Мон шудо кышномурт

Нылкышноослэн нуналзы шуиськом ке, син азямы одно ик пуксе тулыс но шунды, сяська керттэт, шудо семья, лякыт но сюлмо кышномурт. Ӵапак нылкышно вылын улонлэн чеберлыкез возиське угось. Нокыӵе семьяез но нылкышнотэк син азе пуктыны уг луы. Солэн улонэз валамез бордын луэ семьялэн шудэз, нылпилэн вуоноез. Со вашкала дырысен озьы вал.

Дыр ортчемъя нылкышнолэн ныпъетэз секытгес луиз. Улон-вылонын шуг-секытъёс луыку, со дораз пукыны ӧз чида ни. Кышномурт валаз, солэн кияз ӵуказе нунал но семьялэн ӟеч улонэз шуыса. Со ачиз ас вылаз бадӟымгес кылкутонэз басьтӥз. Пиосмуртлы сярысь, нылкышнолы капчигес угось выль куронъёсъя тупатӥськыны, кышномурт троссэ чиданы быгатэ. Со сямызлы луыса туала улонын нылкышно пӧртэм удысъёсын тырше ини. Со анай, песянай, сузэр но апай гинэ ӧвӧл ни табере, кышномурт пӧраське но вуриське, эмъя но уте, дышетэ но кивалтэ. Туала нылкышноос тодос удысын но, политикаын но, кивалтон ужын но сюлмысь тыршо. 

Вылын Ушма гуртысь Ишмурзина Марина Владимировна но туала нылкышноослэн одӥгез яркыт представителез луэ. 

Марина — шара мылкыдо, лякыт вераськись чебер егит нылкышно. Вылын Ушма гуртын вордске но будэ, та гуртын ик аслэсьтыз шудбурзэ шедьтэ, семья кылдытэ. Бухгалтерлэсь ӧнерзэ басьтыса, «Ушма» обществоын (кирпич поттон заводын — ред.) ужаны кутске. Собере «Водстрой» огазеяськонын тырше. Кӧня ке дыр ӵоже гурт возёсъя но сиён-юонъя управлениын ужа. 2021-тӥ арысен Россиысь Агропромышленной комплексын ужасьёслэн профсоюз огазеяськонзылэн Балтась ёросысь ёзэтэныз кивалтыны кутске. Та интыужын ужаса, Марина трос гинэ пумиськонъёс ортчытъя бусыын, фермаын, амбарын но итымын мыло-кыдо ужасьёсын. Кызьы вера ачиз Марина, таӵе пумиськонъёслэн валтӥсь ужпумез луэ коллективлэсь мылкыдзэ тодон, кылдэм шуг-секытъёсты шараян. Нош со ас черодаз юрттэ ужез кулэ ӧре пыртыса нуыны.

Марина Владимировна Балтась ёросысь агропромышленной комплексын ужасьёслэн профсоюз огазеяськонэнызы кивалтэм сяна, мыло-кыдо мерлыко ужрадъёсы но пыриське, троссэ ачиз радъя но нуэ. Туэ Азьмынӥсьёслэн праздниказы сое бервыло ужамез но мерлыко ужъёсы мыло-кыдо пыриськемез понна Россия Федерациысь Федерал Собранилэн Кун Думаезлэн депутатэзлэн Таукарон гожтэтэныз но пусйизы. 2021-тӥ арын Марина, агропромышленной комплекслэн организациосыз пӧлын ортчытӥськем информационной конкурсэ пыриськыса, Балтась ёросысь профсоюз огазеяськонлэсь ужзэ возьматӥсь видеоеныз республикаын 1-тӥ инты басьтӥз.

Озьы ик со Гурт возёсъя минитерствоен но Ужъя министерствоен ортчытэм тросаз семинаръёсы пыриське, аттестациосты, дышетсконъёсты ортче, улон условиосты умоятонъя комиссилэн, общественной советлэн ужаз пыриське, быръён комиссилэн ёзчиез луэ. 

— Марина, туэ профсоюз кылдэм дырысен 105 ар тырме шуыса тодӥсько, туннэ нуналысь Профсоюз кыӵе ужен выре, кыӵе сюлмаськонъёсын улэ?

— Зэм, Агропромышленной комплексын ужасьёслэн профсоюззы — Россиын одӥгез тужгес вужез огазеяськон. Солэн историез 1919-тӥ арын кутске. Озьыен, туэ милям 105 аръем юбилей.

