Кыӵе луыны кулэ зэмос шудо семья?

Революци дырозь Россиын уноез семьяос трос нылпиё луиллям. Котьку сямен, семьяын вордӥллям куинь но солэсь тросгес нылпиосты. Со луэм норма. Нылпиос пичиысен ик анай-атайёссылы юрттылӥллям юрт котырын, пичи сузэр-вынъёсынызы пукылӥллям. 

Берло дыре трос нылпиё семьяослэн лыдзы выльысь йылыны кутскиз. Та туж шумпотымон югдур. Данъяськисько, милям Ярак-Чурма гуртамы но сыӵе семьяос вань шуыса. Одӥгез соос пӧлысь ньыль нылпи будэтӥсь егит семья — Ольга но Олег Гавриловъёс.

Озьыен, туннэ тодматскомы Гавриловъёслэн семьяенызы, вераськомы трос нылпиё анаен Ольгаен но тодомы кыӵе со — трос нылпиё луон. 

— Ӟечбур, Ольга! Вера вал кӧня ке ачид сярысь, аслад семьяед сярысь.

— Ӟечбур! Вордӥськи но будӥ мон Вуж Кушкет гуртын. Та гуртысь ик покчиёзо школае нырысетӥ классэ дышетскыны пыри, нош 5-9 классъёсын дышетски Ӟаны гуртысь шоръёзо школаын. 9 классэз йылпумъяме бере дышетсконме азьланьтӥ Арча педагогикая колледжын. 2006-тӥ арын ӟечен гинэ сое йылпумъяса, покчи классъёсты дышетӥсьлэсь дипломзэ басьтӥ. 2009 арын Ярак-Чурма гуртысь Олег нимо пияшлы бызи. Тани 15 ар ӵоже ог-огмес яратыса но гажаса улӥськом, ньыль нылпи будэтӥськомы. Али дыре ачим Ярак-Чурма гуртысь нылпи садын покчи визьнодась луыса ужасько. 

Кузпалэ вордӥськемын но будэмын Ярак-Чурма гуртын. Татысь ик покчиёзо школаын дышетскемын, нош 5-11 классъёссэ Покчи Лӧзя шоръёзо школаын пыр потэмын. Собере Савалиысь политехнической колледжын дышетскыса, зоотехниклэсь ӧнерзэ басьтэ. Туннэ нуналэ «Алга» обществоын тырше.

— Оля, тон куке но малпад вал-а, трос нылпиё анай луод шуыса?

— Бен, мон котьку малпасько вал, бызем бере одно ик трос нылпиосы луозы шуыса. Шумпотӥсько, малпанэ быдэсмиз. 

— Вера вал нылпиосты сярысь. Кыӵеесь соос?

— Семьяямы милям кык ныл но кык пи. Бадӟымез нылмы — Виктория. Дышетске 9-тӥ классын. Кырӟанэн тунсыкъяське. Балтасе вокал кружоке ветлэ. Ёрос, Элькун конкуръёсы пыриськыса, трос вормонъёсы вутскиз. Кыкетӥез нылпимы — Вадим. Али дыре 4-тӥ классын тодон-валан басьтэ. Футболэз туж яратэ. Озьы ик кырӟаны но талантэз вань. «Мудорвай» конкурсэ пыриськылэ. Куинетӥез — Диана. Солы али 6 арес, ветлэ гуртысьтымы нылпи садэ. Кылем арысен гуртамы Татьяна Юрьевна Ишмурзина эктонъя но вокалъя кружок усьтӥз, отчы шумпотыса ветлэ. Нош ньылетӥез нылпимы — Дима. Али солы 2 арес гинэ ай, но ассэ туж мыло-кыдо но ваньмыныз тунсыкъяськись нылпиен возьматэ. 

Нылпиосмы милям ваньзы крезьгурез ярато ке но, соос туж пӧртэмесь. Котькудӥзлэн эшшо аслаз нимаз тунсыкъяськонъёсыз вань. Кыӵе ке шуг-секыт кылдыку, ог-огзы понна юн сыло. Инмарлы тау, нылпиосмы ог-огедлы юрттыны, ог-огеныд кенешыны кулэ шуыса ӟеч тодо.

