Егитэсь, задоресь но шудоесь

2024 арлэн но пумыз вуэ. Али ваньмы арлы йылпумъянъёс лэсьтӥськом, выль арлы ужпумъёс пуктӥськом. Семьяын талы эшшо но юнгес саклык висъяське. Ведь семья писпулэн вайёсызлы укша. Асьмеос ваньмы пӧртэм ӧръёсын азинскиськом, будӥськом, но выжыосмы котьку огазе уло. 

Кӧня пол гинэ асьмеос кылӥськом: семья — адямилэн самой бадӟым узырлыкез. Семья — со кужым, со уродэзлэсь палэнскон, со азинскон. Зэмзэ но со шонер веран. Семьяын ог-огедлы пыкет луыса, ог-огдэ гажаса улоно. Макем тон семьядлы трос кужымдэ сётӥськод, сокем тынад семьяед чебер сяськаяське, пушъе, куасалтонтэм луэ.
Сыӵе семьяос пӧлы пыре Юлия но Алексей Григорьевъёслэн егит семьязы но. Соослы али 28 арес. Туннэ нуналэ соос Балтась каргуртын уло. Будэто кык нылъёсты. Та статьяын тӥ лыдӟоды, кызьы соослэн сюресъёссы герӟаськизы но кызьы соос ог-огзылы оскымон пельпум луыса уло.

— Юля, тодматы милемыз семьяеныд но кузпалэныд кусыпъёсты радъяськемзы сярысь?

— Мон вордӥськи Улын Ушма гуртын, огшоры ужась семьяын. Туннэ нуналлы анае гинэ вань, Любовь Степановна Никитина, огназ улыны кылиз. Апае кемалась быземын ини, аслаз семьяеныз улэ. Кузпалэ — Алексей, вордӥськемын но будэмын Балтась посёлокын. Мон солэсь атайзэ — Сергей Анатольевичез — школа дырысен туж умой тодӥсько ини.(Сергей Григорьев — ёросамы куасэн бызьылонъя тодмо тренер — Ю.Щ.). Со милемыз школаын дышетӥз. Солэн сыӵе пиез вань шуыса тодӥсько ни вал. Анаез — Юлия Васильевна. Вань Кирилл выныз, со школаын дышетске, Марина сузэрез Балтасьысь йӧл-вӧй поттон заводын ужа. Эшшо вань на пересь песяймы — Любовь Григорьева, солы али 70 ареслэсь трос. Пересь песянаймы милемлы покчи нылмес вордыны но утьыны туж юрттэ. Мон уже интыяськи бере, со утьыны соглаш луиз. Бадӟымез нылмы — Милана, солы али 6 арес, покчиез — Ефросинья, солы 1 арес но 7 толэзь. 

Алёшаен ми тодматским мерлыко вотэс пыр. Соку мон «Annam» магазинын ужасько вал. Со гожтӥз: «Ойдо, тодматском». Мон пумит ӧй луы, «Ойдо», шуи. Ӵапак соку магазинын луэм со, но монэ адӟымтэ вылэм. Озьы тӥни каллен вераськыны кутским, ог-огмес тодыны, ньыль толэзь ортчыса, ӵош улыны кутским ини. Ӝоген кузпалъяськыны но малпамы. Шумпотӥсько: семьямы будэ но ваньмыз ас радызъя мынэ. Ваньмы сӧл-таза, таиз самой валтӥсез мон понна.

— Милана ним калыкын ӵемгес пумиське ке, Ефросинья ним паськыт вӧлмемын ӧвӧл. Кин малпаз та нимез?

— Азьвыл ик ми картэным тазьы вераськимы: ныл луиз ке Алёша ним сётэ, пи луиз ке — мон. Ныл луоз шуыса верамзы бере, ми тазьы кенешим: мон кык ним ӵектӥсько, мукет кыксэ — Алёша. Пумаз одӥг нимен кылим: мынам вал — Ефросинья, кузпаллэн — Пелагея. Солэн туж потэ вал сыӵе ним понэмез. Мон соглаш луиськем вал ини. Пиналэз ваеме бере, мон юаса лэзи: «Кызьы нылмес нималомы?» Али роддомысен ик свидетельство лэсьтоно ук, соин ӝоггес малпаськоно луиз. Оглом семьяен, ӵыжы-выжыосынымы кенешыса, Ефросинья ниме вуим. 

