МЧС – куинь букваослэн бадӟым пуштроссы

Спасательёслэн праздниксы — со зэмос геройёслэн нуналзы, ведь шуг-секытэ, шимес учыре шедем адямилы соос котьку юрттыны дырто. Сыӵе чрезвычайной югдуръёс сяна, соослы алон ужрадъёс но оскемын. Нош нимысьтыз нуналзы 1995 арын тодмостӥськиз.
Тылпу, тулыс ву тудӟон, лымы усён, музъемзуркан, сюрес вылысь авария, кытчы ке паськан но мукетъёсыз — та ваньмыз «мчсникъёслэн» ужзы луэ. Соосты ваньзэ дыраз быдэстыны трос кужым но чылкыт визь кулэ. Соин та удысэ ужасьёсты рос-прос эскерыса басьто. Та туж кылкутымон но сак луэмез кулэ карись уж. 

Малпаськоды, МЧС-ын ужасьёс та нуналэз паськыт пумитало? Ӧвӧл, та нуналэз тросэз ас ужан интыязы ортчыто. Соослэн ӧвӧл шутэтскон нуналъёссы, янгышаны но правозы ӧвӧл, ваньзэ вакчи дыр куспын малпаськыса быдэстоно. 

— Телефон котьку ми дорын луыны кулэ. Изьыны но телефонэн выдӥськом, мунчое но телефонэн пыриськом. Пӧртэм учыръёс луо, ми понна шутэтскон нунал пуктэмын ке но, котьку «на чеку» луоно, малы ке шуоно пӧртэм югдур кылдыны быгатэ. Тани али 29 толсурысен 8 толшорозь самой ӟырдыт вакыт, та дыре ми кык поллы сакгес луиськом. Адямиос но мед валасалзы: тылпу — со шудон уж ӧвӧл, — та бордысен ик кутскиз вераськонмы.

Нялтас вераса, «Азьлане» газетын 2020 арлэн 51-тӥ номераз спасательлэн уженыз рос-просгес тодматэмын вал, нош туннэ вераськонмес мукетгес ӧрын валтэме потэ: праздникез пусъён амалъёсын тодматскон, спасательёслэн пушдуннеез, воштӥськонъёс но туала югдуръёсын герӟаськем малпанъёс сярысь. Со понна сюресэ нош ик Ципья гуртэ вуттӥз. 

Ёросамы кык постъёс ужало: Ципьяын но Янгулын. Татысь ӧнерчиос ТР-ысь МЧС-лэн составаз пыро, нош Балтасьысь МЧС гарнизон луэ ини, со Россиысь МЧС-э пыре. Ципья постлэн киулаз Ӟаны палась гуртъёсысен кутскыса, Атня гуртлы матын луись территория пыре, со 24 пала гуртъёс. 

Мон лыктон нуналэ ( 25 толсуре — Ю.Щ.) татын вить адями службазэ нуэ вал: постлэн начальникез Дмитрий Щербаков (2020-тӥ арысен службазэ нуэ), отделенилэн командирез Эдуард Перемечев (аслэсьтыз ужзэ 2012 арысен быдэстэ, нош 2016 арлэн 13 толсурысеныз отделенилэн командирез луэ), ӧнерчиос Кафиль Лотфуллин но Ислам Хакимзянов, водитель Василий Копаров. Капчи мылкыдоесь, лякыт вераськисесь, соку ик юанъёслы валэктонъёс но шедьтӥзы.

Татын воргоронъёс гинэ ужало. Озьы ке но, выжъёс чылкытэсь, гаражазы но экскурсия ортчытӥзы, машинаос эскеремын, ужлы дасесь. Вань ужъёссэс асьсэос быдэсто уга. Ужан условиоссы но умоесь, шуныт, караул понна нимысьтыз комната, кухня, кӧня ке шутэтсконлы комната, татын ик гараже потон ӧс но.

— Дмитрий Николаевич, тодматэ вал постлэн туннэ составеныз но нуналдылэн радлыкеныз.

— Туннэ нуналлы милям постамы 11 ужась лыдъяське. (Соосты ваньзэс туспуктэмын адӟыны быгатоды). Соос пӧлын егитъёсыз но, кема аръёс ӵоже ужасьёсыз но вань. Нуназе вить адями дежурствоын луэ, уйинлы кыкез кыле. Котькудӥз аслэсьтыз ужзэ рос-прос быдэстэ, даллашонъёсмы уг кылдо. Сменаосамы сутка ужало но куинь нунал шутэтско, чрезвычайной югдур кылдӥз ке ини, резерв но вызове пота. Тани нимысьтыз расписани но вань, соя нунал график радъяське. Милям ужамы шудтэм учыръёсы, тылпуосы потон гинэ уг пыры, ми арлыдоос, умойтэм условиосын улӥсь но трос нылпиё семьяос доры инструктажен потаськом, озьы ик каникулъёс азьын одно ик школаосы лыктӥськом, нылпи садъёсын вераськонъёс нуиськом. Со сяна куинь арлы одӥг пол квалификациез ӝутон понна курсъёсты ортчиськом, арлы кык пол гидрантъёсты эскериськом, 17 гуртын отработка (татын тылпу кысон понна картаос, эвакуаци быдэстон планъёс эскерисько) быдэстӥськом, 24 гуртын алон ужъёс нуисько. Котькуд гуртын нимысьтыз коркан инструктажъёс ортчо на. Та ваньмыз нимысьтыз книгае пусйиське, сое котькуд ужась ачиз гожъя. (Та зэмзэ но озьы. Вань тетрадьёс но книгаос гожтэмын, инструктажъёсын ки нюртэмын. Вань документаци радызъя быдэстэмын).

