Кутсконэз вань, азьланез луоз

«Галиевские чтения» шуыса нимаськем нырысетӥез научно-практической конференция Ципьяысь «Калыкъёслэн эшъяськонзы» музеез кылдытӥсьлы — Гарифзян Галиевич Галиевлы — сӥземын вал. Туэ солы 97 арес тырмысал.

Туала поколенимылы шаермылэсь зэмос историзэ но юнман сюрессэ возьматон — со музейёслэн валтӥсь ужзы.

Озьы ик соосын бадӟым уж нуиське дано адямиослэсь нимзэс утьыса, соослэн примерзы вылын нылпиосты дышетон но визьнодан ужын. Кема аръёс ӵоже Гарифзян Галиев мыло-кыдо тыршиз «Калыкъёслэн эшъяськонзы» шаертодонъя музеез паськытатон но быдэс калыклы тодмо карон, адямиослэсь соин тунсыкъяськонзэс будэтон понна. Пӧртэм экспонатъёс, выльдӥськем юрт, гажан, тодмо луон — ваньмыз солэн тыршемезлэн бервылыз. Туннэ нуналэ музей азьпал радын сылэ ёрослэсь историзэ верасьёс но возьматӥсьёс пӧлын, элькунысь но солэн палэнысьтыз куноос понна воштонтэм дугдон инты луэ. Выль кивалтӥсез — Сайдаш Нурмиев — но ужез борды рос-прос басьтӥськыса ужа, пӧртэм куноосты пумита но музейлэсь данзэ будэтэ. 

Конференцие Балтась ёросысь исполнительной комитетлэн кивалтӥсез Айдар Хайрутдинов, Балтась ёросысь исполнительной комитетлэн кивалтӥсезлэн воштӥсез Ильгам Гайнутдинов, Балтась ёросысь лулчеберетъя ёзэтлэн кивалтӥсез Ильназ Петров, Сырья гуртысь клубен кивалтӥсь, удмурт азьветлӥсь Леонид Сапожников, Ципьяысь гажано Пётр Чернов, Балтась ёросысь ватсам тодон-валан сётон ужъюртлэн — внешкольной центрлэн — кивалтӥсез Дилюс Нуриев, Ципья шоръёзо школалэн директорез Раниф Ахатов, Карадуван но Шуда гуртъёсысь музейёсысь ужасьёс но мукет ӧтем куноос пыриськизы. 

— Котькудмы музейёсы ветлыса, историмес дышетыны кулэ. Инмарлы тау, туннэ нуналлы 3 музеймы вань, школаосын но нимысьтыз музейёс ужало. Озьы будӥсь поколениез историен тодматоно. Гажано адямиослэсь нимзэс утён но сӥлы карон — туала поколенилэн дано ужпумез, — таӵе кылъёсын вазиськиз конференцие пыриськисьёслы Айдар Фоатович.
Зэмзэ но, асьме шаермы трос гинэ дано адямиосты будэтӥз. Котькудӥз соос ас вакытазы, ас дыразы но ӧнеразы калык понна трос тыршизы но уно лэсьтӥзы. Соин сыӵе конференциос — калык понна, нылпиос понна туж кулэ луись ужрадъёс. Шумпотымон, кемалась ӧвӧл Покчи Лӧзя шоръёзо школаын но нырысетӥзэ Григорий Медведевлы сӥзем научно-практической конференция ортчиз. Котькуд дано адямилэн нимез гурт уровеньын ке но возиське, данъяське. Соос бадӟым интыын, калыккуспо форматэн уг ортчо ке но, калыклэн ог люкетэз понна зэмзэ но пайдаё луо.

Конференция куинь секциен радъяськиз — «Семья — дуннелэн инъетэз» («Семья — основа мира»), «Синмаськымон адямиос» («Замечательные люди»), «Галиевлы сӥзем лыдӟонъёс» («Галиевские чтения»). Татчы пыриськыны луонлык кылдӥз Субаш, Пижмара, Арбор валтӥсь школаосысь но Ципья шоръёзо школаысь 5-11 классъёсысь дышетскисьёслы. Докладъёс бигер но ӟуч кылъёсын лыдӟиськизы. Соку ик юанъёс кылдыны быгато, малы та школаосысь пиналъёс гинэ конференцие пыриськизы, малы конференция сярысь азьвыл ик ивортэмын ӧй вал шуыса. 

