Кытын вордскид, отын ик кулэ луид

Котькуд адямилэн улон но ужан сюресэз аспӧртэмлыко луэ. Кин ке но вордскем интыяз, вордскем шаераз ас гумырзэ ортчытэ, кин ке палэнын улыса бертэ, кин ке кошкем интыысьтыз шер гинэ бертылэ на вордскем шаераз. Нош туннэ верано муртмы быдэс улонзэ герӟаз ас вордскем шаереныз, вордскем гуртэныз.

3-тӥ тулыспалэ 80 аресъем юбилейзэ пусъе Шор Кушкет (Ӟаны) гуртысь Иван Васильевич Ермаков. Малпаськом, асьме ёросамы сое тодӥсьтэмез ӧвӧл, дыр, шуыса. Улонэзлэсь 42 арзэ сӥзиз со школалы. Со пӧлысь 30 арлэсь тросгес — кивалтон ужлы. 

Вордскиз Иван Васильевич шимес ож бере, 1946-тӥ арын. Пичи дырыз тупаз шаермылэн секыт аръёсызлы. Аслаз ёзъёсыныз шудӥз, кыдаз, школаын дышетскиз.

Адямилэн кыӵе луэмез ас семьяез, ӟеч сюлэмо, ужез яратӥсь, тыршись, котькуд ласянь ӝикытлыкез валась анай-атаез, дышетӥсез бордысен но кутске, дыр. Анай-атаез — Анастасия Ильинична но Василий Федорович Ермаковъёс — гуртамы гажамон но лякыт сюлэмо адямиос луиллям. Асьсэлэсь нылпиоссэс но сыӵе ик ӟеч сямъёслы дышетыса будэтыны быгатӥллям.

Пичи дырысеныз ик анай-атаезлы юрттыны тыршиз пияш. Нырысетӥ классэ дышетскыны мынон дыр вуиз. Солы песятаез школьной форма, картуз но ремень басьтэм. Семьяяз одӥг гинэ яратоно внукез, осконэз вылэм солэн (мукетъёсыз нылъёс).

Нырысетӥ дышетӥсез, Фёкла Владимировна Халтурина, тодонлыке кыстӥськытӥз, визь люкатыны тыршиз, йыгмыт, кышкасьтэм, улонэз валаны но гажаны мылкыд пыӵатӥз, луоз. Солэн кадь ик, Иван Васильевичлэн но быдэс улонэз дышетон удысын ортчиз.

Секыт но ёрмыса улонэн сэрен тросэз пиналъёс, начальной школаез йылпумъяса, дышетсконзэс азьланьтыны ӧз быгатэ.

Иван Васильевич пичиысен ик аслаз ёзъёсызлэсь висъяськыса будӥз, тодон-валан басьтонэ мылысь-кыдысь кыстӥськиз. 

Кызьы шуо калыкын, кытын вордскид, отын ик кулэ луид. Иван Васильевич но, 1964-тӥ арын Ципья шоръёзо школаын дышетсконзэ умой гинэ йылпумъяса, вордскем гуртысьтыз школаын трудэн но физкультураен дышетӥсь луыса ужан сюрессэ мытӥз но бератаз физика но математика урокъёсты нуиз.

1970-тӥ арын директорлэн дышетонъя но визьноданъя воштӥсез луыса ужаз. Со ик дыре, дышетон ужзэ уретытэк, Удмурт пединститутлэн физико-математической факультетаз дышетске но 1971-тӥ арын йылпумъя сое.

1971-1972-тӥ аръёсы Советской Армилэн радъёсаз луыса бертэ. Служить каре Забайкальской округысь Борзя посёлокын противовоздушной обороная дивизиын.

Армиысь бертыса, 1972-тӥ арын, математикаен дышетӥсь луыса ужзэ азинтэ. 

Егит дышетӥсьлэсь котыр ласянь быгатонлыкъёссэ адӟыса, районысь кивалтэт сое 1974-тӥ арын Ӟаны гуртысь 8 классъем школае директоре юнматэ. Тӥни со дырысен (1983-1984 аръёс сяна), дано шутэтсконэ кошкытозяз, кивалтӥсьлэсь ужзэ быдэсъя. 

