Матысь куноосыныз ӵош кырӟаны но быгатӥз али

Марфа апай вордскиз Вылын Ушма гуртын 1930 арын крестьян семьяын. 

Та нуналэ Марфа апайлэн иземез но ӧз луы ини, малы ке шуоно ӵукна 9 часэн со куноосты вите вал. Куазь пичияк зорыса улӥз ке но, куноос дыраз вуизы. Вераны кутскиз ёрос главалэн воштӥсез, Покчи Лӧзя гурт поселенилэн депутатэз Наиль Сабирзянов. Марфа апайлы кузь гумыр но тазалык сӥзьыса, Наиль Нургаязович дуно кузьымъёс но сяська керттэт кузьмаз. Ӟечкыланзэс азьланьтӥзы социальной дурбасьтонъя ёзэтын ужась Фания Юсупова но Покчи Лӧзя гурт поселенилэн главаез Лариса Михайлова. Соос но Марфа апаез та бадӟым юбилееныз сюлмысь ӟечкылазы, таза луыса, 100 аресозь улыны сӥзизы.

Туж бадӟым тау ваньзылы милесьтым пересь апаймес сӥлы каремзылы. Тужгес паймиз Марфа апай Путинлэн гожтэтэзлы. «Кытысен бен со мынэсьтым вордскем нуналме тодэм?!», — паймыса юаз. Быдэс нуналлы апайлэн мылкыдыз ӝутскемын вал.

Ачиз сярысь со уно вераны уг яраты. «Пичи дырмы милям шуген ортчиз», — шуэ со. Семьяязы соослэн вить нылпи луэм. Апаймы — кыкетӥез нылпи. Атайзэс 1942 аре тулыспал толэзе жугиськонэ басьто. Со арын ик оштолэзе кулэмез сярысь гожтэт басьтӥллям. Анайзы вить нылпиоссэ будэтэ, сюдэ, дӥсятэ. «Секыт вал со аръёсы котькинлы», — шуэ Марфа апай. — Пичиысен бусы ужъёсы но пыриським, анайлы но юрттӥським«. Анайзы уже кошкыку, покчи сузэр-вынъёссэ но возьманы тупам. «Дышетскон но 4 класс сяна ӧз йӧты», — шуэ Марфа апай. Ужан сюрессэ со «Красный труд» фабрикаын кутскем. Соку со интыяськемын луэм Карадуванын. Татын со вуриськыны дышетскем. Собере ужан сюрессэ азьланьтэм Балтасьысь мех арбериосты вурон фабрикаын. Пенсие потытозяз со отын сюлмысь тырше. «Куддыр шутэтскон нуналэ но ужатӥзы», — шуэ со. Котьку ик сётэм нормаез тырмытыны тырши, пе. Азьло, автобус луымтэ дыре, Ушмаысен Балтасе вуытозь эшъёсыныз ӵош пыдын ветлӥллям, зорыку но, лымыяку но. Ужакуз «Ударник социалистического труда» гадьпусэн пусйиллям. Пенсие потыкуз «Ветеран труда» медален данъяллям. Быдӟым Атыкай ож быремлы сӥзем юбилейной медальёсыз но трос Марфа апайлэн. Туэ но война бырем дырысен 80 ар тырмонлы сӥзем медален пусйизы. «Азьло тэльмырыса улэм понна, туннэ нуналлы, Инмарлы тау, — улонэ ракат, коркае шуныт, кӧттырыны котьма трос. Дорысь утисьёсылы но бадӟым тау, утё, вордо, эмъяло монэ. Мар кулэ на пересь муртлы: тазалык, шуныт, небыт кыл но сиыны нянь» шуэ Марфа апай. Али йырсазез умой Марфа апайлэн. Юбилеяз матысь куноосыныз ӵош кырӟаны но быгатӥз ай. Котькуд нуналэзлы шумпотыса кема улыны мед кылдоз солы.

Екатерина Иванова ,
Вылын Ушма гурт