Калыкъёслэн лекрут йылолзы кызьы ортче?

Соос лыктэм калыкез «Армие келян» йылолэн тодматӥзы.

Та вал цикллэн нырысетӥ ужрадэз, кудӥз сӥземын луиз Атаймузъемез утисьлэн арезлы. Городын улӥсьёс но лыктэм куноос Поволжьеын улӥсь калыкъёслэн — бигеръёслэн, ӟучъёслэн, чувашъёслэн, удмуртъёслэн, поръёслэн, мордваослэн но башкиръёслэн — армие келян йылолъёсынызы но вашкала калык юртъёслэн чеберлыкенызы тодматскизы. Котькуд лыктӥсь понна та ужрад бушын вал. 

Программа пумысен верано ке, со туж узыр радъяськиз. Мылкыд карисьёс кужымзэс йырси пунонысен сэбед (обрядовой) кышетъёсты пужыятонозь эскерыны быгатӥзы. Нимысьтыз фестиваль понна «Родине служить — честью дорожить» шуэм фотовыставка но радъяськиз, со XX даурысь рекрут йылоллы сӥземын вал. Ватсаськизы на ожгар сямъёс сярысь верась шер пумиськись артефактъёс. 

Та ужрадэ ёросысьтымы Ӟаны лулчеберетъя юртысь «Шулдыр ӝыт» удмурт фольлор ансамбль но пыриськиз. 

— Ансамбле пыриськисьёслэн кужыменызы удмурт подворье дасямы, та ик командаен «Армие келян» йылол но возьматӥм. Озьы ик ансамбльмы Балтась ёросысь шошма удмуртъёслэн лекрут кырӟанъёсынызы сцена вылын выступить кариз. Сюлмысь тау карисько котькуд артистмылы, соос валтӥсь ужзэс кельтыса, удмурт калык лулчеберетэз азинтон понна бадӟым уж лэсьто, — ивортӥз Ӟаны лулчебертъя юртлэн директорез Алефтина Иванова.

Лэсьтэм бадӟым ужзы понна «Шулдыр ӝыт» ансамбль нимысьтыз Таукарон гожтэтэн пусъемын вал. 

Удмурт калыклэсь мур пуштросо историзэ, лулчеберетсэ нуналысь нуналэ пӧртэм пумо возьматыны луэ. Быронтэм материалъёс нуналлы быдэ шедьтӥсько, эскерисько но шараясько. Азьланяз но таӵе ужрадъёс пыр калыкенымы данъяськыны мед быгатомы!