1974-тӥ арын Ӟаны школаын 447 нылпи дышетскем. Дышетӥсьёслэн но лыдзы трос луэм. Иван Васильевич шуг-секытъёслэсь кышкатэк, вань кужымзэ, визьзэ но мылкыдзэ сётыса ужаны кутске.

Кивалтӥсь луон — со капчи уж ӧвӧл. Со Инмарен сётэм быгатонлык. Дышетӥсьёсын, дышетскисьёсын, анай-атайёсын юн кусып возьыса, кутскем ужзэ пумозяз вуттыса, умоесь азинсконъёсы вутске. Школалэн коллективеныз кивалтонъяз, Иван Васильевич котьку валтэ одӥг сюрестӥ —гуртын будэм нылпиослэсь тодон-валанзэс, лулчеберетсэс (культуразэс) вылӥе ӝутонэн. Мукет калыкъёсын ӵош, удмурт нылпи но мед быгатоз вылӥ тодон-валан басьтыны но, улон сюрессэ бырйыны но. 

1982-тӥ арын Ӟаны школаез покчиёзо кельтыса, Тюнтере выжо. Кӧня уйёссэ изьытэк, сюлмаськыса ортчытэм секыт нуналъёс луизы, дыр... Таӵе югдурез со дыре дышетӥсьёс но дышетскисьёс гинэ тодо, луоз. Нош кивалтӥсь муртлы трос ужам кужымзэ куштыса кошкон капчи йӧтымтэ, дыр. Кӧня воштӥськонъёс, малпам ужъёслэн быдэсмытэк кылемъёссы, шуг-секытъёс...

Нош улон азьлань но азьлань мынэ. Бызись шур выллем кошке. Ӟаны школалы но шуд пальпотэ. СССР-лэн Верховной Советаз депутат быръён дыръя, калык куремъя, ёрос собраниын юан ӝуто школаез Шор Кушкетэ берыктон сярысь.

1985-тӥ арлэн сентябрь толэзяз школа выльысь ӧсъёссэ усьтӥз, ужаны кутскиз. Нырысь ик 8 классъем луиз, собере, 1987 арын — шоръёзо. 

1995-тӥ арын школамы районысь школаос пӧлын 1-тӥ интые потэ. Районын ортчем олимпиадаосын вормонъёслэн лыдзы мултэсмыса мынэ. 

1996-тӥ арын школамы «Школа года» шуыса пусйиське. 
Вылезлы кыстӥськыса, ас котыраз усто дышетӥсьёсты люкаса, школа азьветлӥсьёс радэ потэ. 

Аръёс ортчо, школа вужмыса мынэ. 2003 арын, улонлэн туала куронъёсызлы утьыса, Иван Васильевичлэн тыршеменыз, чебер но выль школа усьтӥське.

Иван Васильевич калык пӧлын но бадӟым уж нуэ. Ужаны кутскемез дырысен со сюлмысен тырше асьме калыклэсь культуразэ азинтон бордын. Калык фольклор вылын ужаса, солэн кивалтэмез улсын культура юртысь ансамбльлэн ужез азинтӥське. Та уж кутске школаысен ик. «Инвожо» фольклор ансамбль пыр потӥзы трос гинэ пиналъёс. (Али дыре но та уж мынэ, Виктор Павлович Камаев кивалтэм улсын котькуд аре вормонъёсы вутске).

«Италмас» ансамбльлэн сценической костюмзылэн эскизэзъя Казаньын выль костюмъёс вурытэ. Нырысьсэ дӥсяса, Казане «Играй гармонь» фестивале мыно. Кыкетӥзэ костюмъёсты вурытэ Ижкарын, аслаз дышетскисез Пётр Павлович Данилов дорын.

