон понна та валантэм. Адямилэн тыршемез котьку дунъяськыны кулэ кадь, нош татын ныр улад ик сыӵе зол дасям концерт, вылаз ик Вормон нуналэз сӥлы карон… Тӥни озьы ик калыкъёс пӧлын огазеяськон но эшъяськон кусыпъёс чигисько, дыр.

Концерт туж усто радъямын вал. Артистъёслы, юрттӥсьёслы бадӟым тау шуыны кулэ дорысь ужъёссэс кельтыса, концертлы дасяськемзы понна. Лыктэм калык, учкисьёс артистъёсты шунытэсь кичабонъёсын пумитазы.

9 куартолэзе Ципья гуртын «Калыкъёслэн эшъяськонзы» шаертодонъя музеез кылдытӥсьлы, Быдӟым Атыкай ожысь ветеранлы, лулчеберетъя удысысь сӥё-дано ужасьлы, РСФСР-ысь но СССР-ысь калык просвещенилэн отличникезлы, Балтась ёрослэн сӥё-дано кунмуртэзлы Галиев Гарифзян Галиевичлы бюст усьтон ужрад ортчиз.

Татчы люкаськизы ваньзы, кин ас дыраз Гарифзян Галиевичен ӵош ужаз, дышетӥз, эшъяськиз. Лыктӥзы солэн дышетскисьёсыз, ӵыжы-выжыосыз. Сӥё-дано ужрадэз усьтӥз музейлэн экскурсоводэз Сания Бариева. Со вераз Гарифзян Галиевичлэн вордскем дырысеныз ортчем сюрессэ. Собере кыл веразы Балтась ёрослэн главаез Рамиль Нутфуллин, ТР-ысь Тазалыкез утёнъя министрлэн нырысетӥ воштӥсез Альмир Абашев, «Калыкъёслэн эшъяськонзы» музейлэн директорез Сайдаш Нурмиев. Соос Гарифзян Галиевичлэсь трос тыршемзэ пусйизы но солэсь ужзэ азинтыны оскытӥзы.

Ужрад бюст азе сяська пононэн йылпумъяськиз. Котькудӥз лыктэм адями дан сётӥз солы, кудӥз быдэс элькунлы тодмо луись музеез кылдытӥз но солэн азинсконэз понна вань кужымзэ сётӥз.

Таӵе но трос мукет ужрадъёсын тодэ кылиз туэез Вормон нунал. Бен, арысен аре шаерамы ветеранъёслэн лыдзы шӧдскымон кулэсме. Но таӵе ужрадъёс пыр асьмеос улӟытӥськом историез, со кыле нылпиослэн йыръёсазы но сюлэмъёсазы.