Туннэ нуналэ Профсоюз Россилэн 80 улосаз гурт возёсын но соин герӟаськем мукет удысъёсын тыршись миллионлэсь трос ужасьёсты огазея но Россиысь Эрико Профсоюзъёслэн Федерацизылэн членской огазеяськонэз луэ.

Профсоюзмылэн валтӥсь ужпумез — гурт удысын ужасьёслэсь но ветеранъёслэсь, дышетскись егитъёслэсь социально-трудовой правооссэс но тунсыкъёссэс утён, агропромышленной комплексын ужасьёслэсь улонзэс умоятыны чаклам социальной программаосты кылдытонэ но улонэ пыӵатонэ пыриськон. Озьы ик ужан кусыпъёсты азинтон но социальной партнёрствоез умоятон вылысь профсоюз федеральной но территориальной уровеньын куиньпалъем огкылъёсты кылдытонэ но кутонэ пыриське. 

Балтась ёросын гурт удысын ужась 1260 мурт профсоюзлэн ёзчиез луэ, гурт возёсъёсын дас кык, гурт возёсъя управлениын но «Балтаси-Мелиоратор» обществоын быдэн одӥг первичной профсоюз огазеяськонъёс кылдытэмын.

— Дуннеысь югдурез учконо ке, трос интыын кивалтон ужез нылкышноос нуо. Со шумпотымон: озьыен, нылкышноос дӥсьтыса котькыӵе уж борды басьтӥсько.

— Кивалтон уж — со котьку секыт уж, со чотын мынам уже но улонмылэсь пӧртэм палъёссэ йӧтэ. Ӵемысь кивалтӥсь доры адямиос асьсэ шуг-секытъёсынызы лыкто, юрттэт курыса. Астэ эскерон, астэ быдэсак реализовать карон но тыныд оскись муртъёслэсь малпанъёссэс быдэстон понна кыл кутэмдэ шӧдон ӟеч кивалтӥсьлэн валтӥсь тодметъёсыз луыны кулэ. Туж шумпотӥсько, куке юрттыны быгатӥськом.

— Зэмзэ но, ас уждылы сётскем нылкышно тӥ.

— Мон туж яратӥсько пумтэм-йылтэм кыстӥськись паськыт бусыосты. Туспуктӥсько, статьяосты гожъясько, пӧртэм интернет конкурсъёсты но нылпиослы конкурсъёс радъясько. Профсоюзмылэн уженыз тодматӥсько. Озьы ик ми егитъёсын ужанлы но бадӟым саклык висъяськом. Гурт удысын ужасьёслэн тазалыксы сярысь сюлмаськиськом. Арлы быдэ профсоюзлэн путёвкаезъя огазеяськонмылэн 180 ёзчиез санаториын шутэтскыса, тазалыксэ юнматыса бертыны быгатэ.

Огазеяськонмы школаосын но кусып возе. Кылем арын, кылсярысь, Покчи Лӧзя шоръёзо школаысь пиналъёсты профсоюзлэн уженыз тодматӥ, пиналъёс бусые мыныса асьсэ синмынызы бусыысь ӟырдыт ужъёсты адӟыны быгатӥзы, куд-огез комбайнэ но пуксиз.

Сяме пыриз Гырон быдтон праздникын удмурт механизаторъёсты пусъён ужрад но. Скал кыскисьёсты но пудоез искусственной амалэн бызьылытонъя технологъёсты кузьымъёсын пусъён ужрадэ пыриськиськом. Коньдонэн юрттэт сётӥськом секыт югдуре шедемъёслы. Нимысьтыз ожгар операцие пыриськисьёслы гуманитарной юрттэт сётонэ мыло-кыдо пыриськиськом. Таӵе секыт югдуре мобилизованнойёслэн семьяоссылы пӧртэм ласянь юрттыса гурт возёсъёс бадӟым уж лэсьтӥзы. Таин валче туж бадӟым тау шуэме потэ возёсъёслэн кивалтӥсьёссылы.

Гурт возёсысь ёзчиосмес Выль арен но доразы мыныса ӟечкыласьком, конкурсъёсын, кырӟанъёсын но эктонъёсын, кузьымъёсын ужрад ортчытӥськом.

Арлы быдэ гурт возёсъя но сиён-юонъя управлениысь ӧнерчиен ӵош механизаторъёслэсь ужез утёнъя куронъёсты тодэмзэс эскеронэ пыриськисько. Тулыс Гостехнадзорысь комиссиен техникалэсь дасьлыксэ эскериськом, сӥзьыл толлы дасям техникалы дунъет сётӥськом. Гужем пыриськисько комбайнъёслэн парадазы, кытын техникалэн аран дырлы дась луэмез эскериське.

