Геройёсмес ноку ум вунэтэ

9 толсуре шаерамы тужгес но патриотизм мылкыдо праздникез пусйимы – Атыкай музъемлэн геройёсызлэсь нуналзэс. Та зэмзэ но одӥгез тужгес пуштросо нунал, куке асьмеос тодамы вайиськом Геройёсты, кудъёсыз улонзэс сётӥзы чагыр инбам но яркыт шунды понна.

Та праздник аслэсьтыз пусйиськон нуналзэ 2007 арын тодмостӥз. Россилэн Президентэзлэн Указэзъя, табере арлы быдэ, 9 толсуре асьмеос сӥлы кариськом шаерлэсь геройёссэ.

Нош кӧня соос быдэс шаерамы? Кӧня кузя соос ёросамы? Совето Союзысь Геройёс, Ужысь Геройёс, Россия Федерацилэн Героез – соосты ваньзэсты тодыны кулэ, будӥсь поколенилы вераса улоно, данъетано, мемориал пулъёссэс но синпелетъёссэс утялтыса возёно. Нош кӧня туала нуналысь геройёсмы? Куддыр асьмеос ум но тодӥське, ум валаське, кыӵе дунэн сётӥське «Герой» ним. Кинъёс ке пӧламы ик уло, сое ум гинэ тодӥське. Герой – со кышканэз тодӥсьтэм, вордскем шаерез, ас калыкез понна улонзэ сётыны дась луэм адями, кудӥз котькуд кышкыт учыр азьын кыл кутыны быгатэ.

 

Сыӵе вал асьмелэн Героймы но – Олег Николаевич Исаев – майор, ожгар лётчик, пи, кузпал, атай, агай-вын, эш. Солы пӧртэм сямен вазиськыны быгато, но одӥгез воштонтэм кыле – со калыкмылэн бадӟым ыштонэз но мур куректонэз. 2024 арын, куартолэзе, солэн вордскем гуртаз – Вуж Кушкетын – солы нимысьтыз бюст пуктӥзы. Вӧзтӥз ортчыса кошкыку, куддыр юзыр-кезьыр луиськод: макем дуно луиз та данъет – быдэс улон сюрес! Но со уг быгаты вал мукет сямен ужзэ быдэстыны. Ӝуась сямо но пӧсь сюлэмо воргорон ас ужезлы копак сётӥськиз, ӧз жаля кужымзэ, ӧз вала жадёнэз. Озьы ик вазь бырыны но шедиз…

Табере солэсь ужзэ азинто егит ожгарчиос. Туннэ нуналэ асьмеос эшшо но мургес валаськом, кыӵе дунэн сётӥське вормон. Соин ик котькуд героез сӥлы карыса но данъяса возёно: батырлыко быремъёсыз сярысь – вераса, улэпъёссэ – ӧтчаса.

10 толсуре сыӵе буре ваён ужрад ортчиз Вуж Кушкет гуртын но. Татчы люкаськизы О.Н.Исаев нимо Ӟаны шоръёзо школаысь дышетскисьёс но дышетӥсьёс, школалэн директорез Константин Грахов, Г.Г. Гарифуллин нимо Янгул шоръёзо школаысь дышетскисьёс но дышетӥсьёс, Янгул гурт поселенилэн главаез Рамиль Гильфанов, Геройлэн сузэрез  Алевтина Петрова но Геройлэн анаез Вера Петровна. Со татын валтӥсь куно луиз. Бускель гуртысь дышетскисьёс матынгес тодматскизы героймылэн улон сюресэныз, нош тодӥсьёс ини гажаса выльысь тодон-валанъёссэс волятӥзы. Шумпотымон, гуртысь покчиёзо школаысь 3 классын дышетскисьёс – Аделина Исаева, Ратмир Петров (Олег Исаевлэн племянникъёсыз) но Мирослав Филипов  геройлэсь быдэс улон сюрессэ учкытэк веразы. Геройлэсь нимзэ данъяса одӥг минут чус сылон но радъяськиз. Пумаз лыктэмъёс сяськаоссэс тыризы.

Таӵе ужрадъёс тросгес мед луозы вал. Ведь котькуд гуртын вань сыӵе адями, кудӥныз быдэс калык данъяськыны быгатэ. Геройёс улэп соку, куке соосты тодӥськом но данъяськом, нош адямилэн тодэ ваёнъёсаз улон котьку героез калык пӧлы вае, солэсь нимзэ вылэ ӝутэ.

Атыкай музъемлэн геройёсызлэн нуналэз азьын Герой пи вордэм анай-атай доры, Николай Степанович но Вера Петровна Исаевъёс доры, Балтась ёрослэн главаез Рамиль Нутфуллин но лыктӥз. Озьы ик арлы быдэ Атыкай музъемлэн геройёсызлэн нуналаз Казаньысь Ратушаын туж дано ужрад ортче. Туэ татчы Исаевъёслы но вуыны шуд усиз. Озьы ик ужрадэ Янгул гуртысь Совето Союзысь Геройлэн – Габдулла Гарифуллинлэн – нылпиосыз – Каусария Хайруллина но Рамиль Гарифуллин – пыриськизы.