Ӟеч лу, тол! Ӟечбур, тулыс!

Вӧй арнялэн берпуметӥ нуналаз, 22-тӥ тулыспалэ, 14.00 часын, гуртысьтымы лулчеберетъя юртмы азьын кырӟанъёсын но эктонъёсын Вӧйдыр шулдыръяськон ортчиз. Гуртын улӥсьёс мыло-кыдо пыриськизы праздник ужрадэ. 

Шулдыръяськонэз кутскыку, ваньмызлы азинлык, юн тазалык, тужгес валтӥсез — йыр вадьсамы сайкыт инбам сӥзимы. 

Вӧйдыр — со шулдыр но яркыт праздник, кудзэ котькин яратэ. Вӧй арняе калык толэн люкиське но тулысэз пумита. Праздниклэн тодметъёсыз луо шунды, табань но куро мунё — Вӧйдырлэн тодметэз. 

Ужрадлы аспӧртэмлыко калык шӧм пыӵамын вал: ӟуч калык крезьгуръёс, шудонъёс, вожвылъяськонъёс, кытын вормисьёс но пыриськисьёс кузьымъёс басьтӥзы. Празднике лыктэм куноос Наиля Ивановаен дасям ческыт табанен кунояськизы, нош Инна Рамазанова но Людмила Тургузёва мылкыд карисьёсты пӧсь чаен но ческыт сиёнъёсын утялтӥзы. 

Гурт калык, люкаськемъёс шумпотыса но эшлыко пыриськизы калык шулдыръяськонъёсы, шудонъёсы, бадӟымъёс понна дасям вожвылъяськонъёсы: куасэн бызьылонэ, гынсапег куянэ, пуйыен бызьылонэ, ледянкаен нискыланэ, туп ӵыжанэ но «чорыганэ». Палэнын нылпиос горшок пыргытӥзы, шаръёсты пуштытыса, дартсэн шудӥзы, нискылазы! Вань вормисьёсты кузьымъёс витизы. 

Праздник пумын, дышем сямъя, куро мунёез ӝуатӥмы. Вӧйдырлэсь сульдэрзэ ӝуатон возьматэ толэн люкиськонэз но тулысэз пумитанэз. Мунёез дасяз Олег Михайлов. Сям-йылолъёсъя, тулыс мед вуоз шуыса, сульдэрез сутыны кулэ. Лыдъяське, вань шуг-секытъёсмы но сюлмаськонъёсмы соин ӵош кошко шуыса. 

Праздниклы «Масленица» нимо буёло стенд кылдытӥзы. 

Тау кариськом вань лыктэмъёслы мыло-кыдо пыриськемзы но ӟеч мылкыдзы понна! Таиз тулыс асьмелы трос шумпотон но азинлык мед ваёз.
Вӧйдыр шулдыръяськонъёс эшшо огпол возьматӥзы, калык йылолъёс улэпесь но калыклы туж кулэ шуыса. Соос юртто поколениослэсь кусыпъёссэс юнматыны, лулчеберет ваньбурез, мерасэз утьыны, огазеяськон но шумпотон мылкыд кылдытыны. 

Нош кыӵе луысал шулдыръяськон спонсоръёстэк? Котьку юрттыны мылкыд каро «Сурнай» общество (Фагим Хакимуллович), «Фармат» магазин (Марат Фаритович), «Стройматериалы» магазин (Рустам Раисович) но ужбергатӥсь Ильмир Ильдарович. Тӥни озьы, ог-огмылы юрттыса, шулдыръяськонъёсынымы гурт калыклы шумпотон вайиськомы.

Галина Петрова,
Покчи Лӧзя лулчеберетъя юртысь устолыкъя кивалтӥсь