Даурозь одӥг вамыш гинэ

Юбилей нуналаз ик дораз вуыны ӧз кылды ке но, юбиляр песянай доры одно ик мыноно шуыса малпай. Соин выль арнялэн кутсконаз ик дораз дыртӥ. Песянай шумпотыса пумитаз, азьло ик ӵыжы-выжыосы сярысь юалляськиз, собере гинэ аслэсьтыз улонзэ вераны кутскиз.

Улон асьмелы пӧртэм вакытъёс кузьма, куддыр шӧдытэк но кылиськод: нунал бӧрсьы нунал ортче, нош арез мукетыз ар воштэ. Адями ачиз гожтэ аслэсьтыз улон сюрессэ, со гинэ тодэ, кыӵе куддыр нюко-гопо луэ со.

1934-тӥ ар… Шаерамы гуртъёс азинско, колхозъёс но совхозъёс кылдо, семьяос кылдо, нылпиос вордско. Со дыре гурт возёсъёс нырысетӥ радын сылӥзы на, династиосын ужась семьяос, калыкен ӝутэм фермаос но гидъёс. Ваньмыз огшоры калык киын лэсьтэм юртъёс. Нокин но уг малпа на шимес дыръёс сярысь. Адями югыт азьпалэзлы оскыса улэ. Но льӧль малпанъёс мукет ласянь берытско. Та сярысь берлогес…

Таӵе кырӟан чуръёсын Ольга Григорьевна аслэсьтыз котькуд нуналзэ пумита:

Ӵукна вырӟыса чайме пӧзьтӥсько,

Сакырен гинэ юисько.

Азям пуктыса вордэм нуныкаосын,

Ракат гинэ улӥсько.

Та тынӥсь улон вакытлэн шуркынмоназ ик Вукогуртын вордӥське Ольга нимо нылаш. Григорий Владимирович но Мария Сапаровна Владимировъёс понна та нырысетӥзэ  анай-атай луон вакыт. Егит кузпалъёс понна та кылкутымон, нылпиез пыд йылаз султытоно, будэтоно. Ужан сюрессы интыысь колхозэн герӟаськиз: ожлудэ кошкытозяз Григорий Владимирович колхозлэн председателез луиз, нош Мария Сапаровна пӧртэм ужъёсты быдэстылӥз.

Куинь ар ортчыса, 1937 арын, вордӥське кыкетӥ нылзы – Зинаида. 1939 арын нош ик одӥг сузэрзы вордӥське. Улон каллен радъяське, Владимировъёслэн семьязы ялан йылэ. Вуэ 1941-тӥ ар – сьӧд пилемъёсын но киськись горд вирен сураськем вакыт. Кин малпаз на соку, шаермылэн улонэз ньыль арлэсь трослы тушмонэн нюръяськонлы сӥземын луоз шуыса?! Озьы ке но, калык йыг-йыг сылӥз, мылкыдыз ӧз куашка, вормон понна котькуд адями вань кужымзэ сётыны тыршиз. 1942 арын Владимировъёслэн семьяязы нырысетӥ пизы вордӥське – Василий. Жаляса верано, соослэн улон сюрессы сыӵе ик кема ӧз кыстӥськы, кулэмын ини. Соос пӧлысь Ольга Григорьевналы гинэ сыӵе дано лыдпусэ вуыны шуд усем, уга.

– Пӧртэм сямен улыны тупаз. Умой но, начар но улӥм, соку дырез но сыӵегес луиз ини. Атаймы жугиськонысь вазь бертӥз, соиз гинэ шумпотымон. 1942 арлэн 19 толсураз сое басьтӥзы, колхозлэн председателез шуыса берлогес басьтӥзы. Ожын кема луыны кылдымтэ, пыдтэк кыльыса, госпитале сюрем. Отын кӧня ке дыр ӵоже улэм на. 1943-тӥ арын, инвожое, гуртэ бертӥз ини. Вынмылы соку одӥг арес вал. Бадӟым семьяен улӥм, – шуыса веранзэ кутскиз Ольга Григорьевна.

Зэм, со дыре бадӟым семьяос – со самой ӵем пумиськись гурт тодмет. Макем бадӟым семья – сокем шудо но шулдыр гуртлэн улонэз.

– Пумозяз дышетскыны луонлык ӧз кылды. 7 классэз гинэ йылпумъяй. Дышетскыны дыры уг тупа вал: нышырозь анай интые ужаны ветлӥ, нышыр бере школае дыртӥ, сётэм урокъёсты дасяны дыр уг кыльы вал. Эшшо пудо-живот, тылобурдо вордӥськом вал. Жугиськон вакыт пӧртэм луиз ини: ошен усыяны но потоно луылӥз, аран машинаен но араса ветлӥм, валлин машина вал ай соку, фермаын скал но кыски, кыскем йӧлэз йӧл-вӧй поттон заводэ но нуллӥ. Азьло скалъёс трос ӧй вал, нылъёсын быдэн 10 скал кыским. 10 скаллэсь дас кунян вордэм понна кунян но сётӥзы али мыным. Фермаын ужакум ик бригадирлы юрттӥсь карыса басьтӥзы монэ. Собере бусыын учётчик (бусыосты мертась – ред.) луыса ветлӥ ини.

Та ваньмыз ужен герӟаськем вакытъёс. Уж трос луиз, пӧртэм пумо техника луымтэен, троссэ киын быдэстоно луиз, озьы ке но яратон берпуметӥ интыын ӧй вал.

