Мар сярысь вера вашкала кубыз? (1 люкет)

Капчи мылкыдо но усьтэм сюлэмо бигерысь удмуртъёс люкаськизы дано Ципья музъемын асьсэлэсь сям-йылолъёсын, калык дунлыкъёсын тырмем праздниксэс пусйыны. Лыктэмъёс понна пӧртэм пумо ӵошатсконъёс, вожвылъяськонъёс но чеберянъёс дасямын вал.

Куноез гажаса пумитаськом

Куноез пумитан бадӟым кужымез но капчи мылкыдэз кулэ каре. Кызьы адямиез пумитаськод, озьы ик солэн быдэс нуналэз ортче. Тодӥськом, удмуртъёслэн та йылол вираз пыӵамын ини. Вань ческытэз но, курытэз но ӝӧк вылын луэ. Куноез пумитан котьку жингресь гуръёсын, задор эктонъёсын пӧлэстӥськыса мынэ. Таяз праздник 20-лэсь трос творческой коллективъёсты люказ. Татарстанысь, Киров улосысь, Удмуртиысь лыктэм куноос ас палъёссылы матын луись удмурт дӥськутъёсын чебертӥзы праздникез. Котькуд сэрегын улӥсь удмуртъёс маин ке висъясько, кырӟанъёссы гинэ но макем пӧртэмесь но тунсыкоесь соослэн. Коллективъёсты мылысь-кыдысь пумитаса, эктон-кырӟанъёсын мылкыдзэс ӝутӥзы, табанен но чаен куноязы. Бератаз соосты пумитазы «Калыкъёслэн эшъяськонзы» шаертодонъя музейын ужасьёс. Куноосты Балтась ёрослэн историеныз, дано адямиосыныз, тӥрлыкъёсын, сям-йылолъёсын тодматӥзы.
— Зэмзэ вераса, нырысьсэ вуим ай та музее. Милемлы туж кельшиз. Паймыса бырим, макем ваньмыз усто радъямын татын. Умой пумитазы, кыл ӧвӧл. Сиёнэз но, юонэз но, кырӟан-эктонъёс но, татын ик праздник ортчытыны дась вал ини ми (серекъяса). Кыдёкысь лыктӥм ке но, чик ӧм жаде, шумпотыса вуиськом котькуд Гырон быдтонэ. Милям коллективмы но арысен аре выль репертуареныз шумпоттыны тырше. Пӧламы пересез но, егитэз но вань. Шумпотӥськом, бигер музъемын но удмурт лулчеберетмы но кылмы утиське шуыса. Тазьы тани кусыпъёсмес юнматыса гинэ мед уломы азьланяз но, — мылкыдзэс усьтӥзы Елабугаысь лыктэм куноосмы. 

Таӵе ӝутскем мылкыдэн тырмем куноос вамыштӥзы праздникез ортчытон понна радъям валтӥсь интые. Кивалтэтысь сётэм ивортодэтъя, вань площадкаосты радъян-лэсьтон 14 миллион манет тыр луиз. Сӥё-дано куноос пӧлын Татарстанысь Кун Кенешлэн Тӧроезлэн воштӥсез Марат Ахметов, вань удмуртъёслэн «Удмурт Кенеш» мерлыко огазеяськонзылэн кивалтӥсез Андрей Ураськин, Татарстан Республикаысь удмуртъёслэн лулчеберетъя йӧскалык автономизылэн кивалтӥсез Алексей Арзамасов но Балтась ёрослэн главаез Рамиль Нутфуллин луизы. Соосты пумитаз удмурт шӧмо вашкала юрт. Тае Ӟаны гурт поселениын ужась но улӥсь калык дасяз. Татын пӧртэм сям-йылолъёсын герӟаськем ужъёсты возьматӥзы. Туж тунсыко вал куноосты кубыз лэсьтонэн тодматскыны. Та ужез Сырья гуртысь усточимы, туннэ нуналэ ёросамы луэм одӥг гинэ кубызчи Николай Плотников быдэстӥз. Нимысьтыз паймымон луиз зэмос дуриськисьлэсь ужзэ адӟыны. Вашкала но вуныны кутскем киужъёс али туж вылӥ дунъясько бере, та инты адямиослы тужгес но тунсыко потӥз. Бератаз делегациез мастер-классъёс ортчытон площадкаосын, ужась магазинъёсын тодматӥзы. 

Пролог

Праздниклэн сӥё-дано кутсконэз аслаз трос калыко, яркыт буёло луэменыз синмаськытӥз. Паськыт возь вылын дано фольклор кырӟанъя но эктонъя «Айкай» кун театрысь артистъёс но ёросысь коллективъёс чебер представление пуктӥзы. Шошма удмуртъёслэн историзыя, этнографизыя, крезьгуро фольклорзыя кылдытэм «Кубызо шаер» шуыса нимам чебер спектакль праздниклэн зэмос тодметэз, валтӥсь пуштросэз луиз.

Прологлэн валтӥсь темаезлы но 2025-тӥ арын ортчем «Гырон быдтонлэн» пусэзлы кубызэз — шошма удмуртъёс дорын туннэ нуналозь но утиськем крезьгуро инструментэз — бырйизы.

Кыӵе сӥлы кариллям азьло аръёсы кубызэз но кубызчиосты ёросысь удмурт гуртъёсын! Шошма удмуртъёс пӧлын со тужгес но паськыт вӧлмем крузьгуро тӥрлык луэм. Тодэ вайизы Вуж Кушкетысь дано Кубызчи Миктаез (Захаров Никита Григорьевич) но, туннэ нуналэ кубыз гуръёсты азьланьтӥсьёсты но. Та ик луиз Балтасьын ортчись праздниклэн шорсюлэмез. Син азьын вакчи дыр кусып вошъяськись суредъёс зэмзэ но паймытӥзы. Соку ик возь вылын дано Чаддя базар но улӟиз. Татын мар гинэ ӧй вал: пӧртэм вузъёс, удмурт, бигер, пор эктон-кырӟанъёс, калыкъёслэн эшлыко кусыпъёссы. Бератаз ини праздникез апай сямен но ӟыгытларской эктонъёс золтӥзы. Бубылиос кадь эктӥсь удмурт кышномуртъёс апай эктонлэсь вань чеберзэ но мур пуштроссэ возьматӥзы. Ведь вашкала дырысен котькуд удмурт кышномурт тодэ: эктонын котькуд вамыш, учкон, ки вырем огшоры гинэ ӧвӧл, солэн мур пуштросэз вань. Кышномурт кӧня ке возьдаськыса эктэ ке, воргоронъёс ини мылкыдзэс уг вато. Соослэн выросъёссы но воргоронлэсь мерлыкын интызэ возьмато.

Нимысьтыз пусйыны кулэ прологе пыриськисьёсты. Соос кӧня ке нунал ӵоже котькуд движениез ӵошен лэсьтыны дышетскизы. Удмуртъёсын одӥг радэ бигерез но, ӟучез но, порез но султӥзы. Та возьматэ, кызьы элькун праздник калыкъёсты огазея. Но праздниклэн кутсконэз сыӵе яркыт ӧй луысал Удмурт Элькунысь «Айкай» кун театрысь артистъёстэк.