Юн кусып возисько гурт возёсъёсысь ӧнерчиосын: валтӥсь инженеръёсын, агрономъёсын, бухгалтеръёсын. Огъя вераса, профсоюз уже возёсысь быдэс персонал, ӧнерчиос, озьы ик техника итӥське.

Туэ Семьялэн ареныз валче Профсоюзлэн нимыныз ёросысь куинь трос нылпиен семьялы сертификат кузьмамын вал. 

— Марина, ку вуиськоды сомында ужез быдэсъяны? Ваньмаз вутскон понна дыр кулэ ук. Вылаз ик тӥ кузпал но анай. Уг люкеты-а ужды семья улонэз нуыны? Нылпиосты будэтонын палдурес уг шӧдӥськы-а?

— Туж секыт нуналъёс луыло, висён дыръёс но, озьы ке но огпол но аслэсьтым ужме быдэстытэк кельтэме ӧвӧл. Одӥг муртлэн верамез но вань: профсоюз ужез тон понна, пе, кылдытӥллям.

Туж яратыса но ужез азьланьтон мылкыдэн басьтӥськисько мон котькуд ужрад борды. Нуисько календарь, ваньзэ азьвыл планировать карисько. Кузьымъёсын пусйыса гинэ ӧвӧл, гурт удысын ужасьёсын нимысьтыз пумиськыса, сюлэмшугъяськытӥсь ужпумъёсты эскерыса. Ужась адями со сярысь сюлмасько, саклык висъяло, солэсь ужзэ адӟо шуыса шӧдыны кулэ. Куинетӥ нылпиелэн вордскемез но мынам ужан графикам воштонъёс ӧз пырты, мон озьы ик ужай. Куд-ог ужрадъёсы пиналэным валче пыриськылӥм, кылсярысь, одӥг пол пичи нуныеным кунян утись кышномуртэз юбилееныз ӟечкыланы фермае но мыныны тупаз. Бадӟым нылпиосынымы ми ӵемысь бусые октон-калтон кампанилэсь мынэмзэ эскерыны ветлӥськом. Бадӟымез нылы туспуктэ но мерлыко вотэслэсь ужзэ нуыны юрттэ. Нош кузпалэ кичӧлтӥсь луиз гурт возёсъя организациосын «Профсоюзлэн Тол Бабаез но Лымы нылэз» акциез ортчытонын. Ӵапак кузпалэ луэ мынам осконэ но пыкетэ, кызьы семьяын, озьы ик ужын но.

— Семья пумысен вераськон потэм бере, матысьёсты сярысь но тодэм потэ вал.

— Кузпалэ Александр лэсьтӥськон организациын цехлэн начальникез луэ. Семьяямы куинь нылпи будэ. Нылпиосмы туж активноесь, школаын, ёросын ортчись котькуд ужрадэ, конкурсэ мыло-кыдо пырисько но азинсконъёсы вутско. Киужъёсын вырыны, эктыны, экскурсиосы ветлыны ярато. 

Бадӟымез нылмы Аделина Покчи Лӧзя школаын 7-тӥ классын дышетске. Умой дышетске, «4»-лы но «5»-лы. Олимпиадаосы, школаен ортчытэм конкурсъёсы, художественной постановкаосы пыриське. 

Кыкетӥез нылмы — София — 5-тӥ классын тодон-валан басьтэ. Ӟеч сюлэмо, ваньмызлы оскись но котьку ас выжыкыл дуннеяз поръясь но малпам веросъёссэ гожъясь нылаш. Азьланяз туж потэ солэсь веросъёссэ печатласа книгаен поттэм. 

Покчиез — Егор — атаезлэн шумпотонэз, туж визьмо но шаян пияш. 

2023-тӥ арын милям семьямы «Эковесна» конкурслэн ёрос этапаз нырысетӥ инты басьтӥз. 

— Тросэз понна 8 Март – со «анайлэн праздникез», нош тӥ кызьы адӟиськоды та праздникез?