— Кыӵе воштӥськонъёс ортчизы ужады? Арысен аре секытгес яке капчигес луэ?

— Выльдӥськонъёс вуо, та пумысен шугъяськонъёс уг кылдо. Кылсярысь, туэ милемлы выль рукавъёс вайизы, компьютерез выльдӥзы. Ужан тӥрлыкъёсмы умойгес луо, соосын ужаны но капчигес, туала технологиос азинскемен, юрттэт но дыраз сётӥське. Машинаосмы 1974 но 1984 арын потэмын, озьы ке но туж умой ужало на, котькуд нунал водительёсмы соосты эскеро, рос-прос учкыса уло, — верало ужасьёс.

Вызов луиз ке, экипаж базаысь одӥг минутскын вызове потыны кулэ. Со понна кулэ дӥськутэз дӥсяны соослы 21 секунд сётӥське. «Арысен аре тае аслыд сяме кутӥськод ини», — шуо ужасьёс. Нош тани Эдуард Перемечев та нормативез эшшо но умоятӥз, солы та понна 16 секунд гинэ кулэ. 

— Малпасько, тӥ ужады огшоры кужмо, чылкыт визё ворогоронъёс гинэ ӧвӧл, кыӵе выль сямъёстэс усьтӥз спасатель уж?

— Спасательлэн пӧртэм удысын тодон-валанъёсыз луыны кулэ. Кылсярысь, адямилэсь мылкыдзэ валаны кулэ. Калык понна ми психологъёс но, врачъёс но, дышетӥсьёс но, визьнодасьёс но.

— Вань-а кыӵе ке секытэз ужады? Мае тужгес висъясалды?

— Котькуд шудтэм учыр ас понназ секыт. Котькудӥзлэн кыӵе ке шугез вань: я тӧл, я кезьыт, я зор, я чидантэм пӧсь. Ваньмызлы дышоно ини, котькуд адямилы кадь милемлы но ужано. Тужгес секытэз — со адямилэн ма карыны валантэмез. Кылсярысь, тылпу кылдӥз ке, соос шонерак учкыса сыло, яке телефонъёсазы снимать каро. Кылдэм шудтэм учыръёсы, меӵак 101 номере жингыртоно. Та юрттэт курон меӵак Балтась ёрослэн МЧС службаяз лыктэ, соин юрттыны но чальгес вуыны луэ, — огкылысь верало воргоронъёс.

Тодӥськоды, дыр, туэ Оренбургын кылдэм югдурез: соос копак ву улэ сюризы. Ӵапак татчы ик ыстэмын вал та постысь Эдуард Николаевич Перемечев но. Соин та командировка ласянь но вераськонмы луиз.

— 12 ар ужан вакытам таӵе югдур нырысетӥзэ кылдӥз. Уг тодӥськы мукет улосъёсы ыстэмзэс. Суббота нунал вал со, Дмитрий Николаевич жингыртӥз, тонэ, пе, командировкае келяло. Со понна ӝыны нунал сётэмын вал. Огъя республикаысь 46 адями люкаськиз, соос пӧлысь 12-эз — пожарной охранаысь ӧнерчиос, нош кылемъёсыз спасательёс. Азьвыл ик ми дамба лэсьтӥм, кӧня ке ву ӝутскем бере Оренбурге выжимы. Татын калык воксё дась луымтэ. Кытчы ысто, отчы ик мынӥськом. Кытын ке юртысь ураме ву кыским, кытын ке урамысь — ӵыпетэ. Та вакытэ калык понна секыт кылдӥз юоно вуэн. Озьы ке но, милемлы юрттӥсьёс калык пӧлын трос вал, кин ке пӧсь сиён но нуллӥз. Сыӵе секыт югдуръёс калыкез огазеяло, шуо, озьы ик вань, мылкыдтэмъёс ӧй вал татын. Ужмы но ас радызъя мынӥз, нокыӵе керетонъёс ӧз кылдэ. Татын ми арня ужамы, тросэныз эшъяським. 

— МЧС-ын ужасьлэн куинь валтӥсь сямъёсыз…

— Ӝоглык, шаплы луон, быгатонлык.

— Ӧнер праздникеныды валче, кыӵе ӟечкыланъёсын вазиськысалды ужъюлтошъёстылы? Кызьы пумиталоды асьтэос та праздникез?

— Пумиталомы ми та праздникеныз ужамы яке ужмы сярысь малпаса, — серекъяса верало воргоронъёс. — Кызьы ужаськомы, озьы ик мед ужаломы. Валтӥсез — тазалык. Та самой дуноез дунне вылын. Матысьёсты, ӵыжы-выжыосты сӧл-таза мед луозы, мукетыз ваньмыз одно ик луоз.

Спасатель — со зэмос воргорон, кудӥз кышкытлэсь кӧбератэк юрттыны дась. Соос асьме пӧлын, огшоры улонэн уло, озьы ик пиналъёссэс будэто, семья кылдыто, но соосты висъя бадӟым сюлэмо но юрттыны дась луэмзы. 

Гажано МЧС-ын ужась ӧнерчиос но та удысысь ветеранъёс! Сюлмысь ӟечкыласьком тӥледыз ӧнер праздникеныды. Тӥ — калыклы воштыны луонтэм службаысь ӧнерчиос, калыклы матын луись адямиос. Пӧсь сюлэмдэс медаз кысэ сильтӧлъёс но ӟарт кезьытъёс, визьдэс медаз ӝуатэ сутӥсь тылъёс. Ужады азинлык но каньыллык, семьяяды шудбур, куспады валан но гажан мед луозы!