— Кызьы тӥляд али улонды радъяське?

— Мон ужасько Балтасьысь сиён-юон магазинын вузкарись луыса, асьмелэн ёросамы мукет уж ӧвӧл ук. Кузпалэ кемалась дырысен ини МЧС-ын ужа. Каллен тани корка пуктӥськом. Кык нылъёсмес будэтӥськом. Атаймы (Алексей — ред.) валтӥсь уженыз сяна, лулчеберетэн но матын кусыпъёс возе. Ӝыт вуиз ке, милям концерт выллем радъяське ини. Атайзы шудэ, Милана кырӟа яке эктэ, вӧзазы покчи нылмы но каллен кыстӥське ини. Со кырӟаны уг быгаты али, соин эктыса-бергаса ке но курадӟе. Мыным, кылсярысь, лулчеберет туж матын ӧвӧл. Бен, школаын дышетскыкум, Галина Денисовна пӧртэм кырӟанъёсы, эктонъёсы пыртэ вал, но али мыным со палэнын ини. Мыным кельше пӧраськыны, семьяме ческыт сиёнъёсын сюдыса возьыны.

— Тӥ али анайзы-атайзыеныды валче улӥськоды. Кыӵе юрттэт соослэсь тӥледлы сётӥське?

— Соос милемлы туж юртто, тау шуыны туж ӧжыт луоз, дыр. Валтӥсез юрттэт нылпиосын герӟаськемын ини. Соосты нылпи садэ нуоно-ваёно, ми ужын луимы ке, та ваньмыз соослы йӧтэ ини. Корка пуктонын но соос оскымон адямиос. Огазе улӥськом, ваньзэ ӵошен лэсьтыны тыршиськом. Вашкала дыре но семьяос туж бадӟым вылӥллям ук, соин та семьялэн туж умой тодметэз шуыса малпасько.

— Табере, ойдо, мургес Милана нылды сярысь вераськом. Кемалась ӧвӧл тӥ данъетан ужрадэ ветлӥды. Кытысен солэн сыӵе тунсыкъяськонэз кылдӥз?

— Милана пичи дырысеныз ик крезьгурлы, сценалы кыстӥськиз ини. Со ветлыны но крезьгуръёсын дышетскиз кадь. Телефонэн музыка кельтӥськом, со отчы мынэ вал. Покчи нылмылэн но сыӵе сямыз шӧдӥське. Апаез сьӧры кыстӥське, кырӟаса-бекыръяськыса ветлэ. Нылпи садаз но визьнодасьёсыз Миланаез котькытчы пыртыны тыршо, малы ке шуоно возьдаськонэз уг тоды, сцена вылын ассэ умой шӧдэ, кырӟа, эктэ, кылбуръёс вера. Котькуд ужрадэ мылысь-кыдысь пыриське. Визьнодасьёсыз котьку мылкыдзэ ӝутыны тыршо, котькытчы кыско. Милемлы, анай-атайлы но со туж данъяськымон, ми но котькуд ужрадэ пыриськыны тыршиськом. Призо интыос но мылкыдэз ӝутон понна одӥгез стимул луо, сотэк нокызьы. Нырысь ик мынам малпанэ вал сое гимнастикае сётыны, но спортэн тунсыкъяськонэз бадӟым ӧвӧл, соин аслаз мылкыдэзъя лулчеберет удысэз бырйиз. 

«О самом главном» конкурсэ пыриськыны но мылкыдэзъя вал. Со март толэзе ортчиз вал ини. Ӵапак тани «Мудорвай» конкурс ортчиз, висёнэн сэрен, дасяськыса ӧз вуттэ. Мазэ ватонэз, мылкыдэз усиз ини. Сокугес ик тани та конкурслэн йылпумъяськонэз вуиз, 2 инты. Буйгатӥмы, шумпотӥз ачиз но, награждение мыныны шуыса юри чебер дэрем басьтӥмы. 

