Мар сярысь вера вашкала кубыз? (2 люкет)

Дуно кузьымъёс

Калыкез пумитаны но данъетъёсты кузьманы кыл сётӥзы куноослы. Соос «Гырон быдтонлэсь» кулэлыксэ но шулдырзэ пусйизы. Нимысьтыз удмурт калыклэсь ужез яратэмзэ но котькуд быдэстэм ужзылэсь рос-прос луэмзэ пусйизы.

— Асьме элькунамы 175-лэсь трос калыкъёс эшлыко уло. Соосты ваньзэсты одӥг бадӟым семья огазея, кудӥз югыт вуоноезлы оске, со семьялэн нимыз — Татарстан Республика. Котькуд калыклэн аслаз сям-йылолъёсыз, аспӧртэмлыкъёсыз, лулчеберетэз, кылэз но праздникез. Егит дыръёсы мыным удалтӥз Балтась ёросын улыны но ужаны. Шумпотыса тодам вайисько ёросысь кык хозяйствоосын ужан дыръёсме, кудъёсаз куинь удмурт гуртъёс вал. Татын туж мылкыдо адямиос улӥзы. Соос ужез яратӥсь, тыршисесь, мыным туж кельше вал соосын огкылысь ужаны. Самой усто механизаторъёс, самой усто пудо-живот вордӥсьёс ик удмурт гуртъёсысь вал мон дыръя. Сыӵе адямиосын ужаны но улыны кылдӥз шуыса данъяськисько. Ваньдылы бадӟым тау, кин сак уте ас калык мерассэ, лулчеберетсэ, кылзэ, сям-йылолъёссэ. Таӵе ужрадъёс пыр ик асьмеос валче луиськом, шуныт кусыпъёсмес возиськом. Озьыен, асьмеос Россия шуэм одӥг бадӟым семьяез кылдытӥськом, — вазиськиз вань лыктэмъёслы Марат Готович.

Котькуд элькун праздникын яркыт люкет луыса пуксе данъетан ужрад. Таяз но кузьымъёс трос луизы. 

ТР-ысь Кун Кенешлэн Тӧроезлэн Таукарон гожтэтэныз пусйиськизы:
— Геннадий Ефремов — «Дуслык» возёсысь механизатор;
— Николай Плотников — Сырья гуртысь нимаз ужбергатӥсь.
Удмурт Элькунысь йӧскалык политикая министерстволэн Таукаронэныз данъямын вал Агрызысь покчи классъёсын дышетӥсь Екатерина Михайлова. 
ТР-ысь «За заслуги перед Балтасинским муниципальным районом» медален пусйиськизы:
— Геннадий Кузнецов — Удмурт Элькунысь фольклор кырӟанъя но эктонъя «Айкай» удмурт кун театрлэн артистэз, Россиысь Сӥё-дано артист, Удмурт Элькунысь калык артист;
— Ольга Пчельникова — Покчи Лӧзя школаысь удмурт кылъя но литературая дышетӥсь, Балтась ёросысь удмуртъёслэн «Кенеш» НКА-зылэн кивалтӥсез;
— Светлана Щербакова — Вуж Кушкет гурт клублэн заведующиез.
Лулчеберет удысэ бадӟым люкет пыртэмзы понна ТР-ысь Лулчеберетъя министерстволэн Данъян грамотаеныз пусйиськизы:
— Валентина Билык — Набережные Челныысь «Родник» коллективлэн кивалтӥсез; 
— Виктор Камаев — О. Н. Исаев нимо Шор Кушкет шоръёзо школаысь дышетӥсь, «Инвожо» ансамблен кивалтӥсез;
— Маргарита Чернова — Кукмор ёросысь Вуж Юмья гурт клубысь устолыкъя кивалтӥсь.
Лулчеберет удысэ бадӟым люкет пыртэмзы понна ТР-ысь Лулчеберетъя министрлэн Таукаронзэ басьтӥзы:
— Мария Ботникова — Менделеевск ёросысь Енабердино гурт клубысь устолыкъя кивалтӥсь;
— Маргарита Калугина — Нижнекамскысь удмуртъёслэн мерлыко огазеяськонзылэн кивалтӥсез;
— Ольга Плотникова — Балтась ёросысь «Хезмэт» газетлэн валтӥсь редакторезлэн воштӥсез.
Трос аръёс ӵоже сюлмысь тыршемзы но лулчеберет удысэ бадӟым люкет пыртэмзы понна «Ресурсный центр внедрения инноваций и сохранения традиций в сфере культуры Республики Татарстан» коньдэт учрежденилэн Таукаронэныз пусйиськизы:
— Алёна Богданова — Агрыз ёросысь Сарсак-Омга гурт клублэн заведующиез;
— Лариса Заитова — Агрыз ёросысь Сарсак-Омга библиотекалэн валтӥсь библиотекарез, Сарсак-Омга гурт клублэн хормейстерез;
— Алефтина Иванова — Шор Кушкетысь лулчеберетъя юртлэн заведующиез;
— Валентина Иванова — Сабы ёросысь Иштуган гурт клубысь удмурт фольклоръя «Тюрагай» коллективе пыриськись;
— Лидия Макарова — Кукмор ёросысь Вуж Юмья гурт лыдӟиськонниысь бибилиотекарь;
— Елена Сергеева — Кукмор ёросысь Вылын Шунь гурт клублэн заведующиез.