Музейлэн мерлыко бамаз таӵе юанъёс сётэмын вал. Музейысь экскурсовод — Сания Бариевалэн валэктэмезъя, конференция нырысетӥзэ ортче, солэсь тунсыко но пайдаё луэмзэ эскерон понна, нырысь ик басьтэмын вал школаос, кудъёсаз Гарифзян Гаилевич ачиз ужаз но дышетӥз. Конференцилы мытон сётэмын гинэ, азьланяз сое бадӟымгес но паськытгес карон понна пичиысен кутсконо, куд-ог югдуръёссэ пусйыса но тырмымтэоссэ чакласа. Азьланяз ужез шекъёстэк радъян понна ик та нырысетӥ пилотной конференция ортчытӥськиз.
Ужрадын огъя 15 уж ӵектэмын вал. Котькудӥз аспӧртэмлыко манерен но мылкыдэн сётӥськиз. Адӟиськиз, кызьы нылпиос тыршо котькуд люкетэзлы но валтӥсь малпанэзлы саклык висъяны. Тыршемзы юнме ӧз луы, вормисьёс но призо интые потэмъёс нимысьтыз дипломъёсын но кузьымъёсын пусйиськизы.

Ципья шоръёзо школаысь директорлэн визьноданъя воштӥсез Нина Давлекова но та ужрад ласянь аслэсьтыз малпанъёссэ вераз:
— Зэмзэ но та конференция туж умой эмоциос но шунытэсь тодэ ваёнъёс кельтӥз. Со туж аспӧртэмлыко интыын ортчиз — музейын, кытын ваньмыз умой адямиен, ас дырезлэн героеныз — Г.Г. Галиевен — герӟаськемын. Татын котьку туж лякыт но шуныт. Милемыз но бадӟым куноосыз кадь пумитазы. Конференция ласянь дунъянкылъёс но умоесь луизы. Та арын мон куно гинэ луи. Азьланяз кыӵе ке дышетскисен докладэн пыриськыны малпасько. Конференцилэн ужпумез но лэчыт — исследовательской ужъёсын тунсыкъяськон мылкыдэз будэтон гинэ ӧвӧл, нырысь ик нылпиосты ӟеч сямъёс но патриотизм мылкыд пыӵатыса будэтон, кудъёсыз тодо но тунсыкъясько ас калыкезлэн историеныз, сям-йылолъёсыныз, ас шаерзэс гажало, данъяло, семьязэс ярато но дунлыкъёсты утё. Конференциын чузъяськем ужъёс туж устоесь вал. Нылпиос но асьсэды рос-прос возизы, со дыре ик сюлмаськемзы но шӧдӥськиз. Адӟиськиз, кызьы соос ужъёссэс «асьсэ пыр» поттӥзы. Соин туж тунсыко вал соосты кылзыны, троссэ тодӥмы. Жюри но лыктэм куноос вылӥ дунъет сётӥзы. Озьы ик нылпиослэн кивалтӥсьёссы но трос тыршизы. Вис вакытэ милемыз ческыт табанен, ческыт зыно чаен куно каризы. Музейлэн залъёсаз ветлыны луонлык кылдӥз, со вакытэ жюри йылпумъянъёс лэсьтӥз. Лыктэмъёс ваньзы соглаш луизы, таӵе конференциез одно ик азьланьтоно шуыса, дано адямиез буре вайыса, кудӥз асьмелы сокем бадӟым мерас кельтӥз, дунъянтэм кузьым — музей. Со данлык ми понна. Вань сюлмысен тау кареме потэ музейлэн туннэ кивалтӥсезлы — Сайдаш Талгатовичлы но вань адямиослы, кудъёсыз юрттӥзы та лыдӟонъёсты радъяны.

Конференциез радъянэ бадӟым юрттэт озьы ик пыртӥзы Балтась ёросысь дышетонъя управление но солэн кивалтӥсез Ренат Мухарлямов, озьы ик Ципья шоръёзо школалэн коллективез но солэн директорез Раниф Ахатов. Со понна соослы бадӟым тау кылъёсты верало музейын ужасьёс но.

Малпасько, таӵе ужрад зэмзэ но пайдаё луэ вань ёросмы понна. Асьме трос йӧскалыкъем ёросмы понна та эшшо но бадӟым данлык. Сӥё-дано адямиосты гажаса но тодэ возьыса улыны — асьмелэн валтӥсь ужмы. Оскиськом, азьланяз но ужрадлэн аспӧртэмлыкез но кулэлыкез уз быры, арысен аре выль тубатъёсы вутскыса, выль нимъёсты но дано адямиосты визьноданы луонлык кылдоз шуыса! Конферецилэн кутсконэз сётэмын, азьпалан эшшо но трос проектъёс мед кылдозы!