«Лыжня Улисьяла» ӵошатсконлы — 10 ар

Арлы быдэ, тулыспал толэзе, быдэс Россиын «Лыжня России» ортчытӥське. Сяме пыремъя, тани дас ар ӵоже ини, 2016-тӥ арысен кутскыса, Улисьял гуртын таза улонэн эшъяськытон, куасэн бызьылонэ кыскон но тазалыкез юнматон вылысь «Лыжня Улисьяла» ним улсын куасэн бызьылонъя ӵошатсконъёсты ортчыто. 

Ӵошатсконъёсты радъяло ас удысазы мыло-кыдо тыршисьёс, Улисьялысь Виктор Фёдоров но куасэн бызьылонъя тренер Роман Никитин. Вань та аръёс ӵоже вожвылъяськонлэн спонсорез луиз но луэ «Активист» СХПК-лэн тӧроез Закиев Рафиль Наилевич. 

Нырысь-валысь ӵошатсконъёс пӧртэм арлыдъем дышетскисьёс пӧлын ортчылӥзы, пумен пиналъёс сьӧры кыстӥськыны ӧдъязы куасэн бызьылыны яратӥсь бадӟымъёс но, анай-атайёс но. 

Озьы арысь аре пыриськисьёс тросгес но тросгес луизы. Ӟеч вожвылъяськон кылдытыны кутскизы бускельёсмы но — Марий Элысь но Киров улосвылысь куасэн бызьылӥсьёс. Тау соослы. 

Туэ пыриськисьёс 64 кузя вал. Тужгес пичиезлы 4 арес, тужгес арлыдоезлы — 67.

Дышем сямъя, нырысь ик кутскон сётэмын вал тужгес покчиослы, кудъёсыз куасэн бызьылонын нырысетӥ вамышъёссэс лэсьто. Анайёс-болельщикъёс, нылпиоссылэсь ӟырдыт мылкыдын быземзэс адӟыса, асьсэос но пыриськыны мылкыд каризы. Куасэн туж йӧно бызьылӥзы. 

Та ӵошатсконъёсын вормись муртъёс ӧвӧл, ваньзы задор но ӟеч мылкыд басьто. Кин ке понна, оло, та ӵошатсконъёсы пыриськон бадӟым куасэн бызьылонэ нырысетӥ вамыш луоз. 

Финиш бере пыриськисьёсты возьмаз зумыто шыд, ческыт табань но ческыт зыно чай. Тау кылъёс ваньзылы, кин пыриськиз куасэн бызьылонъя праздникез ортчытонэ: Валентин Максютовлы, Надежда но Виталий Изергинъёслы, Лада Фёдоровалы — вань юрттӥсьёссылы (нош соос татын туж трос), кудъёсыз праздникез ортчытонэ асьсэлэсь люкетсэс пыртӥзы. 

Та лымыен узыр толалтэе но ӵошатсконэз ортчытон нуналэ куазь умой, каньыл но шуныт вал, ӵошатсконэз йылпумъян азьын шунды потӥз, куасэн бызьылӥсьёсты шумпотыса ӟечкылаз но тулыслэсь матэктэмзэ тодэ вайытӥз кадь.

Екатерина Ракова, Вукогурт

Туспуктэмъёс: Ципья шоръёзо школа