Татарстан Республикаысь Балтась муниципал ёросын удмурт калык лулчеберетэз утёнэ но азинтонэ бадӟым люкет пыртэмез понна Татарстан Республикаысь Калыкъёслэн ассамблеязылэн Таукарон гожтэтэныз пусйиськиз Марина Плотникова — Ципья амбулаториысь медсестра.

Татарстан Республикаын удмурт калык лулчеберетэз утёнэ но азинтонэ бадӟым люкет пыртэмез понна Татарстан Республикаысь Калыкъёслэн ассамблеязылэн Коньдоно сертификатэзлы кузё луиз Менделеевск ёросысь удмурт воскресной школалэн «Чингыли» ансамблез (кивалтӥсез — Марианна Кузнецова).
Ӟечкыласьком вылӥ данъетъёсын. 

Арган но та нуналэ кырӟаз

Та вожвылъяськон туэ нырысетӥзэ ортчытӥськиз. Кызьы ивортэ Мария Садовникова, вожвылъяськонэ пыриськон понна туэ 15 куриськон вуэм.
Арганчиос тросэз Балтась, Кукмор ёросъёсысь, Набережной Челныысь, Удмуртиысь вуизы. 

Вал ньыль номинация.

Нимысьтыз дышетскемзы луымтэ 7-10 и 11-16 аресъем арганчиос пӧлын тужгес устоез луиз Агрыз ёросысь Кучук гуртысь Михайлов Вадим. Та категориысь 11-16 аресъем арганчиос пӧлын Сала Кушкет гуртысь Михайлов Арсений куинетӥ интые потӥз.

Нош Сала Кушкет гуртысь ик Камаев Антон со арлыд категориын нимысьтыз дышетскем тужгес усто арганчиос пӧлын кыкетӥ инты басьтӥз. 
Нимысьтыз дышетскемзы луымтэ бадӟым арганчиос пӧлын вормисе потӥзы Вуж Кушкет гуртысь Павлов Алексей, Удмуртиысь Кизнер ёросысь Троицкий Алексей но Менделевск ёросысь Ямщикова Раиса. 

«Арган улсын кырӟан» номинациын вормисе потӥзы Удмуртиысь Карамас-Пельга гуртысь дуэт Иванов Владимир но Смирнов Николай. 

Шудонъёс но мукетэз

Котькуд праздниклэн тужгес шулдыр люкетэз — шудонъёс. «Гырон быдтон» но та люкетэз палэнэ ӧз кельты. Вераны луэ, егитъёс кадь ик, арлыдоос но валтӥсь кузьымъёс понна нюръяськизы. 

Шудонъёсты радъянэ Покчи Лӧзя гурт поселениысь ужасьёс бадӟым кужымзэс пыртӥзы. Со сяна, ёросын паськыт вӧлмем ки нюръяськон но ортчиз. Ортчытӥз Раниль Сафиуллин.

Вань ужрадъёс бӧрсьы калыкез дискотекаен шулдыртӥзы. Ципья музъеме лыктэмъёслы капчи мылкыд кузьмазы Александр Порфирьев, Андрей Корнилов но Ури-бери Орина. Адямиослэн сюлмысь эктэмзыя валамон луиз, соос сюлмысь праздникын шутэтскизы шуыса.

Каллен вань мылкыдъёс буйгазы ини, адямиос выльысь ас ужъёсазы выйизы. Лыктэм куноос понна праздник огпӧртэм луиз, ёросысь калык понна — мукет сямен. Кема но пӧртэмзэ вераны луэ: кинлы ке праздник ӧз удалты, кин ке сое туж вылӥ уровенен дасямын шуэ. Котькуд адямилэн аслаз малпанъёсыз. Удмурт лулчеберетлэн праздниказ кужым пыртэм но пыриськем адямилы сюлмысь тау кылъёсты вераны кулэ.

Балтась музъемын «Гырон быдтон» ортчиз, вуоно 2026 арын удмурт калык пумиськоз ини Мамадыш музъемын.