Вуоно арын со нырысетӥ классэ мыноз ини. Школаын но мыло-кыдо пыриськись нылпи луоз шуыса оскиськом. 

— Миланалэн кыӵе мылкыдъёсыз данъетан ужрад бере?

— Со туж мылкыдо бертӥз. Концерт туж умой радъямын вал, пуштросо, югыто шоу, пӧртэм тылъёс, яркыт буёлъёс, эктонъёс, таӵезэ солэн адӟемез ӧй вал на. Шумпотӥз, награждениез туж возьмаз ини. Кӧня ке жадиз ик, калык но трос вал. Огъя 196 вормисьёс, но грамотаен кузьымзэ басьтэмез бере со куанэмын вал ини.

— Азьланяз вожвылъяськонъёсы пыриськон мылкыдэз ӧз куашка-а?

— Ӧз, со сцена вылын ассэ вуын уясь чорыг кадь шӧдэ бере, азьланяз но мыло-кыдо пыриськоз шуыса оскисько. Кельшымон удыссэ шедьтыса, быръем ӧнераз шумпотыса, бервыло мед ужалоз вал.

— Астэ шудо нылкышноен, анаен лыдъяны быгатӥськод-а?

— Мынам улонэ каньыл, озьы шӧдӥсько асме. Та ваньмыз лул буйгатсконлэсь потэ, дыр. Мон каньыл сюлэмо шуэме луэ, малы ке шуоно вань кулэез мынам вань: яратоно кузпалэ, нылъёсы, анай-атайёсмы сӧл-тазаесь. Нош маиз ӧвӧл на, со ваньмыз адямиен гинэ герӟаське. Асьмеос гинэ бырйиськом: азьлань вамышъяса, ужпумъёсты быдэстыны, яке интыяд пукыса, адямиос шоры учкыны. Самой валтӥсез — мынам вань яратоно семьяе, кудзэ мон льӧль малпанъёсам адӟисько вал. Шудо каро монэ мынам матысьёсы, ӵыжы-выжыосы, соин мон соослы бадӟым тау шуисько. 

— Семьялэн самой чеберез — со…

— Оскымон луон, яратон но осконлык, мынам малпамея, та самой валтӥсез семья улонын.

Семья — мерлыклэн вакытъёсын, дауръёсын чигонтэм но дунъянтэм тодметэз. Кужмо луэ-а адями семьяын? Шудо-а со семьяяз? Котькуд адямилэн аслаз валэктонэз. Асьмеос ум тодӥське, кызьы вошъяськоз адямилэн йырвизез ӵуказе, дасо аръёс ортчыса, но туннэ асьмеос семьялэсь дунлыксэ но узырлыксэ утьыны, семья йылолъёсты будӥсь нылпиослы вераны тыршиськом. Туннэ тӥ тодматскиды таӵе яркыт но егит семьяен. Миланалы азинсконъёс сӥзиськом, быгатонлыкъёссэ арысен аре будэтыса, азинтыса, аслыз тупась ӧнер бырйыса, улонын шудо адями мед луоз! Григорьевъёслэн улонзы азьланяз но шудо мед луоз, нош куспазы котьку яратон но шуныт мылкыдъёс мед улозы.

Тулыспалэ элькунамы «О самом главном» шуыса нимаськись вожвылъяськон ялэмын вал. Солэн пуштросэз — семья йылолъёсты утён но азинтон, семья кусыпъёсты юнматон, семьялэсь нылпиосты но егитъёсты визьноданын валтӥсь люкет луэмзэ возьматон, мерлыкысь духовно-нравственной инъетъёссэ кылдытон. Ӝыны ар пала татчы пӧртэм ӧръёсъя ужъёс ыстыны луэ вал. Ӵапак та конкурсын ик «Наша семейная традиция» номинациын Покчи Лӧзя нылпи садэ ветлӥсь Милана Григорьева 2 интыен пусйиськиз. Видео пыр соос шараязы асьсэлэсь улон радлыксэс, семья йылолъёссэс но мылкыдзэс.