Луонлыкъёсын пайдаяськыса ужало

Улын Ушма фермаен кема аръёс ӵоже гурт возёсъя управлениын валтӥсь зоотехник луыса ужам Айдар Исмагилев кивалтэ. Со 2015 арысен «Сурнай» обществоын тырше вылэм ини. Нырысь зоотехник-селекционер луэм, куинь ар талэсь азьло фермалэн заведующиезлы тодмостӥллям.

— Ми дорын уж сменаен радъямын. Нырысетӥ сменалэн ужан дырез ӵукна ньыль часэн кутске, 12.00 часозь кыстӥське. Куазь шуныт ке луэ, скалъёсты кардае поттӥськом. Кыкетӥ смена 12.00 часысен 19.00 часозь мынэ. Уноез скал кыскисьёсмы шорлыдо аресэн, пӧлазы дано шутэтсконын луыса ужасьёс но вань. Туннэ нуналэ кадръёсын шуг-секытъёс ӧвӧл ке но, азьпалан та ужпум проблемалы пӧрмоз, та сюлмаськытэ, — вераны кутскиз фермаен кивалтӥсь.

Улын Ушма фермаын вить скал гид лыдъяське. Татын 20 скал кыскись ужа. Светлана Добромыслова, Галина Плотникова, Людмила Романова кемалась дырысен ини та ужын тыршо. «Гажамонэсь, ас ужзэс усто быдэсто», — шуо соос сярысь. Кунянъёсын вырись пудо утисьёс Татьяна Никифорова но, Фания Габдуллина но ушъямон ужасьёс. Татьяна кылем арын Азьмынӥсьёслэн слётазы но пыриськем.

— Туннэ нуналэ суткалы укмыс тонналэсь трос йӧл кыскиськом, солэн укмыс тоннаез государстволы вузаське. Кунянъёслэн нуналлы привессы 790 грамм луэ, — шуэ, нылкышноослэн ужаменызы тодматыса, Айдар Исмагилев.

Гужем ке вуэ, Улын Ушма фермаысь скалъёсты кутьые потто. Та скалъёслэн пыдъёссылы пайда ваён понна ужаське шуыса валэктэ фермаен кивалтӥсь. Кутьы возьманы «Сурнай» общество бусыын инты висъям. Азьло аръёсы 5-6 медъям мурт ке возьмам, кылем арын электропастух басьтӥллям.

Мукет коллективъёслэсь висъяськыса, «Сурнай» обществоын пудо утисьёсты сюдон радъямын, пӧсь обед но дасяло вылэм. Сиён пӧзьтӥсьлэсь Татьяна Терентьевалэсь ужамзэ ужасьёс но, кивалтӥсьёс но кельшыто. Праздникъёсы табанен но, пе, сюдэ.

Коллективен тодматскыса ветлыку, Ираида Михайлова доры дугдӥмы. Со Зоя Гимрановаен ӵош скал кыске вал. Ираида Ярак-Чурма гуртын вордскемын. Покчи Лӧзя гуртысь воргоронлы Юрий Спиридоновлы бызем. Одӥг ныл но одӥг пи будэтӥллям. Туннэ нуналэ соос кык внукъёссылы яратоно ӵужанай но ӵужатай луо ини. Юрий «Сурнай» обществоын шофёр луыса тырше. Ираида кӧня ке дыр ӵоже типографиын ужам, собере Бадӟым Лӧзялэн нырысетӥ люкетаз фермаын кунян утем. Улын Ушма фермаын ужаны кутскемез дырысен но 14 ар ортчем ини.

— Кузпалэлэн но, аслам но ялан ужан интымы вань. Уждунэз дыраз сёто. Ас хозяйствоямы но уно пудо вордӥськомы, куинь скалмы вань, йӧл вузаськом. Та семья бюджетлы бадӟым юрттэт ук, — шуэ Ираида Михайлова.

Коллективысь кинэн гинэ ӧй вераськы, ваньзы ужан интызы вань шуыса шумпотэмзэс веразы. Фермаен кивалтӥсь Айдар Исмагилев но коллективлэсь эшлыко, ӵошен луыса ужамзэ пусйиз.

Кошкон азямы вуонолы планъёссы сярысь юатэк кельтыны ӧй быгаты.

— Вуоноын 200 йырлы чаклам кунян гид лэсьтыны малпаськом. Соку скалъёслэсь лыдзэс но йылэтыны быгатысалмы, — шуиз фермаен кивалтӥсь.