Ожгарчиослэн выжызы

Асьме котырысь, кызьы тӥ валады ини, сюрслэсь трос адямиос пыриськиллям Нырысетӥ Дунневыл жугиськонэ. 3 мартэ 2018 аре 100 ар тырмиз жугиськонлэн быремезлы. Ципья школа пала мыныку, государственной аптекалы пумит, Закар нюкез выж вамен потэм бере, бур пала кыле туссэ возьматӥсьтэм корка. Вашкала дыръя со интылэн нимыз луэм: Серепион возь. Отчы яна потыса выль корка пуктэм Захаров Иван Захарович (Закар Диван). Со корка сьӧрын ик, выль корказ, улэ солэн пиезлэн нылыз Захарова Галина Михайловна. (Туэ 20-тӥ апреле пусйиз 81 арессэ).

Захаров Иван вордӥське 1886 арын, Тылогуртын. Басьтэ атаезлэсь нимзэ Захаров фамилия карыса. Со Филип Закарлэн луэм нырысетӥ пиез. Яратонзэ шедьтэ Тылогуртысь ик Залкей юртысь Надежда Алексеевна нимо нылэз. Куинь нылпизы луэ, одӥгез нылыз вазен висьыса кулэ, пиез Михаил кыкетӥ Дунневыл жугиськонэ шедьыса улон сюрессэ отын ыштэ. Нылыз Анисья, кыкетӥ Дунневыл жугиськонысь бертэм бераз, кема аръёс ӵоже улӥз Ципья гуртын.

Нырысетӥ Герман ож пуромем бере, Захаров Иванэз 1914-1915 аръёсы келяло жугиськонэ. Оже мынэ Никитин фамилиен. Жугиськонэ пыриське Карпатской фронтын, 1917 арын шеде немецкой пленэ. Келяло Нижней Австрие военнопленнойёслэн ужан лагерязы. Отын общий сбораз, юаллям кин муш утьыны быгатэ шуыса. Малпаськытэк Иван куриськем ужаны. Озьыен, Иван Захаровичез лэзё муш утьыны Австриысь одӥгез тодмо биология но ботаника удысын вырись учёной Гвидо Скленар доры. Гвидо вордӥське 15 мае 1871 арын узыр семьяын. Гвидо Скленар дышетӥсь луыса ужам, собере Хаускирхинын школа директор, берлояз 1931 арын луэм федеральной канцлер. Тужгес яратоно ужез луэм биология но ботаника удыс. Научной ужзэ но сӥзем улмопу будэтонлы но муш селекцилы. Ужзэ азьланьтыса селекционировать карыны быгатэм выль муш порода — штамм 47 Скленар. Муш утён удысын ӟеч тыршемез понна, 1939 арын солы Германиын вылӥ «Серебряная сота» награда сётӥллям. Гвидо Скленар кулэ 1953 арын 82 аресэн. Али дыре но соослэн вань муш утён бакчазы, Скленарлэн нылпиосыз азьланьто солэсь ужъёссэ. Захар Иванлэн гожтэмысьтыз: Нуналлы сиыны 1 картошка но 1 кияр сёто вал. Кузёлэн вань 100 пала умортоез, уж мынэ, кузё шумпотэ». Брестско-Литовской мир кутэм бере, кузёез бертыны зарни уксё сётэ. Бертӥллям кык ӵошен Малмыжысь ӟуч эшеныз Масумовен. Пензае вуэмзы бере Масумовез висёнэ усьыса кулэм.

Пиез Захаров Михаил Иванович вордӥське Тылогуртын 18 куарусёнэ 1914 арын. Жугиськонэ пыриське старшой лейтенант луыса 1 стрелковой полке 397 стрелковой дивизие. Быре 05.03.1943 Старо-Русской наступательной операция дыръя, Ленинградской обласьтын, Поддорской районын, Холмы гурт вӧзын. Ватэмын 9 км от села  Новгород улосвылысь Поддорье гуртлэсь 9 иськеме интыяськем вынлыко шае. Михаил Ивановичлы пыриськыны тупа Быдӟым ожлэн тужгес кужмо жугиськоназ. Кудӥз нимаське Старо-Русской наступательной операция. Та операция кыстӥське 4 мартысен 19 мартозь 1943 арын. 20 иськем сюресэз ортчон понна, 1 нуналлы советской армия та операцилы дун тыре 6444 кулэм солдатъёсын. Вань ыштонъёс асьме палась 103108 сюрс адями.

Михаил Ивановичлэн кыле одӥг нылыз Захарова Галина Михайловна.

Захаров Иванлэн нылыз Захарова Анисья Ивановна вордӥськемын 1924 арын, солэн кык пиез Валерий, Вячеслав но кык нылыз Светлана но Люба. 10 класс быдтэм бераз сое но басьто Кыкетӥ Дунневыл ожмаськонэ. Отын со пыриське связист луыса Калининской но Брянской фронтэ. Жугиськонысь бертэм бераз ужаз райсоюзын, сельпоын, плетёной фабрикаын, сельсоветын. 90 арессэ ортчытыса, кулӥз Ципья гуртын.

Кулытозяз Захаров Иван Захарович тырше муш вордонын но улмо сад будэтонын. Кошке дунне вылысь 1971 арын, 85 аресэн.

Та статьяез быдэстыны юрттӥзы Захарова Галина Михайловна, Поддорской районлэн администрациез, нимаз ик Панина Елена Викторовна. Материалын кутэмын Захаров Иванлэн аслаз гожтэмез. «Память народа» сайтысь 397 стрелковой дивизиялэн донесениосыз но википедия сайтысь, Гвидо Скленарлы сӥзем сайтысьтыз материалъёс.

Алексей Шмелёв