Егитъёслэн киязы – быдэс дунне

Студентъёслэн нимаз ик яратоно праздниксы — со Татьяналэн нуналэз. Та ним юнме быръемын ӧй вал. Ӵапак 25-тӥ толшоре 1775-тӥ арын усьтэмын вал Москваысь университет. Со тупаз дун-чылкыт Татианалэн нуналэзлы. Отысен Татиана студентъёслэн утисьсы-чакласьсы луэ. Россиын та нуналэз студентъёс паськыт пусъё. Дырыз ӵапак сессилы тупа. Тросэз студентъёс сесси азязы али но солы вӧсясько, нимысьтыз сюсьтылъёс ӝуато. 

Туннэ тӥледыз Ципья шоръёзо школаез йылпумъяса али дыре КФУ-ын 1-тӥ курсын дышетскись студенткаен Ольга Кузнецоваен тодматэме потэ. Школа улоназ ик со котькыӵе ужрадъёсы мылысь-кыдысь пыриськиз ини. Элькун, ёрос вожвылъяськонъёсын вормонэн но призо интыосын пусйиськылӥз. Кызьы меда воштӥськиз солэн улонэз бадӟым городэ выжыса? Тае ваньзэ рос-прос эскеримы вераськонамы.

— 2024 арын матэктӥсь экзаменъёслы дасяськонэд сярысь верад вал ини. Быдэсмизы-а азяд пуктэм ужпумъёсыд но малпанъёсыд? 

— 2024 ар мон понна со туж кыдёке кылемын ини, мар веранэз. Нырысь ик экзаменъёслэн йылпумъянъёсыз сюлэмъя ӧвӧл. Мон умойгес сёто шуыса малпай вал. Озьы ке но, мон али дышетскисько отын, кытчы пырыны малпасько вал 8-тӥ классысен ик.

— Кытын но кинлы тон али дышетскиськод? Кыӵе ӧнер басьтод дышетскондэ йылпумъямед бере?

— Мон дышетскисько Казаньысь кун университетлэн историяя факультетаз. Азьланяз мон луо историк. Быръем ӧнере туж кельше, туннэ нуналлы но туж тупась, кулэ луись тодон-валанъёсын тырмем удысэн лыдъясько. Оскисько, калык понна дышетскеме бервыло луоз. Котькуд адями ас уженыз дуннеез умойгес карыны тырше ук.

— Студентлэн улонэз маин тыныд кельше?

— Нырысь ик со котырысьтым адямиос. Преподавательёслэн составзы сярысь ке верано, мон ӧй верасал со туж арлыдо яке туж егит шуыса. Со дышетӥсьёс, кудъёсыз ас ужзылэн зэмос ӧнерчиосыз луо. Милям кафедраямы тани туж трос егит преподавательёс, кудъёсыз зэмзэ но ас уженызы «ӝуало», со ваньмызъя адӟиське. Сыӵе адямиос милемлы мотиваци сёто. Но ми али историлэсь инъетсэ гинэ дышетӥськом, нош азьланяз мар гинэ уз луы на. Со туж тунсыко. Малпасько, преподавательёслы луыса ик студентлэн улонэз яркыт луэ. Соос ведь туж трос тодо, пӧртэм амалэн верало предметсы сярысь. Мон солы туж куанӥсько. 

Кыкетӥез — со мынам одногруппникъёсы. Со нимысьтыз яратон. Мон шумпотӥсько, сыӵе адямиосын дышетскисько шуыса, кудъёсыз котьку дась юрттыны, кыӵе ке кенеш сётыны. Тани ми ог-огенымы куинетӥ толэзьзэ дышетскиськом ини. Та куинь толэзь ӵоже милям бадӟымесь даллашонъёсмы ӧз кылдэ на. Ми сентябрьысен дышетскыны кутским ке, кык толэзьзэ заочно дышетским. Сентябре ми эшъяським ини, соку милям тьюторъёсмы, кыкетӥ курсын дышетскись кураторъёсмы, кудъёсыз милемлы юртто вал соку огъя дышетскон сӧзнэтэ пырыны, туж паймизы, «вау, тӥ сыӵе ӝог эшъяськыны вутскиды, ми асьмеос в шоке», шуизы. Та пумысен мыным туж удалтӥз шуыны луэ. 

Студент улонэ туж яркыт ортче али. Группаен «посвящение ортчим» (нимысьтыз ужрад, кытын нырысетӥ курсэз студентъёслэн радазы пырто — Ю. Щ.), Вуж Выль арез тани пумитамы. Ми котькуд ужрадэ валче ветлӥськом, соин милям кыӵе ке коннект (герӟет) вань ини. 

— Школаяд тон котькыӵе ужрадэ туж мыло-кыдо пыриськись дышетскись вал, сыӵе сямыд студент улонад но выжиз-а? Кыӵе ужрадъёсы пырыны вутскид ни?

— Бен, школаын тон одӥг ужрадъёсы пыриськыны кутскиськод ке, озьы ик школаез йылпумъятозь мынэ ини. Татын кӧня ке мукетгес. Университетын али мон асме котькуд ласянь возьматыны ӧй быгаты на. Мон волонтёр вал, та ужез азьланьтыны малпасько на. Но асме мукет удысын шедьтыны быгатӥ. Мон Казаньысь Калыкъёслэн Эшъяськон юртазы ветлыны кутски, удмуртъёс доры. Отын ортчись концертъёсы пыриськи, эшшо «Голоса Поволжья» фестиваль-проектэ пыриськи. Мыным со туж тунсыко потӥз. Конкурсантъёс кулэ луэмысь, монэ куризы татчы пыриськыны. Маиз шумпотымон, куинетӥ инты басьтӥ. 

