Кузьым — милям шуныт кылъёсмы, ӟеч сӥзёнъёсмы!

Эшъёс, ӝоген 2026 ар вуэ ук ини. Шӧдӥськоды-а солэсь матэктэмзэ?

Праздниклэсь вуэмзэ умойгес мед валалоды шуыса, ми, куке но Балтась ёросын улэм аспалъёсты, тӥледлы газет пыр пичи кузьыммес келяны малпамы. Со кузьым — милям шуныт кылъёсмы, ӟеч сӥзёнъёсмы. Та ӟечкыланъёс — тӥледлы гинэ! Кусыпъёсмы шоры учкытэк, матынъяськись бадӟым праздникъёсмы — Выль ар но Ымусьтон — ваньмес мед огазеялоз! Праздникен, эшъёс!

Светлана Демидова, Карек-Серма-Можга кар

Карек-Сермаын вордскем но будэм Светлана Павловна Демидова (Никитина) Можгае 1982-тӥ арын вуэм, со татысь педагогикая колледжын тодон-валан басьтэм. 1985-тӥ арын дышетскон интызэ йылпумъяса, кышномурт ёросысь одӥгаз гуртэ улыны интыяське. Кӧня ке ар ортчыса, кузпалэныз Олег Ивановичен Можгаын улыны кутско. Трос аръёс ӵоже Светлана Павловна Можга карысь 17-тӥ номеро нылпи садын визьнодась луыса ужа. Со сяна, удмурт кружокъёсты но нуэ, 5-6 аресъем нылпиосты анай кылзылы дышетэ. Можгаын Светлана Павловнаез туж трос адямиос тодо, ваньзы сое ярато но гажало. Ачиз но со адямиосын капчиен огъя кыл шедьтыны быгатэ. Тӥледыз праздникен ӟечкыласа, Светлана Павловна:
— Выль арен, Выль шудэн, дуноесь эшъёсы!
Сӥзисько тӥледлы юг шунды, каньыллык,
Лул-сюлэм шунытты мед тырмоз котькинлы!
Та вуись Выль армы асьмелы ваньмылы
Шумпотон, яратон, удалтон мед ваёз!

Вань кадь землякъёсме, ӵыжы-выжыосме ӟечкыласько Выль арен но Ымусьтонэн! Сюлмысен сӥзисько тӥледлы ваньзэ умойзэ но ӟечсэ! Кайгу-куректонъёслы эн сётске, матысь адямиостэс яратылэ. Вань малпанъёсты вуоно арын одно ик мед быдэсмозы! 

Лидия Жукова, Сизнер-Можга кар

Сизнер гуртын вордскем Лидия Васильевна кузпалэныз Николай Валентиновичен (Сырья гуртысь) Можга палъёсы 1988-тӥ аръёсы вуиз. Со дырысен кузпалъёс татчы выжы лэзизы. Жаляса верано, Николай Валентинович кӧня ке ар талэсь азьло кулӥз ни, нош Лидия Васильевна татчы кылиз. Со 32 ар ӵоже ини Пичи Сюга гуртысь клубын ужа, та гуртын ик улэ но. Можгаез кышномурт туж яратэ, аспалъёсыз сярысь но уг вунэты.

— Матынъяськись Вуоно арен вань тодмоосме, матынъёсме, Сизнер гуртын улӥсьёсты, вань балтась калыкез сюлмысьтым ик ӟечкыласько! Вордскем палъёсызлэсь кыдёкын улӥсь адями, малпасько, туж умой вала, дыр, мар со сыӵе — аслад гуртэдлэсь, тодмоосыдлэсь мӧзмон. Соин ваньдылы сӥзисько вордскем гуртъёсады тынычен, ог-огдылы юрттыса, ог-огдылы дурбасьтыса, ог-огдэс гажаса но яратыса улыны. Шудо луэ! — ӟечкыла тӥледыз Лидия Васильевна. 

Пётр но Надежда Алексеевъёс, Сизнер-Можга кар

Пётр Гурьянович но Надежда Михайловна — Сизнер гуртысь аспалъёсмы. Удмурт шаерын соос кема аръёс ӵоже уло ини. Можгаын соослы туж кельше, татын ӵыжы-выжыоссы но вань. Пётр Гурьянович «Датабанкын» тырше, нош Надежда Михайловна карысь больницаын эмсузэр луыса ужа. Кузпалъёслэн но балтась удмуртъёсты вуоно праздникъёсын ӟечкыламзы потэ. Тани мар соос шуизы:

— Туж шумпотыса, туж гажаса вазиськиськом Балтась ёросысь вань кадь улӥсьёслы, аспалъёсмылы, тодмоосмылы, ӵыжы-выжыосмылы, гуртоосмылы, эшъёсмылы! Ваньдылы пӧсь салам Можга карысь! Праздникъёс дыръя гинэ ӧвӧл, мылкыдды котьку умой мед луоз, тазалыкты ноку медаз лябӟы, матысь адямиосты сӧл-таза мед луозы, нылпиосты, матысь адямиосты котьку вӧзады мед луозы. Куспады тупаса улэ! Праздникен!

Дасяз Наталья Жукова

(Азьланьтонэз вань).