— Вань таӵе малпан: трос нылпиен капчигес, пе, одӥг нылпиен сярысь... Тон кызьы малпаськод, тупа-а та веран зэмлыклы?

— Мазэ веранэз, номыр но капчиен уг сётӥськы улонын. Нылпи будэтон но. Трос кужым но быгатонлык сётыны кулэ нылпи вордон но будэтон понна. Мон малпасько, семьяын трос нылпи луиз ке, капчигес, дыр. Малы ке шуоно соос куспазы эшъяськыса будо, котьку юртто. Пичи дырысен ик нылпиез дышетыны кулэ быдэстэм уж но верам кыл понна кыл кутыны, озьы ик гажан, яратон мылкыдъёсты пыӵатоно. Соку бадӟым нылпиос котьку юрттозы пичи сузэр-вынъёссылы.

Бадӟым семьялэн аслаз плюсъёсыз вань — со асьсэос нылпиос. Юн оскыса вераны быгатӥсько: нылпиос — со бадӟым шумпотон. Тросэз малпало, семьяын трос нылпи луиз ке, анай-атайлэн дырзы ваньзылы уг тырмы шуыса. Верало тазьы: мылкыд вань ке, дыр шедёз. Кӧня нылпи луоно, со семьялэн аслаз кылкутонэз. Ӵектӥсько ӧжытгес муртъёсты кылзӥськыны но тросгес ас кужымдылы оскыны. 

— Оля, таӵе юан сётэме потэ вал. Тӥледыз нылпиосты марлы ке вылезлы дышето-а?

— Одно ик. Нылпиосмы дышето милемыз чыры-пырыослы шумпотыны, дышето чидась луыны. Соослэсь трос пӧртэм выльзэ тодӥськом, дышетскиськом. Угось нылпиос куддыр асьмелэсь визьмогес но луо.

— Мар кариськоды быдэс семьяеныды люкаськыкуды?

— Ӵош люкаськыкумы ми яратӥськом пӧртэм ӝоквыл шудонъёсын шудыны, я телевизор учкиськомы. Гужем потылӥськомы инкуазе шашлык жарить карыны, нош толалтэ нискыланы гурезе. Шутэтскон нуналъёсы ми ӵыжы-выжыосмы доры куное мынӥськомы.

— Нылпи будэтонын тужгес но валтӥсез…

— Яратон, чидан но адӟем карымон луон. Малпасько, нылпи будэтонын озьы ик валтӥсез луэ оскон. Нылпи медаз кышка ас пуш малпанъёссэ, куректонъёссэ но шумпотонъёссэ тӥледлы вераны. Тыршисько аслам нылпиосылы нырысь ик эш луыны. 

— Кызьы малпаськод, кыӵе луыны кулэ зэмос кузпаллы но атайлы?

— Кузпал но, атай но нырысь ик оскымон адями луыны кулэ. Нылпиез будэтонэ пыриськыны, нылпилэн улонэныз тунсыкъяськыны кулэ, озьы ик пример луоно.

— Тынад малпамедъя идеальной семья со кыӵе?

— Кузпалъёслэн куспазы шудо, тупаса улэмзы но тазаесь нылпиос. Солэсь но умоез номыр ӧвӧл, дыр. 

— Ма луэ валтӥсез нылпиосын кусып возёнын?

— Валтӥсез со оскон. Кулэ нылпилы оскыны. Кулэ ӧвол нылпиез тышкаськыны но юнме шорысь пыкылыны, умой луоз валэктыны, ма со умой, нош ма урод. Туж кулэ нылпиез поддержать карыны но одно ик яратыны. 

— Кыӵе кенеш сётысалыд егит семьяослы?

— Котьку яратэ ог-огдэс, уте семья учогдылэсь шунытсэ. Улыны тырше тупаса но валаса ог-огдэс, висьытэк но ванё-буро. Луэ котьку кужмо, ноку но кусыпъёстэс тӥяны эн сётэ. Сӥзисько шуг-секытъёслэсь кышкатэк, ваче ки кутӥськыса улон кузя вамышъяны. Шудбур тӥледлы но эн кышкалэ трос нылпиё семья луыны. 

Вераськиз Мария Матвеева