Тани малпасько на эшшо кыӵе ке научной кружокъёсы ветлыны. Малы ке шуоно отын туж тунсыко, соин валче валтӥсь материалэз но валаны юрттэ. Ми одӥг Кыдёкысь Ӵукпалэз (Дальней Востокез) гинэ ум дышетӥське ук. Милям дышетсконамы асьме кунмылэн историез но пыре, археология но. 

18 январе историез дышетӥсь нырысетӥ курсысь студентъёс пӧлын милям викторина ортчиз. Солэн пуштросэз латин кылэн герӟаськемын вал. 

Туннэ нуналлы тани та гинэ кадь. Сокем бадӟымесь ужрадъёсы пыриськыны ӧй вуы на. Кылдоз ке, ваньмыз азьланяз. 

Одно ик, сыӵе ӝуась мылкыдо егит нылаш ассэ уз ышты шуыса оскисько. Ваньмыз сярысь со туж лад-лад вера, солэн туж трос визьмо малпанъёсыз но веранъёсыз. «Егитъёслэсь умойзэ возьманэз ӧвӧл ни» шуыса малпасьёслы Оляез примере пуктэме потэ.

— Калыкъёслэн Эшъяськон юртазы ас мылкыд каремедъя пыриськиськод-а?

— Мон соос сярысь кемалась тодӥсько вал ини, зэмзэ вераса. Удмурт «Шундыкар» лагерьысь бертэм бере ини ӝуатски. Вот, малпасько, вань сыӵе Калыкъёслэн Эшъяськон юртсы, а мон Балтасьын. Соослэн сыӵе егитъёсын пумиськонъёссы ортчо вылэм, отчы мынӥ. Соос мыным туж кельшизы. Бератаз монэ пӧртэм концертъёсы ӧтчаны кутскизы, выступлениосын но, мон кылбур лыдӟи. Мон туж шумпотӥсько студент вакытам сыӵе инты шедьтӥ шуыса. Та мыным аслэсьтым лулчеберетме утьыны юрттэ. Асьтэос но валаськоды ни, лулчеберетмы кӧня ке ышыны кутскиз шуыса. Со понна ик мон лулчеберетэз утьыны гинэ уг тыршиськы, мынам сое азьланьтэме потэ, мукет калыкъёс но мед данъяськозы соин.

— Школа сӧзнэтысен студент улонэ выжыны секытэн сётӥськиз-а?

— Мон ӧй верасал, со туж секыт шуыса. Но тани выпускникъёслы мар верасал: дышетске огшоры сиён пӧзьтыны. Вань студентъёс али монэ валалозы, дыр. Сиён пӧран туж трос дырез басьтэ, та пумысен мыным кӧня ке могӟетъёс кылдытэ та уж. Дорад тынад ваньмыз ӝӧк вылын, татын дышетскыса бертэм бере малпаськоно али, мае пӧрано. Милям университетын рос-прос сиыны столовой ӧвӧл, буфет гинэ вань. Мон али дыши сиёнэз сьӧрам нуллыны, университетын милям микроволновка вань. Котьку университетысь бертыку, малпасько, мар мон туннэ пӧзьто (серекъяса). Кӧтыд ке тыр, тон ваньзэ рос-прос малпаськыса лэсьтыны быгатӥськод. Соин студент улонын та туж кулэ луись быгтонлык, тазалыкед но уз сӧриськы. 

Студент улонэ выжон — со нырысь ик анай-атаедлэсь люкиськон. Но валаны кулэ: со эрико луон йырдэ поромытон понна ӧвӧл. Школаын тон умой дышетскид ке, университетын но тыныд секыт уз поты. Школаын дышетскем тросэз юлтошъёсы тани туж кылкутӥсь луизы, соос сыӵе ик вал ини, но со эшшо но умойгес адӟиське али. Студент улон ас коже улыны дышетэ. Татын тон ачид сиён пӧраськод, ачид утялскиськод, лэсьтэм ужъёсыд понна ачид кыл кутӥськод.

— Маиз секытгес: лекциосын пукыны яке практикаосын валэктон сётыны?

— Татын огкадь шуысал. Мон, кылсярысь, ваньзэ ноутбуке гожъясько, соин мыным лекциосын капчигес. Практикаосын валэктон сётыны но секыт ӧвӧл, малы ке шуоно милям туж сюлмо но визьмо преподавательёсмы. Со сярысь верай вал ини. Эшшо огпол тае пусйысал. Соос ноку секыт уз каре, милям куронъёсмылы пумит уг луо. Котьку милемыз валаны тыршо, кылсярысь, занятиез яке зачётэз выжтоно луиз ке. 

Валэктон сётыкумы но соос куддыр вераны быгато «эн сюлмаське» шуыса. Кудзэ ке нимысьтыз бырйыны уг луы татын. Куддыр лекциосын но мӧзмыт медаз луы шуыса, преподавательёс пӧртэм юанъёс сётъяло, соосъя милемды ватсаса оценкаос/баллъёс пуктӥсько. Котькудӥз ас понназ тунсыко но тодон-валан сётӥсь занятиос.

Сыӵе тӥни асьме студентъёсмы. Нырысетӥ курсысен ик синмаськыса, данъяськыса, ӝуась синмын учкыса дышетско. Гуртысь егитъёс трослы кышкась шуо ке, туала вакыт аслэсьтыз воштонъёссэ пыртэ. Туала студентъёс дышетсконэн гинэ уг уло, соос мылысь-кыдысь пӧртэм ужрадъёсы пырисько, асьсэды эскеро, тодон-валанъёссэс будэто. 

Гажано студентъёс, ужды ӟеч мыноз, вань льӧль малпанъёсты одно ик мед зэмалозы.