О. Н. Исаевлэсь — Россилэн Героезлэсь — Буре ваён нуналзэ но Иван Васильевичлэн кичӧлтэмез улсын 14-тӥ толшоре ортчытыны кутским. Олег Исаев спортэз яратэ вал, тужгес но куасэн ӵошатсконъёсты. Соин ик та нуналэ котькуд ар ортчытӥсько на пӧртэм ӵошатсконъёс.

Та бадӟым букваен гожтымон дышетӥсьлэсь жадьытэк ужамзэ азинсконъёсыз но пӧртэм ушъям грамотаосыз, медальёсыз юнмато. Соос пӧлын СССР-ысь Калыкез дышетонъя министерстволэн грамотаез, «Калыкез дышетонысь отличник» дано ним, Президентлэн указэзъя «В память 1000-летия Казани» медалез. Та ӧвӧл-а бадӟым вырйылъёсы вуон, шуд, калыклэн гажамез но дунъямез? 

Дышетӥсь но кивалтӥсь сяна, Иван Васильевич йӧно кузпал, 3 нылпиослэн яратоно атайзы. 

1974-тӥ арын Раиса Петровнаен семья кылдыто. Визьмо но лякыт, востэм ныл вордске но будэ Кисаль (Сала Кушкет) гуртын. Быдэс улонэз, кузпалэзлэн кадь ик, адямиослы ӟеч уж лэсьтонэн герӟаське. Ципья больницаын медсестра луыса ужа. Соос ӵошен, ог-огзэс гажаса но яратыса, гуртамы самой гажамон семья луыса уло. Кык пи но одӥг ныл будэто. 

Быдӟымез пизы, Алексей, кык образование басьтэ: гурт удысъя но юридической. Кыкетӥез пизы, Андрей, трос дыр ӵоже служить кариз Владивостокын (али дыре Ижкарын улэ но ужа). Нылзы, Алина, атаезлэсь ӧнерзэ азинтэ, Ципья школаын англи кылэз дышетэ. 

Котькуд адямилэн улоназ тужгес но яркыт тодэ ваёнъёсыз школаен герӟаськемын. Бадӟым шумпотон — школаен, эшъёсын пумиськон! Кӧня тунсыкоез, паймымонэз, яркытэз! Дышетӥсьёс шумпотыса пумитало дышетэм пиналъёссэс, кудъёсыз пӧртэм удысын тыршо! 

Школаез йылпумъям дышетскисьёсмы но Иван Васильевичлы шуныт кылъёссэс верало, солэсь зэмос Дышетӥсь но Кивалтӥсь луэмзэ пусъё.

О. Н. Исаев нимо Шор Кушкет шоръёзо школалэн коллективез.

Гажано дышетӥсьмылы, кивалтӥсьмылы Иван Васильевич Ермаковлы 80 аресъем юбилееныз валче акростих:

Ӟеч кылъёс вераса юбилей нуналэ,
Егитлык сӥзиськом Тӥледлы,
Чебересь сяськаос кузьмаса,
Кияды ми шуныт сётӥськом.

Ымкырезь кадь шулдыр гуръёсын
Лул-сюлэм пушъёсты бурмозы, 
Адӟоды Тӥ соку Асьтэлэсь ужъёстэс,
Сомында дышетон удысын тыршемдэс.
Ьььь
Клуб ужъёс но тросэз ортчизы Тӥледын,
Огинэ люкаса, дышетӥсь эшъёсын,
Мамында ужрадъёс ортчытъям гуртъёсын, 
Юмшаны ветлылӥм Удмуртлык дуннее.

Бен, бадӟым та вордскем нуналад
Инмармы мед сётоз тазалык но шудбур,
Льӧль-ӵыжыт бамады мед шудоз пальпотон,
Етӥзлык медаз кошкы ноку!
Емышо сад-бакча пӧлады трос аръёс
Нуналъёс мед каньыл ортчозы.

Ӟаны шоръёзо школаысь ужась коллективлэн, дышетскисьёслэн но школаез йылпумъям дышетскисьёслэн нимынызы Василий Петрович Никитин.