Мозаика — шудон гинэ ӧвӧл

13 куарусёнэ Казаньлэн одӥгаз тужгес но синмаськымон люкетаз — Старо-Татарской слободаын — пӧртэм калыкъёс люкаськизы. Соос огазе шулдыръяськизы, киужъёсын выризы но ас калык эктон-кырӟанъёсынызы тодматӥзы. 

Кельше-а калыклы таӵе ужрадъёс? Одно ик, пичиос но, бадӟымъёс но тунсыкъяськыса дӥськутъёсты учко, котькудӥз аспӧртэмлыко, котькуд калык дӥськутаз аслэсьтыз пуштроссэ пыртэ. Та дӥськутъёс но чеберман тӥрлыкъёс пыр ик асьмеос нылпиосмылы но калыклэсь дунлыкъёссэ пыӵатӥськом.

«Мозаика культур» этноконфессиональной фестиваль туэ аслэсьтыз 10 аръем юбилейзэ пусйиз. Фестивальлэн валтӥсь малпанэз — Татарстанын тупаса улӥсь калыкъёслэсь лулчеберетсэс возьматон.

— Сюлмысен ӟечкыласько тӥледыз та бадӟым но шуныт праздникен, туннэ со юбилейной — фестивальлы 10 ар. Мон оскисько, туннэ котькуд адями аслыз тунсыко инты но кельшымон уж шедьтыны быгатоз но озьы ик та шундыё, яркыт нуналэз кемалы тодаз кельтоз шуыса. Асьме элькунмы туж узыр аслаз сям-йылолъёсыныз, Татарстанын уло пӧртэм калыкъёс. Та туж дуно, соос ваньзы асьсэлэсь лулчеберетсэс но сям-йылолъёссэс утё. Асьмеос ваньмы пӧртэм ке но, асьмеос ваньмы Россиысь калык! — вазиськиз лыктэмъёслы Татарстан Республикалэн Раисэзлэн кунпуш политика юанъёсъя департаментысьтыз йӧскалык политикаез улонэ пыӵатонъя управленилэн кивалтӥсез Данил Мустафин. 

Татын люкаськизы ӟучъёс, бигеръёс, удмуртъёс, поръёс, крашинъёс, башкиръёс, тувинецъёс, якутъёс, мордваос, таджикъёс но пӧртэм мукет калыкъёс. Соос ог-огзылэсь кылзэс ӧз ке но тодэ, шумпотыса тодматскизы, бугырскем мылкыдэн малпанъёсынызы люкиськизы, пӧртэм мастер-классъёсы пыриськизы.

«Шулдыр ӝыт» ансамбль но аслаз чебер концертной номереныз куноосты паймытӥз. Асьсэос но соос ӝутскем мылкыдын пыриськизы та ужрадэ. Пӧртэм калыкъёсын тодматскыса, выльзэ тодыса, шулдыръяськыса ортчытӥзы соос нуналзэс. Егитъёс но трос гинэ выльзэ тодӥзы, мукет калыкъёсын тупаса улоно шуыса валазы.

— Милемлы туж тунсыко вал мукет калыкъёсын адӟиськыны. Асьме ёросамы бигеръёсын, ӟучъёсын но поръёсын улыса, соослы дышемын ини. Соин мукет лулчеберетысь огмуртъёсын но вераськыны туж тунсыко луиз. Таӵе ужрадъёс одно ик кулэ, татын бадӟымъёс гинэ ӧй вал ук, тросэз егитъёс. Туннэ нуналэ калыкъёслэн эшъяськонзы туж ляб, сое юнматоно, валче улоно, — таӵе малпанъёсын люкиськизы фестивале пыриськемъёс.

Таӵе ужрадъёс туж пайдаё луо будӥсь поколенимы понна, малы ке шуоно соос йӧскалыко лулчеберетэн тодматскыса, кырӟанъёс но эктонъёс пыр котькуд адями вала — адями уг люкиськы кылъя яке вордскемезъя (происхождениезъя), со нырысь ик шаер понна кулэ луись кунмурт, анай-атаезлэн пиез. Нош огазе асьмеос — бадӟым но задор кужым, кудӥз азьпал улонэз кылдытэ.