Яркыт, шудо-буро но пайдалыко мед луоз Выль армы!

Праздниклэсь вуэмзэ умойгес мед валалоды шуыса, ми, куке но Балтась ёросын улэм аспалъёсты, тӥледлы газет пыр пичи кузьыммес келяны малпамы. Со кузьым — милям шуныт кылъёсмы, ӟеч сӥзёнъёсмы.

Юлия Ильмурзина, Вуж Кушкет-Ижкар

Юля — Удмуртиын ужась но улӥсь тодмо аспалмы. Удмурт шаере со Ӟаны шоръёзо школаез йылпумъямез бере вуиз. Ижкарысь кун университетысь журналистикая факультетын дышетскиз. Практиказэ Удмуртиысь ВГТРК-лэн филиалаз ортчем бере, нылашез отчы ик ужаны ӧтизы. Корреспондент но программаез нуись луыса ужамезлы ӝоген 10 ар луоз ни! 

— Удмуртиез яратӥсько, уката отын улӥсьёс ушъяса но куддыръя вожъяськыса верало аслам Балтась ёросын вордскем муртъёсы сярысь! Синмасько, адӟем каро, усто шуо. «Конечно, мынамъёс ук!» — шуисько (серекъя — ред.). Соин калыкелы сӥзисько азинсконъёс гинэ! Яркыт, шудо-буро но пайдалыко мед луоз Выль армы! — шуиз Юлия.

Нина Петрова, Сырья-Можга кар

Нина апай туж кема аръёс ӵоже улэ ни Можга карын, шонергес верано ке, 1976-тӥ арысен. Татын со аслэсьтыз кузпалзэ шедьтӥз, семья кылдытӥз, выжы лэзиз. Можга сярысь Нина апай тазьы вера: «Мыным татын дунне но югытгес потэ». Но вордскем палъёсызлэсь, Сырья гуртэзлэсь, мӧзмемзэ со уг ваты. Соин тӥледыз газет пыр ӟечкыланы со шумпотыса соглаш луиз. 

— Мар сӥзём на дуно аспалъёсылы? Тазалык — байлык, шуо — та, зэмзэ но, улонамы самой валтӥсез. Котькинлы мед кылдоз шудо-буро улонын нылпиоссэс будэтыны, соосты пыд йылазы султытыны, внукъёссылы шумпотыны. Асьмеос нылпиос но внукъёс понна гинэ улӥськомы ук. Вуоно ар мед ваёз ваньдылы ваньзэ умойзэ гинэ. Вань уродэз палэнтӥ мед ортчоз! Ма сярысь малпаськоды, ваньмыз мед быдэсмоз! Ваньдэсты ӟыгыртӥсько, балтасьёс! — вераз Нина апай.

Вячеслав Пчельников, Сырья-Можга кар

Вячеслав Александрович — Нина апайлэн племянникез. Можга карын со 1988-тӥ арысен улэ. Апаез татын улэм бере, пичи дырысеныз со Можгае куное вуылэм но та карез матын карыны кутскем. Дышетскыны но татчы лыктэм. Пиосмурт кема аръёс ӵоже «Красная звезда» предприятиын ужам, берло кӧня ке аръёсы 2-тӥ номеро нылпи садын тырше. Вячеслав Александрович но аспалъёссэ ӟечкыланы дыртэ:

— Чебер кылъёс вераны уг быгатӥськы, но аспалъёсме вань сюлмысьтым вуоно праздникъёсын ӟечкыламе потэ! Шуг-секытъёслы эн сётске, котьку азьлань вамыштыны тырше. Улонын пӧртэмез луэ, валтӥсез — шуг-секытъёсты ӵошен, огъя ортчыны быгатоно. Семья кусыпъёсты юн ке луизы, улонын номыр но кышкыт ӧвӧл!

Виктория но Игорь Щербаковъёс, Вуж Кушкет-Ижкар

Викаен ми школаын одӥг классын дышетскимы. Со Ципья гуртысь нылаш. Игорь — Вуж Кушкетысь. Кузпалъёс Ижкарын уло, кыкназы но ужало, Алиса нылзэс будэто. Вордскем палъёсазы быгатэмзыя бертыны тыршо, анай-атайёссылы юртто. Тани мар верамзы потэ Игорьлэн, Викториялэн но Алисалэн аспалъёссылы:

— Гажано шошма удмуртъёс! Тӥледлы Удмурт шаерысьтымы келяськомы пӧсь салам! Вуоно 2026-тӥ Выль арын сюлмысьтымы сӥзиськомы юн тазалык, кысӥсьтэм мылкыд, шумпотонэн тырмем улон, азинлык, семья куспын яратон но гажан! Артэ мед вамышъялозы зэмос эшъёс! Вӧзады котьку мед луозы яратӥсь но матысь адямиосты. Тужгес но ӟырдыт салам келяськомы Вуж Кушкет гуртэ но Ципья черкогуртэ! 

Наталья Жукова