— 8 Март — нылкышноослэн калыккуспо нуналзы, ку, нылкышноосты сӥлы карем сяна, кышномуртъёслэн политика, экономика но мерлыко удысъёсын азинсконъёссы но пусйисько, дуннеысь нылкышноослэн ортчемез, туннэез но вуоноез возьматӥське. Туала сямъёсъя 8-тӥ мартэ вань нылкышноосты ӟечкылало, арлыдзы, йӧскалыксы, осконзы, политика ласянь учконъёссы но мукет пӧртэмлыкъёссы шоры учкытэк. Праздник тулыслэн кутскеменыз, нылкышно чеберлыкен но мылкыд бурдъяськонэн син азе пуксе.

—  Кызьы тӥ малпаськоды, капчи-а кышномурт луыны? Кыӵе луыны кулэ туала нылкышнолы?

— Тросэз нылкышноос туннэ нуналэ карьера лэсьтыны, азинсконъёсы вутскыны тыршо. Нош со куд-ог воргорон сямъёсты но кулэ каре. Вашкала гожтэмъёсын, кышномуртлэн валтӥсь ужпумез семья кылдытон шуыса пусъемын. Но со чик но нылкышно ужаны кулэ ӧвӧл шуэмез уг валэкты. Озьы ке но кышномуртлэн валтӥсь ужез — нылпиосты вордон. Мынам улонам валтӥсь ориентир — со семья — кузпалэ но нылпиосы, соос ик монэ азинсконъёсы но валто.

— Уж но семья сяна вань на тунсыкъёс. Вань-а тӥляд кыӵе ке хоббиды?

— Семья сярысь сюлмаськон нылкышнолэсь трос кужымзэ но дырзэ кулэ каре. Нош куке семья эшлыко но дорысь ужъёсты валче быдэсъя, валче конкурсъёсы, ужрадъёсы пыриське, соку жади, улон секыт, законъёс чурыт шуыса ӝожтӥськыны чик дыр ӧвӧл.

Мон туж эмоциональной адями. Нимысьтыз висъямон кыӵе ке тунсыке мынам ӧвӧл, но вань сыӵе умой сямы — ачим котькуд ужъя кариськыны быгатӥсько. Трос пӧртэм творческой киужъёс лэсьтэмын, трос конкурсъёсы пыриськемын. Мынам аслам девизэ — кышкатэк котькуд уж борды басьтӥськы.

— Тӥ асьтэдыз шудоен лыдъяськоды-а?

— Туж бадӟым тау анай-атайёсмылы. 15 ар ини ми ог-огмес валаса но гажаса улӥськом, кӧня соос кужымзэс но тазалыксэс сётӥзы асьсэ нылпиоссэс, милесьтым нылпиосмес визьнодан понна. Милям азинсконъёсмылэн емышъёсыз — соослэн тыршемзылэн бервылэз. 

Мон шудо кышномурт — мон котьку аслэсьтым пушдуннеме, шӧдонъёсме валасько, малпанъёсы сайкыт, матысьёсы бордам, ваньмы сӧл-таза. Ваньмыз со мылкыдэз ӝутыны но кужым люканы юрттэ.
Мон ачим аслым мылкыд кылдытӥсько но со мылкыдэз куашкатытэк тыршисько. Уродзэ малпась адямиос пумисько, но, шумпоттэ соиз: ӟеч сюлэмо адямиос тросгес. 

— Тау вераськемдылы, Марина Владимировна. Ваньзэ умойзэ тӥледлы, выль вормонъёс. Учырен пайдаяськыса, 8-тӥ южтолэзен тӥледыз но вань нылкышноосты ӟечкыласько.

Гажано нылкышноос, тӥляд зарни киосты, паймымон устоесь ужъёсты, шулдыр кырӟан гуръёсты дуннеысь улонэз котьку мед шулдыртозы. 8-тӥ южтолэзе гинэ ӧвӧл, котькуд нунал тӥляд киосады сяськаос мед луозы, нош ымнырады пальпотон мед ворекъялоз. Тӥляд пальпотӥсь ымныръёсты, шуныт мылкыдды, визьноданы но ӟеч сямъёс пыӵатыны, кулэ дыръя юрттыны, юн пыкет луыны быгатэмды улонмес азьланяз но мед валтоз.

Кивалтон удысын,наукаын, бусы гыронын-кизёнын, заводъёсын воргоронъёс трос. Мазэ веранэз, соос оскымон пыкъет луо. Но ум вунэтэ, сыӵе юн воргоронъёслэн тыбыр сьӧразы но сыӵе ик юн нылкышноос сыло шуыса.

Вераськиз Ольга Плотникова

Туспуктэмъёс: Марина Ишмурзиналэн семья архивез