Йӧвылэсултон туж шулдыр ортчиз!

Тол — со тужгес но шулдырез, тунсыкоез но синмаськымонэз арлэн вакытэз. Выль арез пусъеммы бере, соку ик вуэ Ымусьтон, кема ик дыр ортчытэк, христиан калык пусъе одӥгзэ тужгес но валтӥсьсэ праздниксэ — Йӧвылэсултонэз!

Котькуд аре Вукогуртын улӥсьёс туж шулдыр пусъё та праздникез. Гурын табанянь пыжо, самоварен чай пӧзьто, гурезьысен нискылало, вуэ пыро. Туэ но со туж синмаськымон ортчиз! 

Праздник азьын пиос тыршизы вуэн кисьтаса ик нискылан гурезь лэсьтыны. Тыметлэсь йӧзэ лымылэсь сузязы, йӧлэсь лэсьтыса кирос пуктӥзы, дӥсь воштыны будка лэсьтӥзы но купель дасязы.

Дырзэс жалятэк, со бордын тыршизы Александр но Михаил Щербаковъёс, Николай Кузнецов, Юрий Никитин, Дмитрий но Василий Степановъёс, Валерий Тимофеев, Алексей но Сергей Григорьевъёс, Сергей Перемечев. Нимысьтыз тау гуртмылэн старостаезлы — Юрий Степановлы, туж валаса но тыршыса ужамез понна.

Клуб дорын воргоронъёслэн тыршеменызы городысь паркын кадь тылъёс ӝуатскизы. Гужем но сӥзьыл, ӝытъёсы но шутэтскон нуналъёсы потаса, соос выль сцена лэсьтӥзы. (Нялтас вераса, сцена лэсьтыны луонлык сётӥз самообложение амалэн люкам коньдон). Лампаос пуктӥзы. Туж чебер но синйылтымон шутэтскон инты кылдӥз! 

Праздник нуналэ ческыт гурын табанянь пыжиз клубмылэн кивалтӥсез Антонида Перемечева. Самоварен чай но пуртыын ӝук пӧзьтӥзы Леонид Фёдоров, Юрий Сидоров но Александр Щербаков. Задор, шулдыр удмурт арган гуръёсыныз калыкез шулдыртӥз Владимир Степанов. Выль лэсьтэм сцена вылын эктӥзы но кырӟазы празднике потэм Вукогурт калык но лыктэм куноос. Оглом вераса, Йӧвылэсултон туж синмаськымон но шулдыр ортчиз!

Азьланяз но сӥзисько вань Вукогурт калыкмылы таӵе ик эшлыко но огмылкыдо луыны. 

Праздникез радъясьёслы туж бадӟым тау. Юн тазалык тӥледлы, котькуд нунал мылкыдды капчи мед луоз, йыр вадьсады чылкыт инбам мед пиштоз!

Анна Григорьева, Вукогурт

Туспуктэмъёс: А. Григорьева, А. Перемечева