– Кушкетын мынам ӵыжы-выжыосы уло вал, соос ик монэ торф поттыны ӧтизы, со понна кӧня ке дыр гинэ сётӥське вал. Соку ик тодматским картэным. Вукогуртэ ветлылӥз, собере армие кошкиз. Со дыре колхозамы вербовщик лыктӥз, адями курыса. Милям колхозмы вить нылъёсты лэзиз, мукет колхозъёс но лэзизы. Ваньмы 10 нылъёс люкаськыса, Комие кошкимы, Кудымкар городэ пыртӥзы кадь. Отысен нюлэске ужаны потӥм. Комиын ӝыны ар улӥмы: ноябре кошкимы, май толэзе бертӥмы. Тӥни отысь бертыса кык толэзь улӥ но, дӧдьыен лыктыса монэ Кушкетэ вайизы. Озьы 23 аресэн Кушкет кен луыса лыктӥ. Одӥг чарка чай юи но торф поттыны васькытӥзы. Весь верасько вал: «Мон Кушкетын одӥг чарка чай юи ужатэк». – Улыны муш умортое лыктӥ. Одӥг пичи коркан 14 кузя адями улӥмы. Мон песяйлэн бурд улаз улӥ, со туж каньыл сямо но небыт сюлэмо вал. Котькудмылы уж тырме вал. Мон ву нуллӥсько, корка утялтӥсько вал, быдӟымез кен пудо сюдӥз. Ньыль ар ортчыса, соку кык нылпиосмы вал ини: Мария – 1959 арын вордӥськиз но Иван – 1961 арын, яна потӥмы, корлэсь корка пуктӥмы. Соку тросэз корлэсь пукто вал. Выль пуктэм юртэ потыку, арбериосмы но ӧй вал. Татын ини 1963 арын Любовь нылмы вордӥськиз, 1967 арын – Зоя, покчиез 1974 арын – Пётр пимы. Пудо вордӥмы, гуртын пудотэк нокызьы уг луы.

– Семья но уж сяна кыӵе ке егитъёслэн пумиськон дыръёссы луизы-а?

– Мон кадь егит кенъёс туж трос вал гуртын, ма адямиез но трос вал. Сиён тырмымтэ аръёсы тросэз Малмыж улосэ, Марий Эл пала кӧчизы. Кушкетъёс Марий Элысь Лом палан трос. Бадӟым гурт вал ай со соку. Бызьытозям Кушкетэ семык возе ветлӥсько вал, татчы улыны лыктэм бере со возе ветлэмме уг тодӥськы ини. Мукет егит кышномуртъёсын люкаськыса пӧртэм праздникъёсы ветлӥськом вал.

Озьы ас радызъя мынӥз Ильмурзинъёслэн улонзы. Нокинлы ӝожтӥськытэк, ас кужыменызы вань секытъёсты ортчыса, нылпиоссэс адями радэ поттӥзы.

– Кузпалэ нылпиосыз туж яратӥз, нылпиос но бордаз кыстӥськизы. Куддыр одӥгзэ маялтӥз ке, соку ик мукетыз бордаз лякиськылӥз. Атай йӧно ӧз ке луы, со доры лыктозы, шат?

Тазьы ортчизы аръёс. Семья арысь аре йылӥз, вордӥськизы пиналъёс. Туннэ нуналлы Ольга Григорьевна яратӥсь анай гинэ ӧвӧл, солэн 7 внукез но 5 правнукез. Узыр песянайлы та сяна мар кулэ на?

– Мыным али номыр кулэ ӧвӧл ини. Пиналъёс быдэ вуэмын, ваньзылэн ас семьяоссы вань, нылпиоссы. Соослэн шунытэнызы но утялтэменызы шумпотыса улӥсько. Ваньзы сӧл-таза, таиз мон понна самой бадӟым шумпотон ини. Мон соин шудо, вань пиналъёсы люкасько. Берлань берытскыны луонлык сётысалзы ке, номыр ӧй воштысал, та улонме ик улысал.

Ольга Григорьевна 7 арзэ ини Иван пиезлэн семьяяз улэ, Малмыж улосысь Калинино гуртын.

– Инмарлы тау, кенэ но, пие но утялто. Улонэ али туж умой, ӝожтӥськонъёсы ӧвӧл, кунмы пенси но тыре. Мар кулэ ваньзэ басьто, утё, гажало. Шумпотыса, ракат улӥсько. Азьло кӧня ке кенлы юрттӥсько вал, али тазалыке лябӟиз, ачиз но уг косы ни. «Тӥни бамъёсыд гордэктӥллям ини, давлениед будоз», – шуэ со. Вань нылпиосыным данъяськисько. Туж шумпотӥсько соослэн вормонъёссылы.

Песяйлы сӥзёнъёс гожтыны косӥзы. «Тазалык», «шудбур», «каньыл улон» кылъёс уз луэ. Соосты песяйлы 90 ар ӵоже верало ини. Вазиськисько газетэз лыдӟисьёслы! Аслам песяе шоры учкыса верало: жингыръялэ пересьёстылы, адӟиське соосын, бертэлэ! Вашкала но туала улонэз адӟем, секыт вакытъёсты ортчем адямиослы мукет номыр кулэ ӧвӧл нылпиоссы, внукъёссы, ӵыжы-выжыоссы сяна. Ми но пересьмом, шуд усиз ке. Котькинлы кема дыр сётымтэ. «Эх, вал ук мынам но, малы меда ӧй...» шуоно медаз луы. Та гожтэмме лыдӟемды бере соку ик звонить каре песяй-бабайёстылы, ӵужанай-ӵужатайёстылы, анай-атайёстылы. Песяе, телефондэ дася, мон но али тыныд пеляд одӥг серем учыр верало, серекъялом! Собере мукетъёсыз но звонить карозы. Витьы! 100 аресад та вераськеммес тодамы ваёмы! Одно ик!                                           Тонэ яратыса, Анай, песяй, пересь песяй, чузяй шуисьёсыдлэн нимыныз Юлия внучкаед.