Маин егитъёсты синмаськытэ эмтодос?

Туннэ нуналэ вань удысъёсын кыӵе ке воштӥськонъёс мыно. Нош эмтодос удысын соос кык поллы ӝоггес ортчо. Со валамон но, адямилэн тазалыкез номаин ӵошатонтэм, соин эмчиослы но нуналлы быдэ тодон-валанъёссэс будэтоно луэ. Тазалык — самой бадӟым узырлык, сое ыштӥд ке, берен берыктыны уг ни луы.

Эмтодос удыс — со туж кылкутымон но трос малпаськытӥсь уж. Татын тынад кияд адямилэн улонэз гинэ ӧвӧл, нырысь ик татын адямилэн семьяез азьын кыл кутӥськод. Дышетскон интыын тодон-валан басьтэм сяна, нуналлы быдэ выльзэ тодыны кулэ, пӧртэм югдуръёсын пумиськыса, соосты пыр-поч эскероно луэ. 

Больницаысь черодъёсын сылыку, куддыр пӧртэм вераськонъёсты кылыны тупа. Одӥг адями понна врач умой но ӟеч сямо ке, мукетызлы со чурыт но валасьтэм потыны быгатэ, одӥг адями понна опытэн врач оскымонгес луэ, мукетыз егитъёсты вылӥ дунъя. Котькуд адямилэн аслаз учконэз, аслаз быръёнэз. Опытэн но егит эмчиосты учконо ке, татын пӧртэм сямен вераны луэ. Туннэ статьямы ӵапак вить егит нылъёс-эмчиос сярысь луоз. Соос ваньзы Ципья шоръёзо школаын, одӥг классын дышетскизы. 11 классэс йылпумъяса, эмтодос удысъя тодон-валан басьтыны малпазы. Уйёсты изьытэк, вань экзаменъёсты, зачётъёсты умоен сётыса, соос туннэ нуналэ эмчиослэн радазы сыло. «Куддыр секыт, шонер бырйи меда шуыса юанъёс но кылдо, но адямиослы юрттэмлэсь пайдазэ адӟыса, та малпанъёс соку ик тӧлӟо», — шуо нылъёс. Та ик возьматэ соослэсь ужзы шоры кылкутыса учкемзэс. Кыӵе гинэ шуг-секытъёс пыр потоно уг луы, соос асьсэлэсь кулэлыксэс умой валало. Бен, арессыя туж егитэсь ке но, вылазы бадӟым кылкутон басьтыны соос уг кышкало. 

Вить кузя нылъёс пӧртэм интыосын но пӧртэм эмтодос ӧръёсын ужало, но ужзылэн пуштроссы одӥг — адямилэсь улонзэ утён но адямиослы шуге-леке шедьыкузы юрттон. Туннэ статьямылэн героиняоссы: Людмила Закирова, Александра Раимова — Тагашур гуртын вордӥськем но будэм нылъёс, Вероника Петрова, Инна Галимуллина — Сырья гуртысь нылъёс но Елена Вятчина — Сизнер гуртын вордӥськыса будэм нылаш.

— Малы эмтодос удысэз быръёно кариськиды? Та удысын маиз тужгес но кельше? Кыӵе шуг-секытъёсын пумиськоно луиськоды?

Людмила Закирова: Быдэ вуон сюресын но школаез йылпумъян азьын ӧнер быръён — туж секыт ужпум. Мынам потэ вал вуоно уже востребованной но нимо-дано мед луоз шуыса. Тани тросэз уже мылпотытэк гинэ мыно, мынам потэ вал уждурам шумпотыса мыныны. Котьку потэ вал адямиослы юрттэме. Соин но та валтӥсез луиз, дыр, азьлань сюресэз быръёнын. Йошкар-Олаысь медицинской колледжез йылпумъяса, «Земский фельдшер» программая вордскем палъёсам ик бертӥ. Ужасько Балтась центральной больницалэн кивалтэмез улсын Вылын Субаш гуртын фельдшер луыса. 

Валтӥсез, мар мыным кельше та ужын — со адямиослы юрттыны, адямиослэсь улонзэс утьыны, ужамлэсь пайдазэ адӟыны но калык понна кулэ луэмез шӧдыны. Озьы ке но, фельдшерлэн нуналмысь быдэстоно ужез ялан дышетсконэз но кылкутӥсь решениосты юнматонэн герӟаськемын. Пӧртэм адямиосын ужаськом, арлыдоослы юн саклык висъяськом. Суткалэн котькуд минутаз телефон дорамы улэ, шӧдтэк шорысь шугомем адямиослы но дыраз юрттэт сётыны вутсконо ук. 

(Азьланьтонэз вань)