Кытын интыяськемын тужгес но лулчеберето ёрос?

Нырысь ик соосты ёросысьтымы данъяськымон фермеръёслэн но гурт возёсъёслэн тыршеменызы радъям сиён-юон продукциосын адӟытон паймытӥз.

Лулчеберетъя юртэ пырон азьын куноосты пумитазы фольклор коллективъёс. Синме йӧтымон луизы удмурт коллективъёсмы но. «Шулдыр ӝыт» ансамбль аслаз задорлыкеныз котькуд лыктэм куноез ӝутскем мылкыдэн концертной залэ келяз. Пумитам сяна, бадӟым сцена вылын но соос калыкез асьсэ выступлениенызы шулдыртӥзы. 

Шулдыръяськон сяна, татын аспалъёсмы асьсэлэсь устолыксэ но возьматӥзы. Сырья гуртысь азьветлӥсьёс удмурт шӧмен пыӵам кеносэз улӟытӥзы. Зэмос вашкала удмурт улонэ выжиськод кадь тае ваньзэ адӟыса. Лыктэм куноос тунсыкъяськыса но шумпотыса учкизы вашкалаысь арбериосты.

Озьы ик палэнэ ӧз кыле Карек-Серма гуртысь Зоя Никитиналэн киужъёсыз но. Арысен аре аслэсьтыз быгатонлыкъёссэ паськытатыса, со ялан выль амалъёс шедьтэ удмурт лулчеберетлэсь синмаськымон тусъёссэ усьтон понна. Дэрем-а со, пельугы-а, камали-а — ваньмаз кышномуртлэн ки но сюлэм шунытэз шӧдӥське. 

Нимысьтыз радъям адӟытон паймытӥз аслаз масштабеныз. Татын сиён-юон но, кулэсь лэсьтэм арбериос но, киын пужыятскемъёс но, куиськемъёс но, чеберман арбериос но, йӧскалык пужыос но... — мае гинэ адӟыны уг луы вал татысь! Визитной карточка выллем луэм кутам арбериос но асьсэлэсь интызэс шедьтӥзы. Ципья но Янгул гуртъёс та ужын туж висъясько. 

P. S. Тодады вайытомы, кылем арын та выллем конкурсын Гран-при басьтӥз бускель ёросмы — Арча (главаез — Ильшат Нуриев). 1 интые вутскизы Атня, Елабуга но Актаныш ёросъёс, 2 интыез люкизы Тюлячи, Аксубай но Кукмор ёросъёс, нош 3 интыен пусйиськизы Дрожжановской, Саба но Бугульма ёросъёс.

Таяз арын вормисьёс озьы ик шуркынмонэ тодмо луозы. Гран-при басьтӥсь ёрослы 4000000 манет сётӥськоз. Та коньдон федерал но улосвыл лулчеберето проектэз улонэ пыӵатон понна кутӥськоз. Оскиськом, ёросмылэн тыршемез кулэезъя дунъямын луоз шуыса.

Удмурт калыкмес дано возьматэм адямиосмылы но бадӟым тау. Анай кыллы, лулчеберетлы бадӟым саклык висъяса, шоркарамы калыкмылэсь устолыксэ но чеберлыксэ возьматӥды но данъяды.

Фото: https://vk.com/